Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Hulyo 2014

 ANG PAGTAMOD SANG BIBLIA

Relihion

Relihion

Ngaa kadamo gid sang relihion?

“Ginapasapayanan ninyo ang kasuguan sang Dios, apang estrikto nga ginasunod ang mga tradisyon sang mga tawo.”—Marcos 7:8.

ANG GINASILING SANG BIBLIA

Normal sa tawo nga magbatyag sing “espirituwal nga kinahanglanon,” kag mapun-an ini paagi sa pagsimba sa Dios. (Mateo 5:3) Bangod sini, nagtukod sila sang madamo nga relihion nga base sa ideya sang mga tawo imbes nga sa Dios.

Halimbawa, ang Biblia nagasiling parte sa mga miembro sang isa ka grupo sang relihion sang unang siglo: “May kakugi sila sa Dios; apang indi suno sa sibu nga ihibalo; kay wala sila magpasakop sa pagkamatarong sang Dios bangod wala nila mahibaluan ang pagkamatarong sang Dios kundi nagatinguha sa pagtukod sang ila kaugalingon nga pagkamatarong.” (Roma 10:2, 3) Subong, madamo man nga relihion ang ‘nagatudlo sang mga sugo sang tawo subong mga doktrina.’ —Marcos 7:7.

 Kinahanglan bala nga mangin miembro sang isa ka relihion?

“Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon.”—Hebreo 10:24, 25.

ANG GINASILING SANG BIBLIA

Gingamit sa Hebreo 10:25 ang pinamulong nga “wala ginapabay-an ang aton pagtilipon.” Ginapakita sini nga gusto sang Dios nga magtipon ang mga tawo bilang organisado nga grupo para magsimba sa iya. Pero kinahanglan bala nga may kaugalingon nga interpretasyon ang kada miembro kon sin-o ang Dios kag kon ano ang mga ginapatuman Niya? Indi. Ginsambit sang Biblia nga ang mga sumilimba nga ginakahamut-an sang Dios ‘dapat maghambal nga may paghilisugot’ kag ‘maghiusa sing nagakaigo sa isa ka hunahuna kag sa isa ka painuino.’ (1 Corinto 1:10) Organisahon sila subong mga kongregasyon kag makita sa ila ang ‘gugma sa bug-os nga paghiliutod’ sa bilog nga kalibutan. (1 Pedro 2:17; 1 Corinto 11:16) Ina nga paghiusa kag organisado nga pagsimba kinahanglanon para mapahamut-an ang Dios.

Paano makilala ang matuod nga relihion?

“Paagi sa sini ang tanan makahibalo nga kamo mga disipulo ko, kon nagahigugmaanay kamo.”—Juan 13:35.

ANG GINASILING SANG BIBLIA

Para ilaragway kon paano makilala ang mga miembro sang matuod nga relihion, ang Biblia nagasiling: “Paagi sa ila mga bunga makilala ninyo sila. Ang mga tawo wala nagapamupo sang mga ubas gikan sa tunukon nga mga tanom ukon sang mga igos gikan sa mga gamhon, indi bala?” (Mateo 7:16) Indi kinahanglan nga mangin eksperto ka sa tanom para makilal-an ang kinatuhayan sang puno sang igos sa gamhon. Sing kaanggid, indi man kinahanglan nga mangin eksperto ka sa relihion para makilal-an ang kinatuhayan sang matuod sa butig. Ano ang pila ka bunga, ukon palatandaan, sang matuod nga relihion?

  • Ang matuod nga relihion nagatudlo sang kamatuoran sang Pulong sang Dios, ang Biblia. (Juan 4:24; 17:17) Wala ini nabase sa pilosopiya sang tawo.

  • Ang matuod nga relihion nagabulig sa mga tawo nga makilala ang Dios, lakip ang ngalan niya nga Jehova.—Juan 17:3, 6.

  • Ang matuod nga relihion nagasuporta sa Ginharian sang Dios, indi sa mga gobierno sang tawo, nga amo ang lamang paglaum sang mga tawo.—Mateo 10:7; 24:14.

  • Ang matuod nga relihion nagapakita sang nagasakripisyo nga gugma. (Juan 13:35) Ginatudluan sini ang mga tawo nga tahuron ang tanan nga rasa, gamiton ang tion kag pagkabutang para buligan ang iban, kag indi mag-entra sa mga inaway sang mga pungsod.—Miqueas 4:1-4.

  • Ang matuod nga relihion ginakabuhi, indi lang basta ritwal ukon pormalidad. Ginaaplikar sang mga miembro sini ang ila ginabantala.—Roma 2:21; 1 Juan 3:18.

Ang mga Saksi ni Jehova nga naghimo sini nga magasin, nagatinguha nga padunggan ang Dios sa ila panghambal kag paggawi. Palihug tilawi nga magtambong sa pagtilipon sa Kingdom Hall para makita mo ini mismo.

Magtuon sing Dugang Pa

MITING

Ano ang Ginahimo sa Kingdom Hall?

Tilawi nga magsulod para makita mo mismo.

PIRME GINAPAMANGKOT

Mga Cristiano Bala ang Mga Saksi ni Jehova?

Palihug binagbinaga kon paano kami nangin tuhay sa mga relihion nga ginatawag man Cristiano.