Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Hulyo 2014

 MGA LUGAR KAG MGA TAWO

Pagbisita sa Ireland

Pagbisita sa Ireland

ANG “Emerald Isle” ginahuman sang duha ka pungsod: ang independiente nga Republic of Ireland nga mas daku, kag ang mas gamay nga Northern Ireland, nga bahin sang United Kingdom.

Ang Giant’s Causeway

Emerald Isle ang tawag sa Ireland bangod sa berde nga mga kabukiran sini kay pirme nagaulan. Ginpatahom pa gid ini sang mga linaw kag suba, pati na sang mga bungyod kag mga bukid malapit sa dagat.

Balay nga kugon ang atop

Grabe nga kabudlayan ang naagyan sang mga Irish. Halimbawa, ginabulubanta nga sugod sang mga 1845 asta 1851, mga isa ka milyon ang napatay sa gutom kag balatian sang napierde ang patatas. Para malikawan ang kapigaduhon, madamo ang nagsaylo sa iban nga pungsod pareho sang Australia, Britanya, Canada, kag Estados Unidos. Subong, mga 35 milyones ka Amerikano ang may katigulangan nga naghalin sa Ireland.

Kilala nga mainabyanon kag maabiabihon ang mga Irish. Paborito nila ang pagpangabayo kag ang mga hampang nga cricket, rugby, soccer (nga ginatawag nila nga football), kag Gaelic football (nga uluanggid sa soccer). Masami nga mga babayi ang nagahampang sang sport nga camogie, nga uluanggid sa field hockey.

 Palaistorya man ang mga taga-Ireland kag mahuyugon sa musika. Bantog sa bilog nga kalibutan ang Irish step dance. Ginatiso sang mga manugsaot ang ila lawas samtang madasig kag sibu nga ginahulag ang ila mga tiil.

Grupo sang Irish nga musikero

Sobra isa ka gatos ka tuig na ang mga Saksi ni Jehova sa Ireland. Subong, sobra 6,000 ka Saksi ang nagaistar didto kag mapisan nga nagatudlo parte sa Biblia.

Ang tradisyonal nga musika sang mga taga-Ireland ginagamitan sang mga instrumento pareho sang ginapakita sa ubos, halin sa wala pa tuo: Celtic harp, Irish bagpipe, byolin, accordion, tin whistle, kag bodhran (tambor)

NAHIBALUAN MO BALA?

Ang Giant’s Causeway, sa naaminhan nga baybayon sang Northern Ireland, ginahuman sang linibo ka haligi nga bato nga basalt nga resulta sang madugay na nga lava nga nagtig-a sang nagsimpon sa tubig sang dagat.