Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! PEBRERO 2014

 ANG PAGTAMOD SANG BIBLIA

Espiritismo

Espiritismo

Sayop bala nga makig-angot sa mga patay?

“Dili kamo magliso sa manugpagowa sang mga espiritu . . . sa pagpadagta paagi sa ila.”—Levitico 19:31.

ANG GINASILING SANG MGA TAWO

Gusto gid masigurado sang mga tawo nga wala nagaantos ang ila napatay nga mga hinigugma. Gani nagasiling sila: “Ngaa indi naton sia pagpakig-angutan paagi sa espiritista? Para makasigurado kita kag mangin malinong ang aton hunahuna.”

ANG GINASILING SANG BIBLIA

Maathag gid ang ginasiling sang Biblia parte sa pagpakig-angot sa mga patay, nga lapnag nga ginahimo sadto. Halimbawa, nagasiling ang Kasuguan ni Jehova nga Dios sa Israel: “Manginwalay makita sa imo nga bisan sin-ong . . . manugpagowa sa mga espiritu, ukon . . . manugpamangkot sa mga napatay. Kay ang bisan sin-o nga nagahimo sining mga butang kangil-aran sa GINOO.” (Deuteronomio 18:10-12) Ginasiling man sang Biblia nga ang mga nagahimo sang bisan ano nga sahi sang espiritismo “indi makapanubli sang ginharian sang Dios.”—Galacia 5:19-21.

 Makapasilabot bala ang mga patay sa mga buhi?

“Ang buhi nakahibalo nga mapatay sila, apang ang patay wala makahibalo sang bisan ano.” —Manugwali 9:5.

ANG GINASILING SANG MGA TAWO

Madamo ang nagapati nga ang mga patay nagakabuhi gihapon. Amo nga nagatinguha sila nga makig-angot sa mga patay, mahimo agod makakuha sing impormasyon ukon agod makasigurado nga nagakabuhi sila sing malinong.

ANG GINASILING SANG BIBLIA

“Ang buhi nakahibalo nga mapatay sila, apang ang patay wala makahibalo sang bisan ano. . . . Ang ila gugma kag ang ila dumut kag ang ila kahisa [ang tanan nga nabatyagan nila sang buhi pa sila] nawala sing dugay na.” (Manugwali 9:5, 6) Ginatudlo sang Biblia nga ang mga patay, patay gid! Indi sila makahunahuna, makapanghikot, ukon bisan gani makasimba sa Dios. “Ang mga minatay wala nagadayaw sa GINOO, ukon ang bisan sin-o nga nagapanaug sa kalinong,” siling sang Salmo 115:17.

Indi bala nga kon kaisa sibu man ang ginasiling sang mga espiritista?

“Tungod sa mga buhi [nga mga tawo] magapamangkot bala sila sa mga patay?” —Isaias 8:19.

ANG GINASILING SANG MGA TAWO

Nagasiling ang iban nga ang mga espiritista makasugid sang mga impormasyon nga ang mga patay kag ang ila pamilya ukon mga abyan lang nila ang mahimo makahibalo.

ANG GINASILING SANG BIBLIA

Ang kapitulo 28 sang 1 Samuel nagasugid parte sa pagsupak sang indi matutom nga hari nga si Saul sa sugo sang Dios nga indi magpangayo sing bulig sa mga espiritista. Nangayo sia sing bulig sa isa ka babayi nga nakig-angot kuno sa patay nga alagad sang Dios nga si Samuel. Pero nakig-angot gid man bala sia kay Samuel? Wala! Ang matuod, nakig-angot sia sa isa ka impostor, ang isa nga nagpakunokuno nga si Samuel.

Ang impostor isa ka malaut nga espiritu nga sakop sang “amay sang kabutigan” nga si Satanas. (Juan 8:44) Ngaa ginapasanyog sang malaut nga mga espiritu, ukon mga demonyo, nga ang mga patay nagakabuhi gihapon? Bangod luyag nila nga pakamalauton ang Dios kag pakalainon ang iya Pulong, ang Biblia.—2 Timoteo 3:16.

Ginapakita bala sini nga wala na sing paglaum ang mga patay? Indi gid! Nagasaad ang Biblia nga banhawon sa palaabuton ang mga daw ‘nagakatulog’ sa lulubngan. * (Juan 11:11-13; Binuhatan 24:15) Pero sa karon, makasalig kita nga ang aton napatay nga mga hinigugma wala gid nagaantos.

^ par. 16 Ang kapitulo 7 sang libro nga Ano Gid ang Ginatudlo sang Biblia? may tig-ulo nga “Matuod Gid nga Paglaum Para sa Imo Napatay nga mga Hinigugma.”

Magtuon sing Dugang Pa

Makontrol Bala sang Yawa ang mga Tawo?

Paano ginaimpluwensiahan sang Yawa ang mga tawo, kag paano mo malikawan ang iya mga siod?