Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

MAGMATA! HULYO 2014

 TOPIKO SA KOBER | KON MAY TRAHEDYA NGA MATABO—PAANO MO INI ATUBANGON?

Pagkapatay sang Pinalangga

Pagkapatay sang Pinalangga

Si Ronaldo, nga taga-Brazil, naaksidente sa salakyan upod sa iya pamilya. Lima ang napatay, lakip ang iya ginikanan. “Duha ka bulan na ako sa ospital sang ginsugid sa akon nga napatay sila sa aksidente,” siling niya.

“Sang primero, indi ako makapati nga wala na sila. Paano natabo nga napatay sila tanan? Sang napamatud-an ko nga matuod ini, naglalain gid ako. Masakit katama. Sang masunod nga mga adlaw, nagbatyag ako nga daw wala na pulos ang akon kabuhi kon wala sila. Adlaw-adlaw ako nga nagahibi sa sulod sang binulan! Ginabasol ko ang akon kaugalingon kay iban ang ginpadrayb ko sang salakyan. Kon ako na lang tani ang nagdrayb, basi buhi pa sila subong.

“Disiseis na ka tuig ang nagligad, kag nagbalik na sa normal ang kabuhi ko. Pero, indi gihapon madula sa pensar ko ang natabo sa ila.”

PAG-ATUBANG SA TRAHEDYA

Indi pagpunggi ang imo kasubo. Ang Biblia nagasiling nga may “tion sa paghibi.” (Manugwali 3:1, 4) Si Ronaldo nagsiling: “Kon gusto ko maghibi, nagahibi gid ako. Wala man sing matabo kon punggan ko ini, nagatawhay pa gani pamatyag ko pagkatapos.” Siempre, indi pareho ang paagi sang tanan nga tawo sa pagpakita sing kasubo. Gani kon wala mo man ginapakita ang imo kasubo, wala ini nagakahulugan nga ginapunggan mo ang imo emosyon ukon dapat mo piliton nga maghibi.

Likawi nga ipain ang imo kaugalingon. (Hulubaton 18:1) “Ginapanikasugan ko nga indi pag-ipain ang akon kaugalingon,” siling ni Ronaldo. “Kon may magbisita sa akon, ginaabiabi ko sila. Ginapautwas ko man sa akon asawa kag suod nga mga abyan ang akon ginabatyag.”

Mangin kalmado kon may magsiling sang masakit nga mga tinaga. Mahimo may magsiling nga “Mas maayo gani ina.” Si Ronaldo naghinumdom, “May mga komento nga imbes makalugpay makasakit pa.” Sa baylo nga pamensaron ang masakit nga mga komento, sunda ang laygay sang Biblia: “Dili ka man magsapak sa tanan nga polong nga ginapamolong.”—Manugwali 7:21.

Hibalua ang kamatuoran parte sa kahimtangan sang mga patay. Si Ronaldo nagsiling: “Ginapakita sang Biblia sa Manugwali 9:5 nga ang mga patay wala nagaantos, gani matawhay ang akon pensar. Ginatudlo man sang Biblia nga may pagkabanhaw sa mga patay. Gani ginapensar ko na lang nga nagbakasyon lang ang akon mga pinalangga nga napatay.”—Binuhatan 24:15.

Nahibaluan mo bala? Ginapromisa sang Biblia nga magaabot ang tion nga ‘lamunon sang Dios sing dayon ang kamatayon.’ *Isaias 25:8.

^ par. 11 Para sa dugang nga impormasyon, basaha ang kapitulo 7 sang libro nga Ano Gid ang Ginatudlo sang Biblia? Mabasa man ini online sa www.jw.org/hil.

Magtuon sing Dugang Pa

ANG LALANTAWAN

Nagakatabo ang Malain sa Maayo nga mga Tawo—Ngaa?

Ginapakita sang Biblia ang tatlo ka panguna nga kabangdanan sang pag-antos sang tawo.

ANG LALANTAWAN

Ngaa Ginapaantos Ako sang Dios?

Maathag nga ginasiling sang Biblia nga indi ang Dios ang balasulon sa pag-antos. Kon amo, ngaa nagaantos ang mga inosente?