Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Hulyo 2014

Pagbantay sa Kalibutan

Pagbantay sa Kalibutan

Estados Unidos

Sang 2012, may mga tion nga 14.5 porsiento sang mga panimalay sa Estados Unidos—nga 49 milyones ka tawo—ang “indi sigurado kon makatigayon sila, ukon indi gid gani makatigayon, sang bastante nga pagkaon para sa kinahanglanon sang bug-os nga pamilya,” suno sa estadistika sang Department of Agriculture.

Espanya

Sa isa ka pagtuon sa mga estudyante sa unibersidad, mga 56 porsiento sang mga babayi kag 41 porsiento sang mga lalaki ang nag-aku nga nagapatuyang sa pag-inom, nga suno sa sini nga pagtuon, nagainom sila sang indi magkubos sa walo ka baso nga alak (para sa mga lalaki) ukon anom ka baso (para sa mga babayi) sing duludiretso.

Dagat Pasipiko

Nasapwan sang mga sientipiko nga nagkuha sang sampol sa kadalumon nga mga 11,000 metros sa Mariana Trench nga madamo sang bakterya kag iban pa nga mikrobyo ang nagakabuhi didto—bisan pa sang tuman nga kadulom, mabaskog nga pressure, kag halos nagayelo nga temperatura. Ginapatihan sadto nga pila lang ang mabuhi sa amo sina kadalumon.

United Arab Emirates

Para punggan ang pagdamo sang kaso sang sobra nga katambukon, nagtanyag sining karon lang ang gobierno sang Dubai sa mga pumuluyo sini sang isa ka gramo nga bulawan, nga sina nga tion mga $45 (U.S.), kabaylo sang kada kilo nga mabuhin sa ila kabug-aton. Para makuha ang bulawan, dapat magpalista ang mga pumuluyo kag magbuhin sang kabug-aton nga indi magnubo sa duha ka kilo sa bulan sang Ramadan.