Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Oktubre 2013

 INTERBYU | DAVEY LOOS

Ginpaathag sang Biochemist ang Iya Pagtuo

Ginpaathag sang Biochemist ang Iya Pagtuo

Si Dr. Davey Loos isa ka biochemist sa Belgium. Nagduhaduha sia anay kon bala may Manunuga gid, kag nagapati sia sa ebolusyon. Sang ulihi, nagbag-o ang iya panghunahuna. Ngaa ginbag-o niya ang iya pagpati parte sa ginhalinan sang kabuhi? Gin-interbyu sia sang Magmata! parte sa iya propesyon kag pagtuo.

Paano ka nangin researcher sa siensia?

Sang kolehiyo ako, ginpili ko nga tun-an ang chemistry. Nawili gid ako sa mga protina kag mga nucleic acid, nga amo ang pinakakomplikado nga molekula sa aton planeta. Sang ulihi, nagpalibog ako sa pagpanghikot sang pila ka molekula sa silak sang adlaw.

Nagapati ka bala sa Dios?

Huo, sang bata pa ako. Pero sang ulihi, sang nag-eskwela ako sa Catholic University of Leuven, gintudluan ako nga naghalin sa natural nga proseso ang desinyo sang buhi nga mga butang. Ginpasibod sang mga propesor ang pila ka proseso. Eksperiensiado sila nga mga sientipiko, gani ginpatihan ko ang ila ginsiling. Sang ulihi, nabudlayan na ako magpati nga may Dios.

Ngaa ginbinagbinag mo liwat ang ginhalinan sang kabuhi?

Sang 1999, nagkitaay kami sang akon abyan sang nagaeskwela ako nga nangin Saksi ni Jehova, kag nagtambong ako sa ila mga pagtilipon. Sina man nga tion, ginduaw ako sang isa sang mga Saksi ni Jehova kag ginhatagan sang libro nga Is There a Creator Who Cares About You? *

Ano ang masiling mo sa libro?

Nagdayaw gid ako sa mga research nga ginpakita sini. Naghunahuna ako kon bala ginpaathag gid sang ebolusyon ang mga desinyo sa kinaugali.

Ano nga mga desinyo sa kinaugali ang nagpadayaw gid sa imo?

Ang akon obra nagalakip sang pagtuon sa desinyo sang pila ka molekula sa cyanobacteria nga nagaistar sa kadagatan. Amo ini ang mga mikroorganismo nga  wala nagadepende sa iban nga buhi nga butang para makakaon. Ang iban nga researcher nagahunahuna nga amo ini ang pinakauna nga buhi nga butang sa aton planeta. Ginagamit sini ang enerhiya halin sa adlaw paagi sa komplikado katama nga proseso sa kemikal nga indi gihapon mahangpan, para himuon nga pagkaon ang tubig kag carbon dioxide. Natingala man ako kon paano matipon sing maayo sang cyanobacteria ang kasanag.

Ang mga dahon nagagamit man sang silak sang adlaw para makahimo sing pagkaon. Ti, ano pa gid ang pinasahi sa sini nga bakterya?

Samtang nagadalom ang dagat, nagadiutay ang kasanag. Gani mahimo nga ang cyanobacteria nga nagaistar didto nagatipon bisan sang magagmay nga enerhiya halin sa kasanag nga ila makita, kag ginahimo nila ini paagi sa isa ka pinasahi gid nga antena. Ginasaylo ang natipon nga enerhiya sa hilimuan sang pagkaon nga halos 100 porsiento ka epektibo. Ang desinyo sining pagtipon sang enerhiya nagpainteres sa mga manughimo sang solar panel. Siempre, puerte kalayo sang diperensia sang solar panel kon ikumparar sa ginahimo sang bakterya.

Tungod sina, ano ang imo mahinakop?

Nahunahuna ko ang mga engineer nga nagatinguha nga ilugon ang makatilingala nga mga desinyo sa buhi nga mga tinuga, kag nakahinakop ako nga ang kabuhi gindesinyo man sang Dios

Nahunahuna ko ang mga engineer nga nagatinguha nga ilugon ang makatilingala nga mga desinyo sa buhi nga mga tinuga, kag nakahinakop ako nga ang kabuhi gindesinyo man sang Dios. Pero ang akon pagtuo wala lamang nabase sa natun-an ko sa siensia. Nabase man ini sa pagtuon sing maayo sa Biblia.

Ano ang nagkumbinsi sa imo nga ang Biblia naghalin sa Dios?

Ang isa sini amo ang detalyado nga katumanan sang mga tagna sa Biblia. Halimbawa, ginatos ka tuig nga abanse nga ginlaragway ni Isaias ang madamo nga detalye parte sa kamatayon kag paglubong kay Jesus. Nahibaluan naton nga ini nga tagna ginsulat antes sang kamatayon ni Jesus bangod ang Isaiah Scroll nga nakit-an sa Qumran, ginkopya mga ginatos ka tuig antes mabun-ag si Jesus.

Ina nga tagna nagasiling: “Ginhimo nila ang iya lulubngan upud sa malauton, kag upud sa manggaranon nga tawo sa iya kamatayon.” (Isaias 53:9, 12) Talalupangdon nga ginpatay si Jesus upod sa mga kriminal pero ginlubong sia sa lulubngan sang manggaranon nga pamilya. Isa lang ini ka halimbawa sang madamo nga natuman nga tagna nga nagkumbinsi sa akon nga ang Biblia halin gid sa Dios. (2 Timoteo 3:16) Sang ulihi nangin Saksi ni Jehova ako.

Ngaa nalipay ka nga mangin Saksi ni Jehova?

Wala ginapanghiwala sang amon pagpati ang mga kamatuoran sa siensia

Wala ginapanghiwala sang amon pagpati ang mga kamatuoran sa siensia. Kag ang mga prinsipio nga nagagiya sa amon nabase gid sa Biblia. Bilang isa ka Saksi ni Jehova, nalipay ako nga magpaambit sang makapaumpaw nga mensahe sa iban kag buligan sila nga mahibaluan ang mga sabat sa ila mga pamangkot.

^ par. 9 Ginhimo sang mga Saksi ni Jehova.