Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NOBIEMBRE 2013

May Ara Ka Bala sing “Dalayon nga Piesta”?

May Ara Ka Bala sing “Dalayon nga Piesta”?

“Ang tanan nga adlaw sang napiotan malaut, apang ang malipayon sing tagiposoon may dalayon nga piesta.” Hulubaton 15:15.

ANO ang buot silingon sini? Nagapatuhoy ini sa mental kag emosyonal nga kahimtangan sang isa. Ang mga “napiotan” pirme lang negatibo ang ginahunahuna, ang pagtamod nga ‘nagapalain’ ukon nagapasubo sang iya adlaw. Sa kabaliskaran, ang isa nga “malipayon sing tagiposoon,” positibo sing panghunahuna, isa ka panimuot nga nagapalipay, nga nagahatag sa iya sing “dalayon nga piesta.”

Tanan kita may mga problema nga nagadula sang aton kalipay. Pero may mahimo kita para mangin malipayon bisan sa mabudlay nga kahimtangan. Binagbinaga ang ginasiling sang Biblia.

  • Indi pagtuguti nga mabug-atan ka sang tuman nga kabalaka kon ano ang matabo buas. Nagsiling si Jesucristo: “Indi kamo magpalibog parte sa buwas, kay ang buwas may kaugalingon nga palaligban. Indi kinahanglan nga dugangan pa ninyo ang palaligban nga nagaabot sa kada adlaw.”—Mateo 6:34, APD.

  • Pamensara ang maayo nga mga butang nga natabo sa imo. Ang matuod, kon nasubuan ka, puede ka maghimo sing listahan sang maayo nga mga butang nga natabo sa imo kag pamensaran ini. Indi pagpamensara pirme ang imo mga sala kag malain nga nahimo. Magtuon gikan sa sini kag pabay-i na lang. Iluga ang drayber nga nagapasiplat sa rearview mirror pero wala nagapokus sa sini. Tandai man nga “may pagpatawad sa [Dios].”—Salmo 130:4.

  • Kon ginapabug-atan ka sing tuman nga kabalaka, isugid ini sa isa nga mahimo makapahalipay sa imo. Ang “kabug-atan” nagahimo sa tagipusuon nga ‘magkuko, apang ang maayong pulong nagapasadya sini,’ siling sang Hulubaton 12:25. Inang ‘maayong pulong’ mahimo maghalin sa miembro sang pamilya ukon sa ginasaligan nga abyan, ang isa nga indi negatibo kundi “nagahigugma sa tanan nga tion.”—Hulubaton 17:17.

Ang maalamon nga mga hulubaton sa Biblia nakabulig sa madamo nga mangin malipayon sa kabuhi, bisan pa mabudlay ang kahimtangan. Kabay nga makabulig man ini sa imo.