Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Pebrero 2015

 INTERBYU | ANTONIO DELLA GATTA

Kon Ngaa Naghalin sa Simbahan ang Isa ka Pari

Kon Ngaa Naghalin sa Simbahan ang Isa ka Pari

PAGKATAPOS sang iya pag-eskwela sa Roma sing siam ka tuig, gin-ordenahan nga mangin pari si Antonio Della Gatta sang 1969. Sang ulihi, nag-alagad sia subong rector, ukon pangulo sang seminaryo malapit sa Naples sa Italya. Sang didto na sia, pagkatapos sang maid-id nga pagtuon kag pagpamalandong, nakahinakop sia nga ang Katoliko nga relihion wala nabase sa Biblia. Ginsugid niya sa Magmata! kon paano niya nakilala ang Dios.

Palihug sugiri kami tuhoy sa imo kabuhi sang bata ka pa.

Natawo ako sa Italya sang 1943. Nagdaku ako upod sa akon mga utod sa gamay nga baryo diin ang akon amay isa ka mangunguma kag isa ka panday. Ginpadaku kami sang amon mga ginikanan nga debotado nga mga Katoliko.

Ngaa gusto mo magpari?

Sang bata pa ako, nanamian gid ako mamati sa mga pari sa simbahan. Naluyagan ko gid ang ila mga tingog kag ang ila matahom nga mga ritwal. Gani luyag ko gid nga magpari. Sang 13 anyos ako, gindala ako ni Nanay sa boarding school nga nagahanda sa mga bata nga lalaki para sa palaabuton, mas abanse nga pagtuon para sa pagkapari.

Sang ginhanas kamo, gintun-an man bala ninyo ang Biblia?

Wala gid. Sang 15 anyos ako, ginhatagan ako sang isa sa akon mga manunudlo sing kopya sang Ebanghelyo—ang kasaysayan sang kabuhi kag pagministeryo ni Jesus—kag ginbasa ko ini sing madamo nga beses. Sang 18 anyos ako, nagkadto ako sa Roma para mag-eskwela sa mga unibersidad, nga ginadumalahan mismo sang papa. Nagtuon ako sing Latin, Griego, history, pilosopiya, sikolohiya, kag teolohiya. Bisan pa ginakutlo namon ang mga bersikulo sa Biblia kag nagapamati kami kon ginabasa ang Biblia sa sermon kada Domingo, wala gid namon gintun-an ang Biblia.

Sang nangin rector ka, nagatudlo ka man bala?

Ang akon gid obra amo ang pagdumala. Pero may ginatudluan man ako nga mga klase tuhoy sa mga kasuguan sang Second Vatican Council.

Ngaa nagduhaduha ka sa simbahan?

Tatlo ka butang ang nagtublag sa akon. Nagaentra sa pulitika ang simbahan. Ginakunsinti sini ang malain nga mga buhat sang mga klero kag mga parokyano. Kag daw indi husto ang pila ka panudlo sang Katoliko. Halimbawa, kon ang Dios gugma, ngaa ginasilutan niya tubtob san-o ang napatay nga mga tawo? Isa pa, gusto bala sang Dios nga sulitsuliton naton ang aton pangamuyo sing ginatos ka beses nga may ginauyatan nga rosarito? *

Ano ang ginhimo mo?

Samtang nagatulo ang mga luha sa akon mga mata, nangamuyo ako kag nangabay nga tuytuyan ako. Nagbakal ako sing Jerusalem Bible sang mga Katoliko nga bag-o lang ginbalhag sadto sa Italyano kag ginbasa ko ini. Dayon, isa ka Domingo sang aga sang ginasab-it ko ang akon sutana pagkatapos sang Misa, may duha ka lalaki nga nag-abot sa seminaryo. Nagpakilala sila sa akon nga mga Saksi ni Jehova sila. Sobra sa isa ka oras nga naghambalanay kami tuhoy sa  Biblia kag kon ano ang ginasiling sini nga mga tanda sang matuod nga relihion.

Ano ang impresyon mo sa imo mga bisita?

Nagdayaw gid ako sa ila pagtuo kag sa ila kaabtik sa pagbukas sang mga teksto sa Katoliko nga edisyon sang Biblia. Dayon ang isa pa ka Saksi nga si Mario nagsugod sa pagduaw sa akon. Pasensioso sia kag matutom—kada Sabado sang aga, nagaulan man ukon nagainit, naga-doorbell sia sa seminaryo kada alas nuebe.

Ano ang pagtamod sang iban nga mga pari sa sini nga mga pagbisita?

Gin-agda ko sila nga magbuylog sa amon paghambalanay, pero indi sila interesado sa pagtuon sing Biblia. Apang, naluyagan ko gid ini. Gin-apresyar ko ang akon mga natun-an, subong sang kon ngaa ginatugutan sang Dios ang kalautan kag pag-antos—isa ka butang nga madugay ko na nga ginapaligban.

Ginpalas-ay ka bala sang imo mga superyor sa imo pagtuon sing Biblia?

Sang 1975, pila ka beses ako nga nagbisita sa Roma agod ipaathag ang akon mga pagtamod. Gintinguhaan sang akon mga superyor nga bag-uhon ang akon panghunahuna pero wala gid sila maggamit sing Biblia. Sang ulihi, sang Enero 9, 1976, nagpadala ako sing sulat sa Roma nga wala ko na ginakabig ang akon kaugalingon nga Katoliko. Pagligad sang duha ka adlaw, naghalin ako sa seminaryo kag nagsakay sa tren agod sa una nga tion matambong ako sa miting sang mga Saksi ni Jehova nga isa gali ka asembleya nga gintambungan sang madamo nga kongregasyon. Lain gid ang nakita ko didto sangsa naandan ko! Ang tagsa ka Saksi may Biblia kag nagapamati gid sila samtang nagapaathag ang mga humalambal sing nanuhaytuhay nga topiko.

Ano ang reaksion sang imo pamilya sa sini?

Ginpamatukan ako sang kalabanan sa ila. Apang, nabalitaan ko nga ang akon manghod nagatuon man gali upod sa mga Saksi sa Lombardy, isa ka rehiyon sa naaminhan nga Italya. Nakigkita ako sa iya kag ginbuligan ako sang mga Saksi didto nga makakita sing obra kag sing ilistaran. Sang hingapusan sina nga tuig, nabawtismuhan ako subong isa sa mga Saksi ni Jehova.

Nabatyagan ko gid nga suod ako sa Dios

Naghinulsol ka bala?

Wala gid! Nabatyagan ko gid nga suod ako sa Dios kay ang akon nahibaluan tuhoy sa iya nabase sa Biblia, indi sa pilosopiya ukon tradisyon sang simbahan. Kag may kompiansa ako sa pagtudlo sa iban sing sinsero.

^ par. 13 Maathag ang sabat sang Biblia sa sini kag sa madamo pa nga mga pamangkot. Buksi ang PANUDLO SANG BIBLIA > SABAT SA MGA PAMANGKOT SA BIBLIA.