Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! MAYO 2014

Nagasinggit ang Kaalam—Mabatian Mo Bala Ini?

Nagasinggit ang Kaalam—Mabatian Mo Bala Ini?

“Wala bala nagasinggit ang kaalam, kag nagapagowa sang iya tingug ang paghangup? Sa putokputokan sang mataas nga mga duug sa luyo sang dalan, sa ginkitaan sang mga banas nagatindug sia; . . . sa pagsulud sa mga ganhaan nagasinggit sia sing mabaskug.”HULUBATON 8:1-3.

IMPORTANTE gid ang kaalam. Kon wala ini, pirme kita makasala. Pero diin makita ang matuod nga kaalam? Ginahunahuna sang manunulat sang tulun-an sang Hulubaton ang indi matupungan nga kaalam sang aton Manunuga. Pero, ang Iya kaalam puede matigayon sang tanan paagi sa isa ka pinasahi nga libro, ang Biblia. Binagbinaga ang masunod:

  • Ang Biblia amo ang “pinakalapnag nga napanagtag nga libro sa kasaysayan,” siling sang The World Book Encyclopedia. “Gin-translate ini sing madamo nga beses, kag sa mas madamo nga lenguahe, sangsa bisan ano nga libro.” Ang bug-os nga Biblia ukon ang bahin sini mabasa na karon sa mga 2,600 ka lenguahe, kag sobra 90 porsiento sang katawhan ang may ari sini.

  • Ang kaalam padayon man nga ‘nagasinggit sing mabaskug’ sa literal nga paagi. Sa Mateo 24:14, mabasa naton: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan” sang presente nga kalibutan.

Ina nga “maayong balita” isa ka matuod nga kaalam kay ginapadaku sini ang maayo nga solusyon sang Dios sa problema sang katawhan—ang Iya Ginharian. Ang Ginharian isa ka gobierno sang Dios nga magagahom sa bilog nga duta—isa ka kalibutan, isa ka gobierno. (Daniel 2:44; 7:13, 14) Gani, nangamuyo si Jesucristo: “Magkari ang imo ginharian. Matuman ang imo kabubut-on sa duta, subong sang sa langit.”—Mateo 6:9, 10.

Para sa mga Saksi ni Jehova, isa ka pribilehiyo nga isugid ang Ginharian sang Dios sa 239 ka kadutaan! Matuod gid nga ang kaalam—ang kaalam sang Dios—“nagasinggit” bisan “sa mga ganhaan.” Mabatian mo bala ini?