Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! HULYO 2014

 BULIG PARA SA PAMILYA | PAMATAN-ON

Paano Magpakita sing Maayo nga Batasan sa Pag-text?

Paano Magpakita sing Maayo nga Batasan sa Pag-text?

NGAA MABUDLAY?

Nagaistorya ka sa imo abyan sang may nag-text. Ano ang himuon mo?

  1. Basahon ang text samtang nagaistorya sa imo abyan.

  2. Magsiling sang “excuse me” sa imo abyan kag basahon ang text.

  3. Indi pagsapakon ang text kag padayunon ang pag-istorya sa imo abyan.

Importante bala kon ano ang pilion mo? Huo!

ANO ANG DAPAT MO MAHIBALUAN?

Ang pag-text sa abyan samtang nagapakig-istorya sa iban daw pareho sa paghampang sang imo paborito nga sport nga wala nagasunod sa mga pagsulundan sini. ‘Pero mga abyan ko man sila,’ mahimo isiling mo. Amo gani nga mas kinahanglan mo magpakita sing maayo nga batasan. Indi man kinahanglan nga mangin estrikto ka gid ukon pormal. Pero tandai ang kamatuoran: Kon wala ka sing pagtahod sa imo mga abyan, sa ulihi madulaan ka sing abyan.

Ngaa? Bangod indi gusto sang mga tawo nga indi sila pagtahuron. Ang pamatan-on nga si Beth * nagsiling, “Naugot ako kon dugaydugay tan-aw sang iya cellphone ang akon abyan samtang nagaistoryahanay kami. Daw ginapabatyag niya sa akon nga indi sia interesado sa ginahambal ko!” Asta san-o ayhan mapasensiahan ni Beth ina nga klase sang abyan?

Tan-awa liwat ang eksena sa “Ngaa Mabudlay?” kag binagbinaga ang batasan mo sa paggamit sang cellphone. Diin nga opsyon ang pilion mo? Mahimo nga ginahunahuna mo nga indi maayo ang Opsyon A. Kamusta naman ang Opsyon B kag C? Malain bala kon untaton mo ang pag-istoryahanay para lang basahon ang text? Ukon malain bala kon indi mo pagsapakon ang text kag padayunon ang pag-istoryahanay?

Ginapakita sini nga may mga tion nga mabudlay pat-uron ang husto nga himuon. Pero makabulig ang Biblia. Nagasiling ini: “Ang luyag ninyo nga himuon sang mga tawo sa inyo, himua man ninyo ini sa ila.” (Lucas 6:31) Maaplikar man ini sa pag-text. Paano?

 ANO ANG MAHIMO MO?

Mag-text lang sa husto nga tion. “Kon kaisa, makabaton pa ako sang text bisan gab-i na katama,” siling sang pamatan-on nga si Richard. “Indi man ini importante, kag naisturbo pa ang pagtulog ko!” Pamangkuta ang imo kaugalingon, ‘Naga-text bala ako sa iban sa tion nga mahimo nagapahuway na sila?’—Prinsipio sa Biblia: Manugwali 3:1.

Bantayi ang imo tono sang paghambal. Nalakip sa komunikasyon ang mga tinaga, tono sang tingog, ekspresyon sang nawong, kag panghulag. Pero, kalabanan sa sini indi mapakita sa text. Gani ano ang puede mo himuon? “Mangin matinahuron,” siling sang pamatan-on nga si Jasmine. “Mamangkot sing, ‘Kamusta ka?’ kag maggamit sang mga tinaga pareho sang ‘palihug’ kag ‘salamat.’”—Prinsipio sa Biblia: Colosas 4:6.

Mangin mahinantupon. Tan-awa liwat ang eksena sa “Ngaa Mabudlay?” Kon may ginapaabot ka nga importante nga text, mahimo kinahanglan mo maglisensia sa imo kaistorya. Pero sa masami, makahulat man ang text. “Ang cellphone mo ara gihapon asta matapos ang inyo pag-istoryahanay sang imo abyan,” siling sang 17 anyos nga si Amy, “pero ang imo abyan mahimo maghalin kon unahon mo ang pag-text.” Gamita man ang paghantop kon ara ka sa pagtilipon. “Indi magsige text,” siling sang 18 anyos nga si Jane. “Kon sige ka text, daw ginasilingan mo ang mga tawo nga, ‘Indi ko kamo gusto makaupod; mas maayo pa kon wala ko diri.’”

Mamensar anay antes mag-send. Posible ayhan nga lain ang paghangop sa imo text? Makabulig ayhan ang mga emoticon para mapakita ang imo matuod nga ginabatyag? “Kon nagalahog ka lang, butangi ini sang smiley,” siling sang 21 anyos nga si Amber. “Mahimo masakitan ang mga tawo—kag mahimo pa ini halinan sang away—kon seriosohon nila ang isa ka lahog.”—Prinsipio sa Biblia: Hulubaton 12:18.

Maathag nga importante gid ang imo batasan sa paggamit sang cellphone!

Binagbinaga ini: Ang maayo nga batasan nabase sa gugma. Paano mo ini mapakita? Ang Biblia nagasiling: “Ang gugma mapinasensiahon kag mainayuhon. Ang gugma indi maimon, wala ini nagapabugal, wala nagapahambog, wala nagagawi sing di-nagakaigo, wala nagapangita sang kaugalingon nga kaayuhan, indi ini maakigon.” (1 Corinto 13:4, 5) Ano nga aspekto sang gugma ang kinahanglan mo pauswagon?

^ par. 11 Gin-islan ang iban nga ngalan sa sini nga artikulo.