Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! AGOSTO 2013

Dapat Mo Bala Patihan ang Trinidad?

Dapat Mo Bala Patihan ang Trinidad?

Sobra duha ka bilyon ang nagapangangkon nga Cristiano. Madamo sa ila ang miembro sang mga simbahan nga nagatudlo sing Trinidad—ang doktrina nga ang Amay, ang Anak, kag ang balaan nga espiritu natingob sa isa lang ka Dios. Paano nangin isa ka opisyal nga doktrina ang Trinidad? Kag ang mas importante, ginatudlo bala ini sang Biblia?

NATAPOS ang Biblia sang una nga siglo C.E. Ang panudlo nga nagdul-ong sa doktrina sang Trinidad nagsugod sang 325 C.E.—sobra duha ka gatos ka tuig sang ulihi—sa konsilyo sa siudad sang Nicaea sa Asia Minor, nga amo karon ang Iznik, Turkey. Suno sa New Catholic Encyclopedia, ang kredo nga halin sa Konsilyo sang Nicaea amo ang naghatag sing opisyal nga kahulugan sa ‘Cristiano nga doktrina’ nga nagalakip sang kahulugan sang Dios kag Cristo. Pero ngaa kinahanglan hatagan sing kahulugan ang Dios kag Cristo kay nakompleto na ang Biblia ginatos ka tuig pa antes sini? Indi bala maathag ang ginatudlo sang Biblia parte sa sining importante nga mga topiko?

DIOS BALA SI JESUS?

Sang si Constantine ang nangin manuggahom sang Romano nga Emperyo, natunga ang nagapangangkon nga mga Cristiano parte sa kaangtanan sang Dios kag sang Cristo. Si Jesus bala ang Dios? Ukon gintuga lang sia sang Dios? Agod malubad ini, ginpatawag ni Constantine ang mga lider sang simbahan, indi agod hibaluon ang kamatuoran, kundi bangod indi niya luyag nga tungaon sang relihion ang iya emperyo.

“Sa aton may isa ka Dios, ang Amay.” —1 Corinto 8:6, Ang Biblia sang Philippine Bible Society

Ginpangabay ni Constantine ang ginatos ka obispo nga maghiusa, pero wala ini natabo. Ginpanugda niya dayon sa konsilyo nga batunon ang indi maathag nga panudlo nga si Jesus “bahin” (homoousios) sang Amay. Ining indi suno sa Biblia nga tinaga nga halin sa pilosopiya sang Griego amo ang nangin basihan sang doktrina sang Trinidad nga ginlakip sang ulihi sa mga kredo sang simbahan. Gani, sang katapusan nga bahin sang ikap-at nga siglo, nahuman ang Trinidad nga kilala sa karon, nga nagalakip sang ikatlo kuno nga bahin sini, ang balaan nga espiritu.

NGAA IMPORTANTE INI?

Nagsiling si Jesus nga “ang matuod nga mga sumilimba magasimba sa Amay sa . . . kamatuoran.” (Juan 4:23) Ang kamatuoran makita sa Biblia. (Juan 17:17) Ginatudlo bala sang Biblia nga ang Amay, ang Anak, kag ang balaan nga espiritu natingob sa isa lang ka Dios?

 Ang sigurado, wala sa Biblia ang tinaga nga “Trinidad.” Isa pa, wala nagpangangkon si Jesus nga tupong sia sa Dios, kundi ginsimba niya ang Dios. (Lucas 22:41-44) Ang ikatlo nga rason nagalakip sang kaangtanan ni Jesus sa iya mga sumulunod. Bisan sa tapos nabanhaw subong espiritu nga tinuga, gintawag ni Jesus ang iya mga sumulunod nga “akon mga utod.” (Mateo 28:10) Utod bala sila sang Labing Gamhanan nga Dios? Siempre indi! Pero paagi sa ila pagtuo sa Cristo—ang panganay nga Anak sang Dios—nangin anak man sila sang isa lang ka Amay. (Galacia 3:26) Ipaanggid ang pila pa ka teksto sa ginsambit sang kredo nga halin sa Konsilyo sang Nicaea.

Ang ginasiling sang Nicene Creed:

“Nagapati kita . . . sa isa ka Ginuong Jesucristo . . . nga bahin sang Amay, Dios sang Dios, Kapawa sang Kapawa, matuod nga Dios sang matuod nga Dios.”

Ang ginasiling sang Biblia:

  • “Ang Amay daku pa sa akon [si Jesus].”—Juan 14:28. *

  • “Makayab ako [si Jesus] sa akon Amay kag inyo Amay, sa akon Dios kag inyo Dios.”—Juan 20:17.

  • “Sa aton may isa ka Dios, ang Amay.”—1 Corinto 8:6.

  • “Dayawon ang Dios kag Amay sang aton Ginuong Jesucristo.”—1 Pedro 1:3.

  • “Ang mga pulong sang Kabay Pa [si Jesus], . . . ang pamuno sang tinuga sang Dios.”Bugna 3:14. *

^ par. 13 Italics amon. Ang tanan nga teksto sa sini nga seksion ginkuha sa Ang Biblia sang Philippine Bible Society, (HIL).

^ par. 17 Ang libro nga Ano Gid ang Ginatudlo sang Biblia? nagalakip sining duha ka leksion: “Ano ang Kamatuoran Tuhoy sa Dios?” kag “Sin-o si Jesucristo?” Puede ka makapangabay sini sa mga Saksi ni Jehova ukon makabasa sini sa Internet sa www.jw.org.