Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NOBIEMBRE 2013

Pagbantay sa Kalibutan

Pagbantay sa Kalibutan

Germany

Sang 2012, ang isa sa pinakamataas nga korte sa Germany nagmando nga ang pormal nga nagbiya sa simbahan nga ginakilala nga pangpubliko nga korporasyon indi makapabilin nga miembro sina nga relihion. Ang mga Katoliko nga nagbiya kag wala na nagabayad sang buhis para sa simbahan, pero nagapangangkon gihapon nga Katoliko, mahimo dumilian nga magpangalawat, magkumpisar, makatigayon sang posisyon sa simbahan, kag bisan gani misahan kon mapatay.

Bilog nga Kalibutan

Ginapakita sang isa ka pagtuon sa mga relihion sa bilog nga kalibutan nga ang mga nagapangangkon nga “wala sing relihion,” pero indi man atiesta, nagadamo na sing 1.1 bilyones. Ikatlo sila sa may pinakadamo nga miembro. Nagapanguna ang Cristianismo nga may 2.2 bilyones kag dayon ang Islam nga may 1.6 bilyones. Ikap-at ang Hinduismo nga halos 1 ka bilyon.

Japan

Nagsiling ang mga sientipiko nga ang pagdayaw nagapahulag sa bahin sang utok nga nagapahalipay sa aton. Daw ginasuportahan sini ang ideya nga ang pagdayaw isa ka maayo nga paagi para mapahulag ang mga tawo nga mag-uswag.

Bolivia

Sang hingapusan sang 2012, naghimo sing sensus ang Bolivia. Agod mangin sibu ini, ginmanduan ang mga tawo didto nga indi maghalin sa ila balay sina nga adlaw. Dugang pa, gindumilian man sila nga magbiyahe sang ila salakyan kag mag-inom, kag ginsirhan ang mga dulunan.

Italya

Ginasiling sang isa ka surbe nga sa kabilugan, 15 minutos kada adlaw ang ginahinguyang sang mga Italyano para maghampang sa ila kabataan. “Isa lang sa lima sa ila ang nagahunahuna nga may matun-an ang mga kabataan sa paghampang,” siling sang La Repubblica. Paagi sa paghampang, ginabuligan sang mga ginikanan ang ila kabataan nga mapauswag ang ila imahinasyon kag “kompiansa,” siling ni Andrea Angiolino, isa ka propesyonal nga manugdesinyo sang mga board game.