Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! OKTUBRE 2013

 ANG PAGTAMOD SANG BIBLIA

Depresyon

Depresyon

Ano ang depresyon?

“Naluyahan ako kag nagasioktut sing tama; nagakalisud ako sa bug-os nga adlaw.”—Salmo 38:6.

ANG GINASILING SANG MGA RESEARCHER

Mahimo kita masubuan kon kaisa, pero ang depresyon isa ka malubha nga balatian nga nagapadayon kag nagasablag sa hilikuton sang isa. Talalupangdon nga indi tanan nga eksperto nagaugyon kon ano ang “normal” nga kasubo kag kon ano ang “depresyon.” Pero, makasiling kita nga ang pila nagaeksperiensia sang negatibo gid nga balatyagon, kag kon kaisa upod ang pagbatyag sang pagkawalay pulos kag sobra nga kabalaka.

ANG GINASILING SANG BIBLIA

Ang Biblia nagasugid parte sa madamo nga lalaki kag babayi nga nakabatyag sang negatibo nga emosyon. Halimbawa, nagbatyag si Ana sang “kapaitan sa kalag”—nagapatuhoy ini sa “sobra nga kasubo” ukon “sobra nga kabalaka.” (1 Samuel 1:10) Sang isa ka higayon si propeta Elias nasubuan gid amo nga nangamuyo sia sa Dios nga kuhaon na lang ang iya kabuhi!—1 Hari 19:4.

Ginsilingan ang mga Cristiano sang unang siglo nga “lipayon ang mga kalag nga ginapung-awan.” (1 Tesalonica 5:14) Suno sa isa ka reperensia, ang termino nga “kalag nga ginapung-awan” mahimo nagapatuhoy sa sadtong “mga ginabug-atan sang mga problema sa kabuhi.” Maathag nga bisan ang mga matutom nga lalaki kag babayi sa Biblia nagbatyag man sing depresyon kon kaisa.

 Sala bala sang isa kon may depresyon sia?

“Ang tanan nga tinuga padayon nga nagaugayong sing tingob kag ginasakitan sing tingob.”—Roma 8:22.

ANG GINASILING SANG BIBLIA

Ginatudlo sang Biblia nga ang balatian resulta sang pagrebelde sang una nga mag-asawa. Halimbawa, ang Salmo 51:5 nagasiling: “Sa kalautan natawo ako, kag sa sala ginpanamkon ako sang akon iloy.” Kag ang Roma 5:12 nagapaathag nga “paagi sa isa ka tawo nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.” Bangod nakapanubli kita sang pagkadihimpit halin kay Adan, tanan kita mahimo magbalatian, sa pisikal ukon emosyon. Gani, siling sang Biblia, “ang tanan nga tinuga padayon nga nagaugayong sing tingob.” (Roma 8:22) Pero nagatanyag man ang Biblia sang paglaum nga indi mahatag sang bisan sin-o nga doktor—ang saad sang Dios nga isa ka mahidaiton nga bag-o nga kalibutan nga wala na sing balatian ukon sablag, lakip ang depresyon.—Bugna 21:4.

Paano mo malandas ang depresyon?

“Ang GINOO malapit sa mga boong sing tagiposoon, kag nagaluwas sang mga mahinulsulon sa espiritu.”—Salmo 34:18.

NGAA IMPORTANTE INI?

Indi mo pirme makontrol ang imo kahimtangan, kag mahimo maapektuhan ka kon kaisa sang malain nga mga hitabo. (Manugwali 9:11, 12) Pero, may mahimo ka nga praktikal nga mga tikang para mabatuan ang negatibo nga mga balatyagon.

ANG GINASILING SANG BIBLIA

Ginakilala sang Biblia nga ang mga nagamasakit nagakinahanglan sang doktor. (Lucas 5:31) Gani kon may malubha ka nga problema sa emosyon, wala sing malain kon magpadoktor ka. Ginapadaku man sang Biblia nga importante ang pangamuyo. Halimbawa, ang Salmo 55:22 nagasiling: “Itungtung sa GINOO ang imo lulan, kag sia magaalay-ay sa imo; indi sia magtugut nga malingkang ang matarung.” Ang pangamuyo indi lamang paagi para mag-ayo ang imo pamatyag, kundi pagpakig-istorya ini kay Jehova nga Dios, nga “malapit sa mga boong sing tagiposoon.”—Salmo 34:18.

Makabulig man kon isugid mo ang imo problema sa imo suod nga abyan. (Hulubaton 17:17) “Mainayuhon nga ginpasugid ako sang akon masigkatumuluo parte sa akon depresyon,” siling ni Daniela nga isa ka Saksi ni Jehova. “Bisan pa pila ka tuig ko na nga ginalikawan, narealisar ko nga amo gali ini ang kinahanglanon ko. Nakibot gid ako kay naumpawan ako sang nahimo ko ini.”

Magtuon sing Dugang Pa

Ano ang Dapat Mo Mahibaluan Parte sa Balatian sa Hunahuna?

Siam ka paagi nga makabulig sa imo nga maatubang ang balatian sa hunahuna.