Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! ABRIL 2014

 GINDESINYO BALA INI?

Ang Pakpak sang Alibangbang

Ang Pakpak sang Alibangbang

ANG pakpak sang alibangbang tuman kaluya nga bisan mayab-ukan ukon mabasa lang ini diutay, mabudlayan na ini sa paglupad. Amo nga dapat pirme matinlo kag mamala ang pakpak sini. Ano ang sekreto sang alibangbang?

Ang pakpak sang alibangbang may tuman ka gagmay nga himbis nga nagasampawsampaw

Binagbinaga: Natukiban sang mga researcher sa Ohio State University nga nagtuon sa alibangbang nga Giant Blue Morpho (Morpho didius) nga bisan pa ang pakpak sini mahining tan-awon, ginatabunan gali ini sing tuman ka gagmay nga himbis nga nagasampawsampaw pareho sang atop. Bisan ang magamay nga lak-ang sini nga mga himbis makapadalhay sang higko ukon tubig. Ginatun-an sang mga engineer kon paano nila mailog ang pagkahuman sang pakpak agod maghimo sing moderno nga mga putos sang mga kagamitan para sa industriya kag medisina nga indi dali mahigkuan kag mabasa.

Ang pakpak sang alibangbang isa pa gid ka halimbawa kon paano ginailog sang siensia ang mga desinyo sang buhi nga mga tinuga. “Madamo gid sing makatilingala nga desinyo ang kinaugali, halin sa magagmay asta sa dalagku, nga nag-impluwensia sa katawhan sa sulod sang madamo nga siglo,” siling sang researcher nga si Bharat Bhushan.

Ano sa banta mo? Ang pakpak bala sang alibangbang resulta sang ebolusyon? Ukon gindesinyo ini?