Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Hulyo 2013

 ANG PAGTAMOD SANG BIBLIA

Ginharian sang Dios

Ginharian sang Dios

Ang Ginharian bala sang Dios isa ka kondisyon sang tagipusuon?

“Indi ka malayo sa ginharian sang Dios.”Marcos 12:34.

ANG GINASILING SANG MGA TAWO

Madamo ang nagapati nga ang Ginharian sang Dios, subong sang ginasiling sang isa ka daku nga relihion sang Cristiandad, “amo ang paggahom sang Dios sa tagipusuon kag kabuhi sang indibiduwal.”

ANG GINASILING SANG BIBLIA

Ang Ginharian isa ka matuod nga gobierno, kag indi lang pagpasakop sang isa ka tawo sa Dios sa iya tagipusuon. Ang Ginharian sang Dios magagahom sa bilog nga kalibutan.—Salmo 72:8; Daniel 7:14.

Pero ngaa nagsiling si Jesus nga ‘ang ginharian sang Dios yara sa inyo.’ (Lucas 17:21, Ang Biblia sang Philippine Bible Society) Indi buot silingon ni Jesus nga ang Ginharian yara sa tagipusuon sang iya tagpalamati. Ngaa? Bangod sang ginhambal niya ini, ang iya tagpalamati mga Fariseo. Nagsiling si Jesus nga indi sila mangin bahin sang Ginharian bangod ang ila pagsimba pakunokuno amo nga indi ini pagbatunon sang Dios. (Mateo 23:13) Pero, makasiling gid si Jesus nga ang Ginharian sang Dios “yara sa inyo” ukon, subong sang ginasiling sang Bag-ong Kalibutan nga Badbad Sang Cristianong Griegong Kasulatan, “yara sa tunga ninyo.” Ngaa? Bangod sia, bilang palaabuton nga Hari sang Ginharian, nagatindog sa tunga nila.—Lucas 17:21.

 Ano ang Ginharian sang Dios?

“Magkari ang imo ginharian. Matuman ang imo kabubut-on sa duta, subong sang sa langit.”—Mateo 6:10.

ANG GINASILING SANG BIBLIA

Ang Ginharian isa ka matuod nga gobierno sang Dios kag si Jesucristo ang Manuggahom sini. (Mateo 28:18; 1 Timoteo 6:14, 15) Ang katuyuan sini amo ang paghimo sang kabubut-on sang Dios sa langit kag sa duta. (Mateo 6:10) Gani paagi sa iya Ginharian, solbaron sang Dios ang problema sang tawo. Himuon sini ang indi mahimo sang mga gobierno sang tawo.

Sa paggahom sang Ginharian sang Dios, maeksperiensiahan sang mga tawo ang paghidait, seguridad, kag kabuganaan sa paraiso nga duta. (Salmo 46:9; Isaias 35:1; Miqueas 4:4) Wala na sing magamasakit ukon mapatay, kag dulaon man ang mga balatian. (Isaias 33:24; Bugna 21:4) Wala naman sang magatigulang. Nagatagna ang Biblia: “Ang iya unud manginlinghud pa sang sa bata; nagabalik sia sa mga adlaw sang iya pagkapamatan-on.”—Job 33:25.

ANO ANG HIMUON MO?

Bisan ano man ang imo ginhalinan ukon pungsod, mahimo ka mangin sakop sang Ginharian sang Dios kon himuon mo ang ginapatuman sang Dios. Nagasiling ang Biblia: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.”—Binuhatan 10:34, 35.

Ang mga tawo bala ang magatukod sang Ginharian sang Dios?

“Magapatindug ang Dios sang langit sing ginharian nga dili gid malaglag.”—Daniel 2:44.

ANG GINASILING SANG TAWO

Ang pila nagapati nga ang mga tawo amo ang magatukod sang Ginharian sang Dios sa duta, paagi sa pagkumbertir sa iban sa ila pagtuluuhan ukon paagi sa pagpanghikot para sa bug-os kalibutan nga paghidait kag paghiliutod.

ANG GINASILING SANG BIBLIA

Ang Dios amo ang magatukod sang Ginharian, indi ang tawo. (Daniel 2:44) Sa pagtukod sang Ginharian, ang Dios nagsiling: “Napahamtang ko ang akon hari.” (Salmo 2:6) Indi mapaluntad sang mga tawo ang Ginharian sang Dios kag indi man nila mapunggan ini kay magagahom ini sa duta halin sa langit.—Mateo 4:17.

NGAA IMPORTANTE INI SA IMO?

Natural lang nga handumon sang mga tawo nga magaluntad pila ka adlaw ang paghidait kag paghiusa. Mahimo nga magatinguha ka pa gani para sa sini pero malugaw-an ka lang kay indi mo ini matuman. Mangin mapuslanon ang imo pagpanikasog kon mangin bahin ka sini nga Ginharian bangod nahibaluan mo nga ang gahom sang Dios amo ang nagasakdag sini.