Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! HULYO 2014

 TOPIKO SA KOBER | KON MAY TRAHEDYA NGA MATABO—PAANO MO INI ATUBANGON?

Pagkadula sang Pagkabutang

Pagkadula sang Pagkabutang

Sang Biernes, Marso 11, 2011, naglinog sing 9.0 magnitude sa Japan, nga nagpatay sang sobra 15,000 ka tawo kag sobra $200 bilyones (U.S.) nga kahalitan. Sang nabatian sang 32 anyos nga si Kei ang paandam parte sa nagahilapit nga tsunami, nagkadto sia sa mas mataas nga lugar. “Pagkaaga, nagbalik ako sa balay para kuhaon ang bisan ano nga puede ko makuha,” siling niya, “pero naanod ang tanan ko nga pagkabutang, pati ang akon apartment. Pundasyon na lang ang nabilin.

“Madugay man kag nabaton ko nga indi lang pila ka butang ang nadula sa akon, kundi ang tanan—ang akon salakyan; mga kompyuter nga ginagamit ko sa trabaho; mga lamesa, pulungkuan, kag sofa para sa mga bisita; ang akon keyboard, gitara, ukulele, kag plawta; mga kagamitan ko sa pagpintura nga mga watercolor, oil, kag pastel; ang tanan ko nga painting kag drowing.”

PAG-ATUBANG SA TRAHEDYA

Magpokus sa mga butang nga ara pa sa imo kag indi sa mga nadula sa imo. Ang Biblia nagasiling: “Bisan pa may kabuganaan ang isa ka tawo ang iya kabuhi indi nagagikan sa mga butang nga ginapanag-iyahan niya.” (Lucas 12:15) Naghinumdom si Kei: “Sang primero,” siling niya, “naghimo ako sang listahan sang tanan nga gusto ko, pero ginapadumdom lang sini ang tanan nga nadula sa akon. Gani, ginlista ko na lang ang mga butang nga kinahanglan ko gid, kag kon matigayon ko ini, gina-update ko ang akon listahan. Nakabulig ini sa akon nga makapadayon sa akon pagkabuhi.”

Sa baylo nga pensaron lang ang kaugalingon, gamita ang imo eksperiensia para lugpayan ang iban. “Madamo ako sang nabaton nga bulig halin sa gobierno kag sa mga abyan, pero bangod pirme lang ako ginahatagan, nadula ang pagtahod ko sa akon kaugalingon,” siling ni Kei. “Dayon nadumduman ko ang ginsiling sang Binuhatan 20:35 nga ‘may kapin nga kalipay sa paghatag sangsa pagbaton.’ Bangod wala man ako sing mahatag nga materyal, ginpalig-on ko ang iban nga biktima sang kalamidad. Daku ang nabulig sini sa akon.”

Mangamuyo sa Dios sing praktikal nga kaalam para maatubang ang imo kahimtangan. Nagsalig si Kei sa ginasiling sang Biblia nga ang Dios ‘magatalupangod sang pangamuyo sang mga makaluluoy.’ (Salmo 102:17) Puede mo man ina himuon.

Nahibaluan mo bala? Gintagna sang Biblia nga magaabot ang tion nga wala na sing magakabalaka nga madulaan sang pagkabutang bangod sa kalamidad. *Isaias 65:21-23.

^ par. 9 Para mahibaluan ang katuyuan sang Dios sa duta, basaha ang kapitulo 3 sang libro nga Ano Gid ang Ginatudlo sang Biblia? nga ginhimo sang mga Saksi ni Jehova. Mabasa man ini online sa www.jw.org/hil.

Magtuon sing Dugang Pa

Silot Bala Halin sa Dios ang mga Kalamidad?

Binagbinaga ang tatlo ka ebidensia nga nagapamatuod nga ang isa ka hitabo halin sa Dios nga narekord sa Biblia.