Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! MAYO 2015

 GINDESINYO BALA INI?

Nagasiga nga Organo sang Lukos nga Hawaiian Bobtail

Nagasiga nga Organo sang Lukos nga Hawaiian Bobtail

ANG lukos nga Hawaiian bobtail nga nagapangita sing kalan-on kon gab-i nagapasiga sang iya kaugalingon nga suga—indi agod makita sia kundi agod indi sia makita—para mangin pareho sia sa kasanag sa palibot nga halin sa bulan kag bituon. Ang sekreto sini nga sapat amo ang nagabulig sa iya nga mga bakterya nga nagapagua sing kasanag. Ina nga pagbuligay may sekreto man nga mahimo kita makabenepisyo, pero sa tuhay nga paagi. Mahimo ini makabenepisyo sa aton ikaayong lawas.

Binagbinaga: Ang lukos nga Hawaiian bobtail nagaistar sa matin-aw nga baybay sang Hawaiian Islands. Kinaandan na nga bangod sang kasanag sang bulan kag sang mga bituon makita sang mga nagapanukob ang garhom sang sapat. Pero ang lukos nga bobtail nagapagua sing silak sa idalom nga pareho sa kasanag sang kagab-ihon sa palibot. Amo nga indi sia bal-anon kay wala sia sing garhom ukon landong. Ang “moderno” nga aparato sang lukos amo ang iya nagasiga nga organo, nga may nagabadlak nga mga bakterya nga nagapagua sing hustuhan lang nga kasanag para indi makita ang lukos.

Ang mga bakterya nagabulig man sa oras sang pagbugtaw kag pagtulog sang lukos. Interesado sa sini ang mga researcher bangod ang lukos nga bobtail mahimo nga indi lamang ang sapat nga may kaangtanan ang mga bakterya sa siklo sang pagtulog kag pagbugtaw, ukon ginasunod nga iskedyul sang hilikuton adlaw-adlaw. Halimbawa sa mga mamalya, ang bakterya nga nagabulig sa pagtunaw sang kinaon mahimo man may kaangtanan sa siklo sang pagtulog kag pagbugtaw. Kon matublag ini nga mga siklo, magaresulta ini sa depresyon, diabetes, sobra nga katambukon, kag problema sa tulog. Gani ang pagtuon sa mga bakterya nga yara sa lukos makabulig para mahangpan pa gid ang ikaayong lawas sang tawo.

Ano sa banta mo? Ang nagasiga bala nga organo sang lukos nga Hawaiian bobtail resulta sang ebolusyon? Ukon gindesinyo ini?

Magtuon sing Dugang Pa