Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! HUNYO 2013

 TOPIKO SA KOBER: SOBRA BALA ANG ATON GINABAKAL?

Ngaa Nagabakal Kita?

Ngaa Nagabakal Kita?

Suno sa isa ka surbe sa bilog nga kalibutan nga ginpagua sang 2012, katunga sang ginsurbe ang nagsiling nga nagabakal sila sang mga butang nga indi nila kinahanglan. Mga 66 porsiento ang nagahunahuna nga sobra ang ginabakal sang mga tawo. Mahimo husto sila kay madamo ang nagakalubong sa utang. Suno sa mga researcher kon madamo ka sing ginabakal, nagabuhin ang imo kalipay kag nagadugang ang imo stress! Ti, ngaa sobra ang aton ginabakal?

GINAPAULANAN kita sing madamo nga pasayod. Ano ang katuyuan sini? Para handumon naton ang mga butang nga indi gid man naton kinahanglan. Nahibaluan sang mga negosyante nga ang mga tawo nagakadala sa ila emosyon. Gani ginahimo nila nga makagalanyat ang mga pasayod kag pagpamalaklon.

Ang libro nga Why People Buy Things They Don’t Need nagsiling: “Kon nagaplano nga magbakal, sa masami ginaimadyin na sang isa ang iya balaklon, kon diin sia mabakal, kag kon iya na ini.” Suno sa pila ka eksperto, samtang nagapamalaklon ang mga tawo mahimo sila magsalasala bangod sa sobra nga eksaytment. Ang eksperto sa negosyo nga si Jim Pooler nagpaathag: “Bangod nahibaluan ini sang mga negosyante, ginagamit nila ini nga oportunidad para pabaskugon ang handum sang mga kustomer kag paluyahon ang ila depensa.”

Ano ang himuon mo para indi ka nila mabiktima? Indi magpadala sa emosyon, kag ikumparar ang ginapromisa sa mga pasayod sa realidad.

 PROMISA: “Magaayo ang Imo Kabuhi”

Normal lang nga maghandum sang maayo nga kabuhi. Ginapakita sa aton sang mga pasayod nga ang tanan naton nga handum—maayo nga panglawas, seguridad, kahilwayan sa stress, kag mabakod nga relasyon—mahimo matigayon paagi sa pagbakal sang produkto.

REALIDAD:

Samtang nagadamo ang aton pagkabutang, nagadamo man ang aton problema. Kinahanglan ang dugang nga tion kag kuarta para maatipan ang madamo nga butang. Nagadugang man ang stress bangod sa utang, kag wala na sing tion para sa pamilya kag mga abyan.

Samtang nagadamo ang aton pagkabutang, nagadamo man ang aton problema

Prinsipio: “Bisan pa may kabuganaan ang isa ka tawo ang iya kabuhi indi nagagikan sa mga butang nga ginapanag-iyahan niya.”Lucas 12:15.

PROMISA: “Mangin Kilala Ka”

Pila lang ang nagaako nga nagabakal sila para ipadayaw sa iban. Pero, si Jim Pooler nagsiling: “Kon nagapamalaklon ang mga tawo, ang ila tuyo amo nga ipadayaw ini sa ila mga abyan, kaingod, kaupod sa trabaho kag paryente.” Amo kon ngaa ginagamit sa mga pasayod ang kilala kag manggaranon nga mga tawo. Ang mensahe sang mga pasayod amo: “Mangin pareho ka man sa ila!”

REALIDAD:

Indi ka makonten- to kon pirme mo ipaanggid ang imo kaugalingon sa iban. Kon makuha mo ang imo ginahandum, mahandum ka na man dayon sang isa ka butang.

Prinsipio: “Ang nagahigugma sang pilak indi mabusug sang pilak.”Manugwali 5:10.

PROMISA: “Tamdon Ka Suno sa Gusto Mo”

Ang libro nga Shiny Objects nagsiling: “Ang isa ka paagi para makilala kita (ukon kon ano ang gusto naton nga pagtamod sa aton) amo ang paggamit kag pagpakita sang aton mga pagkabutang.” Nahibaluan ini sang mga negosyante kag ginaangot nila ang tatak sang mga produkto, ilabi na ang malahalon nga mga tatak, sa espesipiko nga sahi sang pagkabuhi kag pamatasan.

Ano ang pagtamod mo sa imo kaugalingon, kag ano ang gusto mo nga pagtamod sang iban sa imo? Fasyonista? Athletic? Ano man ang gusto mo, ginapromisa sang mga negosyante nga kon magbakal ka sang kilala nga tatak, tamdon ka sang mga tawo suno sa gusto mo.

REALIDAD:

Wala sing produkto nga makapabag-o sang aton personalidad ukon makahatag sa aton sing maayo nga kinaiya, pareho sang pagkabunayag kag integridad.

Prinsipio: “Ang inyo pagpamuni indi mangin . . . pagsuksok sing bulawan nga mga puni ukon ang pagsuksok sing sampaw nga mga panapton, kundi ini mangin amo ang tinago nga pagkatawo sa tagipusuon.”1 Pedro 3:3, 4.