Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! AGOSTO 2014

 BULIG PARA SA PAMILYA | GINIKANAN

Paano Mangindi?

Paano Mangindi?

NGAA MABUDLAY?

Ginapilit gid sang imo bata ang iya gusto. Kon mangindi ka, ginatestingan gid niya ang imo pasensia. Bisan ano ang himuon mo ukon ihambal, indi ini makapahipos sa iya. Kag sa ulihi mapasugot ka na lang. Gani, ang imo indi nangin huo na.

Matun-an mo kon paano mangindi. Pero, binagbinaga anay ang pila ka butang parte sa pagpangindi.

ANO ANG DAPAT MO MAHIBALUAN?

Indi mapintas ang pagpangindi. Ang pila ka ginikanan mahimo nga indi ugyon sa sini. Mahimo magsiling sila nga dapat paathagan mo ang imo bata, mangatarungan sa iya, ukon hatagan pa gani sia sing pililian. Pero likawi gid nga mangindi, siling nila, kay basi maakig ang imo bata.

Matuod, kon mangindi ka, mahimo magsunggod ang imo bata. Pero, makatuon sia sing importante nga leksion sa sini—nga ang matuod, indi tanan nga gusto naton makuha naton. Pero kon magpasugot ka lang pirme, mabuhinan ang iya pagtahod sa imo awtoridad kag hunahunaon niya nga makuha niya ang tanan nga gusto niya kon mag-ingos lang sia. Sa ulihi, maugot na sa imo ang imo bata. Isa pa, paano tahuron sang bata ang iya ginikanan kon nagapasugot lang ini dayon?

Ang pagpangindi magahanda sa imo bata para sa pagkapamatan-on kag pagkaadulto. Ginatudlo sini sa iya ang mga kaayuhan sang pagkontrol sang kaugalingon. Gani kon piliton sia sa ulihi nga magdroga ukon makigsekso, indi sia dali magpasugot.

Ginahanas man sini ang imo bata sa pagkaadulto. “Ang matuod, indi naton [mga adulto] makuha pirme ang gusto naton,” siling ni Dr. David Walsh. “Indi naton mabuligan ang aton bata kon paanaron naton sila nga makuha nila pirme ang ila gusto.” *

 ANO ANG MAHIMO MO?

Magpokus sa imo tulumuron. Luyag mo nga ang imo bata makatindog sa iya kaugalingon, makakontrol sang iya emosyon, kag mangin madinalag-on nga adulto. Pero kabaliskaran ang matabo kon ihatag mo ang tanan niya nga gusto. Ang Biblia nagasiling nga kon ang isa “ginapagustuhan mo lang . . . halin sang bata pa siya, sa ulihi mangin problema mo siya.” (Hulubaton 29:21, Ang Pulong sang Dios) Gani ang pagpangindi epektibo nga paagi sang pagdisiplina. Magabulig ini sa iya sa baylo nga makahalit.—Prinsipio sa Biblia: Hulubaton 19:18.

Kon mangindi ka, mangin malig-on. Indi pareho ang inyo awtoridad sang imo bata. Gani indi kinahanglan nga baisan pa ninyo ang imo pagpangindi, nga daw kinahanglan mo pa ini paaprobahan sa iya. Siempre, samtang nagadaku ang mga bata, kinahanglan may ‘ikasarang sila sa paghantop nga nahanas nga makilala ang maayo kag malain.’ (Hebreo 5:14) Gani indi sayop nga mangatarungan sa bata. Pero likawi ang daw wala katapusan nga pagpaathag kon ngaa nangindi ka. Samtang nagalawig ang imo pagpaathag, pensaron sang imo bata nga daw wala ka sing desisyon kundi daw ginapapili mo sia.—Prinsipio sa Biblia: Efeso 6:1.

Indi pagbag-uha ang imo desisyon. Mahimo testingan sang imo bata ang imo panindugan paagi sa pag-ingos ukon pagpakitluoy. Kon matabo ini sa inyo balay, ano ang himuon mo? “Magpalayo sa imo bata,” panugda sang libro nga Loving Without Spoiling. “Silinga sia, ‘Kon gusto mo mag-ingos, bahala ka. Pero indi ko gusto mabatian ini. Didto ka sa imo kuarto. Mag-ingos ka asta gusto mo.’” Sa primero, basi mabudlayan ka nga himuon ini kag mabudlayan ang imo bata nga batunon ini. Pero mahimo mabaton niya ini sa ulihi kon makita niya nga ginatuman mo ang imo ginhambal.—Prinsipio sa Biblia: Santiago 5:12.

Indi mangindi para lang ipakita nga may awtoridad ka sa imo bata

Mangin makatarunganon. Indi mangindi para lang ipakita nga may awtoridad ka sa imo bata. Sa baylo, ‘ipakita ang imo pagkamakatarunganon.’ (Filipos 4:5) May mga tion nga mahimo ka magpasugot sa iya gusto basta indi ini bangod sa iya pag-ingos kundi bangod rasonable man ang iya ginapangayo.—Prinsipio sa Biblia: Colosas 3:21.

^ par. 10 Halin sa libro nga No: Why Kids—of All Ages—Need to Hear It and Ways Parents Can Say It.

Magtuon sing Dugang Pa

Ano ang Himuon Mo Kon Magmaoy ang Imo Bata?

Ano ang himuon mo kon nagamaoy ang imo bata? Mabuligan ka sang mga prinsipio sa Biblia nga maatubang ini nga problema.

Kon Paano Tudluan ang mga Bata nga Mangin Makonsiderasyon

Binagbinaga ang tatlo ka butang para mabuligan mo ang imo kabataan nga indi mangin maiyaiyahon.

Pagtudlo sa mga Bata nga Magtuman

Pirme bala kamo nagakontrahanay sang imo bata kon sin-o ang masunod kag ang imo bata ang daw pirme nagadaug? Ang lima ka panugda sa mga ginikanan makabulig.