Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! ABRIL 2015

 TOPIKO SA KOBER | ANO NA ANG NATABO SA DISIPLINA?

Epektibo nga Disiplina

Epektibo nga Disiplina

INDI manigar nga mabudlay gid nga mangin ginikanan. Pero magabudlay pa gid ini kon indi ka magpadapat sing disiplina sa tion nga kinahanglan ini. Ngaa? Bangod kon wala sing disiplina (1) padayon nga magpasaway ang kabataan, kag magapabudlay ini sa mga ginikanan, kag (2) magabag-obag-o ang pagsulundan sang mga ginikanan amo nga magalibog ang ulo sang mga kabataan.

Sa pihak nga bahin, ang mahigugmaon kag balanse nga disiplina magahanas sa hunahuna sang bata kag magadihon sang iya batasan. Nagabulig ini sa mga bata nga magbatyag sing kalig-unan samtang nagadaku sila. Pero diin mo makita ang masaligan nga panuytoy sa pagdisiplina sa imo kabataan?

Ang Kapuslanan sang mga Prinsipio sa Biblia

Ang mga manugbalhag sini nga magasin, ang mga Saksi ni Jehova, nagapati nga ang Biblia, suno sa ginasiling sini, “mapuslanon sa pagpanudlo, sa pagsabdong, sa pagtadlong, sa pagdisiplina.” (2 Timoteo 3:16) Pero ang Biblia indi lamang isa ka libro nga nagatudlo sa imo kon paano mangin ginikanan; ang mga prinsipio sini nagahatag sing praktikal nga giya para sa mga pamilya. Binagbinaga ang pila ka halimbawa.

ANG GINASILING SANG BIBLIA: “Ang kabuangan yara sa tagipusuon sang bata.”—Hulubaton 22:15.

Bisan pa madinumdumon kag mabuot ang mga bata, kon kaisa nagahimo man sila sing katuntuhan. Gani, kinahanglan sang kabataan ang disiplina. (Hulubaton 13:24) Ang pagbaton sini makabulig sa imo nga matungdan ang imo responsibilidad subong ginikanan.

ANG GINASILING SANG BIBLIA: “Indi ka magpugong sa pagdisiplina sa imo bata.”—Hulubaton 23:13.

Indi ka magkabalaka, ang balanse nga disiplina indi makahalit sa imo kabataan ukon mangin rason nga maghinakit sila sa imo sa ulihi. Kon ipadapat mo sing mahigugmaon ang disiplina, makabulig ini sa imo kabataan nga batunon sing mapainubuson ang pagtadlong—ini nga kinaiya makabulig sa ila bisan daku na sila.—Hebreo 12:11.

 ANG GINASILING SANG BIBLIA: “Kon ano ang ginasab-ug sang tawo, ini man ang iya anihon.”—Galacia 6:7.

Natural lang nga luyag gid sang mga ginikanan nga amligan ang ila kabataan kag nagakadapat gid ini. Apang, sa liwat, kinahanglan ang pagkabalanse. Indi mo mabuligan ang imo kabataan kon “salbaron” mo sila sa indi maayo nga mga resulta sang ila ginhimo ukon apinan sila kon manugid sa imo ang ila manunudlo ukon ang isa ka adulto parte sa ila mga katuntuhan. Sa baylo, kabiga sila nga mga kabulig mo. Kon himuon mo ini, ginatudluan mo ang imo bata nga tahuron ang awtoridad—lakip na ang sa imo.Colosas 3:20.

ANG GINASILING SANG BIBLIA: “Ang bata nga ginapabay-an nagapakahuya sa iya iloy.”—Hulubaton 29:15.

Mangin mahigugmaon, indi pagbag-obag-uha ang pagsulundan, kag mangin rasonable

Ang mga ginikanan indi dapat mag-abusar sang ila awtoridad, pero indi man sila dapat kunsintidor. “Ang kabataan sang mga ginikanan nga kunsintidor wala nagakilala nga ang mga adulto sa panimalay amo ang dapat sundon,” siling sang libro nga The Price of Privilege. Kon indi mo pag-ipakita ang imo awtoridad, hunahunaon sang imo bata nga sia ang dapat sundon. Gani paabuton mo nga magahimo sia sing indi maalamon nga mga desisyon nga makapasubo sa iya kag sa imo man.—Hulubaton 17:25; 29:21.

ANG GINASILING SANG BIBLIA: ‘Ang lalaki magahiusa sa iya asawa, kag sila nga duha mangin isa ka unod.’—Mateo 19:5.

Suno sa Biblia, ang lalaki kag babayi dapat mag-asawahay anay antes sila magbata kag dapat nga mag-upod gihapon sila tubtob magdalagku ang kabataan kag magbiya na sa ila. (Mateo 19:5, 6) Buot silingon, una sa tanan tiayon ka, dayon ginikanan. Pero kon magbayluhanay ini, hunahunaon sang imo bata nga ‘magpakataas sang iya kaugalingon.’ (Roma 12:3) Ang pamilya nga “nasentro sa bata” makapahuyang sang pag-asawahay.

Bulig Para sa mga Ginikanan

Para mahimo mo ang imo katungdanan subong ginikanan, ang imo pagdisiplina dapat nabase sa masunod nga mga prinsipio.

Mangin mahigugmaon. “Indi ninyo pagpaakiga ang inyo mga anak, agod indi sila maluyahan sing buot.”—Colosas 3:21.

Indi pagbag-obag-uha ang pagsulundan. “Dapat nga ang inyo ‘Huo’ mangin huo, ang inyo ‘Indi,’ indi.”—Mateo 5:37.

Mangin rasonable. “Disiplinahon ko ikaw sa nagakaigo nga paagi.”—Jeremias 30:11. *

^ par. 21 Para sa dugang nga impormasyon, kadtui ang jw.org/hil. Buksi ang PANUDLO SANG BIBLIA > MAG-ASAWA KAG GINIKANAN, kag makita mo diri ang mga artikulo subong sang “Pagdisiplina sa Kabataan,” “Ano ang Himuon Mo Kon Magmaoy ang Imo Bata?,” “Itudlo sa Imo Kabataan ang Husto nga Moral,” kag “Paano Mo Disiplinahon ang Imo Tin-edyer nga Bata?.”

Magtuon sing Dugang Pa

Paano Mangin Malipayon ang Imo Pamilya?

Luyag ni Jehova, ang malipayon nga Dios, nga mangin malipayon ang mga pamilya. Hibalua ang praktikal nga mga laygay sang Biblia para sa mga bana, asawa, ginikanan, kag kabataan.