Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Septiembre 2013

 BULIG PARA SA PAMILYA | MAG-ASAWA

Paano Magpatawad?

Paano Magpatawad?

NGAA MABUDLAY?

Kon magbaisay kamo sang imo tiayon, masami nga ginaungkat ninyo ang nagligad nga mga problema nga kuntani nasolbar na. Ano ang problema? Mahimo nga ang isa ukon kamo nga duha indi makahibalo magpatawad.

Mahimo mo ini matun-an. Pero, hibalua anay kon ngaa nabudlayan magpatawad ang mag-asawa sa isa kag isa.

NGAA NAGAKATABO INI?

Awtoridad. Ang pila ka bana ukon asawa wala nagapatawad para indi madula ang ila awtoridad sa ila tiayon. Kag kon may problema, ginabalik nila ang nagligad para kontrolon kag impluwensiahan ang ila tiayon.

Dumot. Indi dali madula ang pinalian sang nagligad nga mga sala. Ang isa ka tiayon mahimo magsiling ‘ginapatawad ko na ikaw’ pero nagadumot gihapon tungod sang natabo. Mahimo pa gani sia magpensar nga magbalos.

Kapaslawan. Ang iban nagapati nga kon magpakasal sila mangin malipayon ang ila pagkabuhi. Amo nga kon may indi paghangpanay, indi nila mabaton ang kahimtangan kag nagapalibog sila kon ngaa indi pareho ang pagtamod nila sang iya tiayon. Tungod sang indi husto nga pagpaabot, madali makit-an sang isa ang sayop sang iya tiayon kag nabudlayan sia magpatawad.

Indi paghangpanay. Madamo nga tiayon ang wala nagapatawad bangod sayop ang ila pagtamod sa sini. Halimbawa:

Kon patawaron ko sia, daw ginapakadiutay ko ang iya sala.

Kon patawaron ko sia, dapat kalimtan ko na ang natabo.

Kon patawaron ko sia, daw pareho lang nga ginatugutan ko sia nga abusuhan ako liwat.

Ang matuod wala sa sini ang kahulugan sang pagpatawad. Pero, indi madali ang pagpatawad ilabi na sa mag-asawa.

 ANO ANG MAHIMO MO?

Hibalua kon ano ang nalakip sa pagpatawad. Sa Biblia, kon kaisa ang tinaga nga pagpatawad nagakahulugan sang “pabay-an na lang.” Gani indi buot silingon nga kon magpatawad ka, dapat kalimtan mo na ang natabo ukon pakadiutayon ang sala. Kon kaisa nagakahulugan ini nga kinahanglan pabay-an na lang ang natabo, para sa imo kaayuhan kag sang inyo pag-asawahay.

Dumduma ang resulta kon indi ka magpatawad. Ang pila ka eksperto nagasiling nga ang pagdumot mahimo magresulta sa madamo nga pisikal kag emosyonal nga problema, lakip ang depresyon kag alta-presyon, magluwas pa sa halit sini sa inyo pag-asawahay. May maayo gid nga rason ang Biblia sang nagsiling ini: “Mangin mainayuhon sa isa kag isa, mapinalanggaon nga may kaawa, nga nagapatawad sing kinabubut-on sa isa kag isa.”—Efeso 4:32.

Dumduma ang mga benepisyo kon magpatawad ka. Ang pagpatawad makabulig sa imo kag sa imo tiayon nga saligan ang isa kag isa sa baylo nga “isipon” ang mga sala. Makabulig ini sa imo nga malikawan ang pagdumot kag mapalambo ang gugma.—Prinsipio sa Biblia: Colosas 3:13.

Mangin realistiko. Mangin mas mahapos sa imo ang pagpatawad kon ginabaton mo ang imo tiayon sa kon ano sia, bisan pa sang iya mga kakulangan. “Kon magpokus ka sa wala mo makuha, madali mo lang malimtan ang ara,” siling sang libro nga Fighting for Your Marriage. “Diin sa sini ang luyag mo himuon?” Dumduma nga wala sing perpekto, lakip na ikaw.—Prinsipio sa Biblia: Santiago 3:2.

Mangin rasonable. Kon may mahambal ukon mahimo liwat ang imo tiayon nga makapasakit sa imo, pamangkuta ang imo kaugalingon: ‘Serioso gid bala ang iya ginhimo? Kinahanglan gid bala nga mangayo sia sang pasaylo, ukon basi puede ko man lang ini kalimtan?’—Prinsipio sa Biblia: 1 Pedro 4:8.

Kon kinahanglan, istoryahi ninyo ang problema. Ipaathag sa iya sing kalmado kon ngaa nasakitan ka kag ngaa amo sina ang imo ginbatyag. Indi sia pagbasula ukon paghambali nga sala sia. Kay kon amo sini ang imo himuon, depensahan lang niya ang iya kaugalingon. Kundi, ipaathag sa iya kon ano ang epekto sang iya ginhimo sa imo.