Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! ABRIL 2014

 ANG PAGTAMOD SANG BIBLIA

Diskriminasyon sa Rasa

Diskriminasyon sa Rasa

Ano ang ginhalinan sang mga rasa sang tawo?

“Ang lalaki nagtawag sang ngalan sang iya asawa Eva, bangud nga iloy sia sang tanan nga nagakabuhi.”Genesis 3:20.

ANG GINASILING SANG MGA EKSPERTO

Ang United Nations Educational, Scientific and Cultural Organization (UNESCO) nagsiling nga “ang tanan nga tawo nalakip sa isa lang ka espesyi kag may isa lang ka ginhalinan.”—Declaration on Race and Racial Prejudice, 1978.

ANG GINASILING SANG BIBLIA

Nagtuga ang Dios sang duha ka tawo, sanday Adan kag Eva, kag ginsilingan sila: “Magmabungahon kag magbuad, kag magtugub sang duta kag magpakaagalon sa iya.” (Genesis 1:28) Gani, sanday Adan kag Eva amo ang nangin amay kag iloy sang tanan nga katawhan. Sang ulihi, sang natabo ang anaw nga nagpatay sa halos tanan nga populasyon sang duta, may naluwas nga apat ka mag-asawa—sanday Noe kag iya asawa upod ang iya tatlo ka anak nga lalaki kag ila mga asawa. Ginatudlo sang Biblia nga tanan kita naghalin sa mga anak ni Noe.—Genesis 9:18, 19.

 Ang iban bala nga rasa mas labaw sangsa iban?

“Ginhimo [sang Dios] gikan sa isa ka tawo ang tagsa ka pungsod sang mga tawo, agod magpuyo sa bug-os nga kadaygan sang duta.”—Binuhatan 17:26.

ANG GINASILING SANG IBAN

Sang ika-20 nga siglo, madamo ang nagbaton sang mga ideya nga mas labaw ang iban nga rasa sangsa iban. Halimbawa, ang Nazi nagsiling nga mas labaw ang ila rasa bangod sang ila mga gene. Sa pihak nga bahin, ang dokumento sang UNESCO nga ginsambit kaina nagkilala “sang paghiusa sang rasa kag sang pag-alalangay sang indibiduwal kag tanan nga tawo.”

ANG GINASILING SANG BIBLIA

Ang Binuhatan 10:34, 35 nagasiling: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.” Bangod sini, wala sing may makasiling nga may labaw nga rasa.

Nagpakita si Jesus sang halimbawa nga dapat sundon sang mga Cristiano sang nagsiling sia: “Tanan kamo mag-ulutod.” (Mateo 23:8) Nagpangamuyo sia nga maghiusa ang iya mga sumulunod kag “mahiusa sila sing himpit,” kag indi magbahinbahin ukon magpainpain.—Juan 17:20-23; 1 Corinto 1:10.

Madula pa bala ang diskriminasyon sa rasa?

“Sa olihing mga adlaw nga ang bukid sang balay sang GINOO tukuron sa putokputokan sang kabukiran, . . . kag magaduguk sa iya ang tanan nga pungsud.”—Isaias 2:2.

ANG GINAHUNAHUNA SANG IBAN

Bangod sang nagakatabo nga diskriminasyon sa rasa, ang mga tawo sa madamo nga pungsod nagapamangkot kon may nahimo gid man bala para madula ini. Ang iban nagahinakop nga indi gid matabo ang pag-alalangay sang rasa.

ANG GINASILING SANG BIBLIA

Indi pagpasugtan sang Dios nga magpadayon tubtob san-o ang diskriminasyon sa rasa. Sa idalom sang iya Ginharian, ang mga tawo “gikan sa tanan nga pungsod kag tribo kag katawhan kag hambal” magaalagad sa iya sing nahiusa kag nagapakita sing matuod nga gugma sa ila isigkatawo. (Bugna 7:9) Ang Ginharian sang Dios indi kondisyon sang tagipusuon, kundi isa ini ka gobierno nga magadala sing pagbag-o sa duta, ang duog nga gintuyo sang Dios nga ang tanan nga tawo magapuyo nga wala sing diskriminasyon sa rasa. *

^ par. 15 Para sa dugang nga impormasyon, basaha ang kapitulo 3 sang libro nga Ano Gid ang Ginatudlo sang Biblia? nga ginhimo sang mga Saksi ni Jehova.

Magtuon sing Dugang Pa

Kalibutan nga Wala sing Pagpasulabi—San-o?

Ginapakita sang mga eksperiensia kon paano ginabuligan sang Biblia ang mga tawo nga madula ang pagpasulabi. San-o ini madula sing bug-os?