Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

MAGMATA! OKTUBRE 2013

 GINDESINYO BALA INI?

Ang Tumalagsahon nga Kaanting sang Katydid

Ang Tumalagsahon nga Kaanting sang Katydid

ANG katydid sa Bagatnan nga Amerika (Copiphora gorgonensis) may dulunggan nga wala pa isa ka milimetro, pero halos pareho ini sang pagpanghikot sa dulunggan sang tawo. Mabal-an sini ang lainlain nga klase sang tunog bisan pa sa malayo. Halimbawa, mahibaluan sini ang kinalain sang tunog sang isa pa ka katydid kag ang tunog sang kabog nga nagapangita sang kalan-on.

DULUNGGAN SANG KATYDID

Binagbinaga: Ang dulunggan sang katydid makita sa duha ka prante nga tiil sini. Pareho sa dulunggan sang tawo, ginatipon sini, ginabag-o, kag ginabinagbinag ang tunog. Pero may nakita ang mga sientipiko nga pinasahi nga organo sa dulunggan sini—puno ini sang likido kag daw nagahabok nga balloon. Ini nga organo nga ginatawag acoustic vesicle, nagapanghikot pareho sang cochlea sang mga mamalya pero tuman ini ka gamay. Ang acoustic vesicle amo ang rason kon ngaa tumalagsahon ang kaanting sang katydid.

Si Professor Daniel Robert, sang University of Bristol’s School of Biological Sciences sa United Kingdom, nagsiling nga makabulig ini sa mga engineer nga “maghimo sing mga hearing device nga gin-ilog sa kinaugali nga mas magagmay pa kag mas maanting.” Nagapati ang mga researcher nga makaamot man ini sa mas bag-o nga teknolohiya sa ultrasonic engineering, lakip ang mga imaging system sa mga ospital.

Ano sa banta mo? Ang tumalagsahon bala nga kaanting sang katydid resulta sang ebolusyon? Ukon gindesinyo ini?