Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

MAGMATA! MAYO 2015

“Ginabuligan Kami sang Dios nga Mag-ayo”

“Ginabuligan Kami sang Dios nga Mag-ayo”

SI Natalya kag ang iya 9 anyos nga bata nga lalaki nga si Aslan, nagapungko sa tupad ni Zarina kag sang iya 12 anyos nga bata nga babayi nga si Anzhelika. Sobra sa 1,000 pa ka kabataan kag adulto ang tuparay nga nagapungko, nga ginabantayan sang armado nga mga tawo.

Sang temprano sina nga Mierkoles, Septiembre 1, 2004, ang mga bata kag ginikanan yara sa gua sang eskwelahan, nga nagahulat sa una nga adlaw sang klase sa eskwelahan sang Beslan, nga isa ka gamay nga banwa sa Alania, Rusya. Hinali lang nga ginsalakay sila sang armado nga mga tawo kag mga suicide bomber, nga nagapalupok sa ibabaw kag nagasinggit. Gintipon sang sobra 30 nga nagsalakay ang nahadlok nga mga tawo sa sulod sang gymnasium sang eskwelahan, kag nagbutang sing mga bomba sa palibot sini.

Pagpamatyaganay kag Pagkinagula

Amo ini ang pagsugod sang tatlo ka adlaw nga makakululba nga pagpamatyaganay sang mga nagsalakay kag sang mga soldado. “Amo pa lang ako sadto nakapangamuyo sing tuman kalawig,” siling ni Natalya, nga nagatuon sing Biblia sa mga Saksi ni Jehova.

Hingapusan sadto sang tig-ilinit, kag ang gymnasium tuman kagin-ot. Halin sang aga sang ikaduha nga adlaw, wala ginhatagan sang mga nagsalakay sing pagkaon ukon tubig ang ila mga hostage, kag sa ikatlo nga adlaw—Biernes—ang pila ka hostage nag-inom na lang sang ihi kag nagkaon sang mga bulak nga ihatag kuntani sang mga bata sa ila mga manunudlo. “Ang isa ka bata nga lalaki nga nagapungko sa amon tupad naghatag sa akon sing isa ka dahon,” siling ni Natalya. “Gintunga ko ini kag ginhatag ang katunga kay Anzhelika kag ang katunga kay Aslan.”

Sang ikatlo nga adlaw, nagkinagula na. “Natumba ako bangod sa mga paglupok,” siling ni Natalya. “Napuno sang aso ang palibot, kag nagtiniruhay na.” Samtang nagaengkuentrohanay ang mga soldado kag mga terorista, nagkamang sanday Natalya kag Aslan palayo.  Ang isa nga taga-Ossetia nga si Alan nagdala sa ila sa lugar nga luwas sa katalagman. Madamo ang wala nakapalagyo.

Sa Tapos sang Trahedya

Si Anzhelika napatay sa tion sang pagkinagula

Ginatos ka bata kag adulto ang napatay, pati na si Anzhelika. Sinemana nga mabatian ang mga pagpisngo kag paghinibi sa Beslan. Makita gikan sa apartment ni Natalya ang eskwelahan, kag bisan may bag-o na ginpatindog nga eskwelahan sa malapit, indi magsulod diri si Aslan. Indi gani sia maggua para maghampang. “Nangabay kami kay Jehova nga buligan kami nga madaug ang kahadlok,” siling ni Natalya. Sang ulihi, nakatigayon si Aslan sing kaisog nga mag-eskwela liwat.

Pagtilaw gid para kay Natalya ang pagtambong sa pagtilipon sang mga Cristiano sa Kingdom Hall. “Kon upod gani ako sa madamo nga tawo sa sirado nga lugar, pamatyag ko daw salakayon ina nga bilding,” siling niya. “Nagapangamuyo ako nga wala sing matabo. Wala magdugay nag-untat ako sa pagtambong sa mga pagtilipon. Ginapakigbatuan ko man ang paghunahuna nga madamo ang napatay, samtang kami naluwas.”

Ang Pag-ayo

“Nagapasalamat gid ako sa mga katapo sang kongregasyon nga padayon nga nagabulig sa akon,” siling ni Natalya. “Ang Saksi nga si Tatyana padayon nga nagabisita sa akon kada tatlo ka adlaw. Sang ulihi, gin-upod niya ang isa ka Saksi nga si Ulyana—nga mabuot, mataktikanhon, kag malulo maghambal—nga madamo sing nahibaluan sa Biblia. Ginhatagan niya ako sing komendasyon sa akon mga panikasog, kag nagapamati gid sia kon nagahambal ako.

“Makaistorya na gid man ako parte sadto nga adlaw nga indi na akig ukon wala na nahadlok”

“Ginbasa sa akon ni Ulyana ang ginsiling sang Cristiano nga si apostol Pablo sa 2 Corinto 1:9. Sa tapos sang iya kabudlayan sa Asia, si Pablo nagsiling: ‘Abi namon ginpamatbatan na kami sing kamatayon.’ Ginbasa man niya ang Isaias 40:31: ‘Ang mga nagalaum kay Jehova maulian sing kusog. Magalupad sila nga daw may mga pakpak sang agila.’ Ini nga mga teksto kag ang pagpalig-on pirme ni Ulyana kag sang iban, nagpabakod sa akon nga magtambong liwat sa mga miting, upod sa akon mga bata. Pero indi gihapon ako mapahamtang kon yara ako sa sulod sang tilipunan.”

Sang ulihi, si Zarina nangin Saksi ni Jehova kag nagalaum nga abiabihon si Anzhelika sa pagkabanhaw sa isa ka matahom, kag malinong nga duta, nga gamhan sang Ginharian sang Dios. (Mateo 6:9, 10; Binuhatan 24:15) Si Natalya kag ang iya mga bata nabawtismuhan sang 2009. Nagaistar sila gihapon malapit sa naguba nga gymnasium pero wala na sila ginakugmat. “Makaistorya na gid man ako parte sadto nga adlaw nga indi na akig ukon wala na nahadlok,” siling ni Natalya. “Ginabuligan kami sang Dios nga mag-ayo.”

Magtuon sing Dugang Pa

ANG LALANTAWAN

Nagakatabo ang Malain sa Maayo nga mga Tawo—Ngaa?

Ginapakita sang Biblia ang tatlo ka panguna nga kabangdanan sang pag-antos sang tawo.