Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! SEPTIEMBRE 2013

 INTERBYU | CÉLINE GRANOLLERAS

Ginpaathag sang Espesyalista sa Kidney ang Iya Pagtuo

Ginpaathag sang Espesyalista sa Kidney ang Iya Pagtuo

Si Dr. Céline Granolleras espesyalista sa mga balatian sa kidney sa France. Pagkatapos sang 20 ka tuig nga pagkadoktor, napamatud-an niya nga may Manunuga gid nga nagaulikid sa aton. Gin-interbyu sia sang Magmata! parte sa iya propesyon kag pagtuo.

Sugiri kami sang imo nagligad.

Nagsaylo ang amon pamilya sa France halin sa Espanya sang siam ako ka tuig. Katoliko ang akon mga ginikanan, pero nag-untat ako sa pagpati sa Dios sang 16 anyos ako. Para sa akon, wala sing labot sa kamatuoran ang relihion. Kon may mamangkot sa akon sadto kon paano nagsugod ang kabuhi kon wala sang Dios, nagasabat ako, “Subong indi pa ina mapaathag sang mga sientipiko, pero magaabot ang adlaw nga mapaathag gid nila ina.”

Ngaa gintun-an mo ang mga balatian sa kidney?

Nag-eskwela ako sang pagkadoktor sa Montpellier, France. Ginsilingan ako sang isa ka propesor kon gusto ko tun-an ang nephrology, isa ka pagtuon parte sa kidney. Nalakip diri ang pag-research kag pag-atipan sa mga pasyente. Amo gid ini ang gusto ko. Sang 1990, nakigbahin ako sa pag-research sa paggamit sang recombinant erythropoietin (EPO) para kontrolon ang pula nga mga selula sa dugo sa aton mga tul-an. Sa sina nga tion, ginakabig ini nga bag-o nga patag sang research.

Ano ang nakabulig sa imo nga maghunahuna parte sa Dios?

Sang 1979, ang akon bana nga si Floréal, nagtuon sang Biblia upod sa mga Saksi ni Jehova. Pero indi ako interesado. Sang bata pa ako, natak-an na ako sa relihion. Pero, nangin Saksi ang akon bana kag kabataan, kag sang ulihi ang kalabanan sang amon mga abyan mga Saksi.  Ang isa sa ila amo si Patricia, nga nagsiling sa akon nga tilawan ko nga mangamuyo. “Kon wala gid man sang isa nga yara sa langit, wala man sang madula sa imo,” siling niya. “Pero kon may ara, makita mo kon ano ang matabo.” Pagligad sang tinuig, nagpalibog ako kon ano ang katuyuan sang kabuhi, kag nadumduman ko ang ginsiling ni Patricia. Gani, nangamuyo ako para mahangpan ini.

Ngaa nagpalibog ka kon ano ang katuyuan sang kabuhi?

Ang pag-atake sang mga terorista sa World Trade Center sa New York nagpahunahuna sa akon kon ngaa madamo gid sang kalautan. Nakahunahuna ako: ‘Ang pagkapanatiko sa relihion nagabutang sang aton palaabuton sa katalagman. Pero napalibutan ako sang mga Saksi ni Jehova nga mahidaiton. Indi sila panatiko. Ginasunod nila ang Biblia. Siguro dapat ko hibaluon ang ginasiling sini.’ Gani ginbasa ko ini.

Bilang doktor, mabudlay bala patihan nga may Manunuga?

Indi. Nagadayaw gid ako sa pagkakomplikado sang desinyo sang aton lawas. Halimbawa, makatilingala gid ang paagi sang aton kidney sa pagkontrol sang kadamuon sang pula nga mga selula sa aton dugo.

Ngaa nasiling mo ina?

Narealisar ko nga ang Dios lang ang makadesinyo sang pareho sini

Siguro nahibaluan mo man nga ang pula nga mga selula sa dugo nagadala sang oxygen. Kon madulaan ka sang madamo nga dugo ukon kon ara ka sa mataas nga lugar, makulangan sang oxygen ang imo lawas. May mga oxygen sensor ang aton kidney. Kon mahibaluan sini nga kulang ang oxygen sa dugo, ginapadamo sini ang EPO sing linibo ka pilo. Ang EPO nagasugo sa bone marrow nga magpadamo sang pula nga mga selula sang dugo, nga magadala sang mas madamo nga oxygen. Makadalayaw gid ini! Daw indi ako makapati nga gintun-an ko ini nga proseso sing napulo ka tuig antes ko narealisar nga ang Dios lang ang makadesinyo sang pareho sini.

Ano ang imo pagtamod sa Biblia?

Madamo na nga libro parte sa kasaysayan kag bantog nga nobela ang akon nabasa, pero narealisar ko nga lain gid ang Biblia. Praktikal ang mga laygay sini kag sigurado nga indi lang tawo ang ginhalinan sini. Nanamian gid ako sa rekord parte kay Jesus. Isa gid sia ka matuod nga persona. May balatyagon sia kag may mga abyan. Bangod indi ko gusto maggamit sang mga publikasyon sang mga Saksi ni Jehova, nag-research ako sa mga ensiklopedia kag iban pa nga reperensia kon may mga pamangkot ako.

Ano ang imo gin-research?

Nag-research ako parte sa kasaysayan . . . Sang ulihi, napamatud-ad ko nga ini nga tagna sa Biblia natabo gid suno sa tion

Ang isa nga nagpainteres sa akon amo ang tagna sang Biblia parte sa petsa sang pagbawtismo kay Jesus. Ginapakita gid sini ang tion nga magaligad sugod sa ika-20 nga tuig sang paggahom sang hari sang Persia nga si Artajerjes kag sang tuig nga ginpresentar ni Jesus ang iya kaugalingon subong Mesias. * Nanamian gid ako mag-research—bahin ini sang akon obra. Gani nag-research ako parte sa kasaysayan para pat-uron ang petsa sang paggahom ni Artajerjes kag sang pagministeryo ni Jesus. Sang ulihi, napamatud-an ko nga ini nga tagna sa Biblia natabo gid suno sa tion kag gintuytuyan gid ini sang Dios.

^ par. 19 Tan-awa ang libro nga Ano Gid ang Ginatudlo sang Biblia? nga ginhimo sang mga Saksi ni Jehova, pahina 197-199.