Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! MAYO 2013

 GINDESINYO BALA INI?

Ang “Makakita” nga Tul-an sang Brittle Star

Ang “Makakita” nga Tul-an sang Brittle Star

ANG isa ka sahi sang starfish nga ginatawag brittle star may makatilingala nga proteksion sa ibabaw nga bahin sang iya lawas. Bahin ini sang iya tul-an nga puno sing gamay kaayo nga mga lente nga makita lang sa mikroskopyo, kag amo man ini ang iya tumalagsahon nga mata.

Ang daw kristal nga mga bukolbukol sa tul-an, de-kalidad gali nga mga lente

Binagbinaga: Sang gin-usisa sang mga sientipiko ang mga tul-an sang brittle star, nakita nila ang “makatilingala nga desinyo sang nagaikit-ikit kag daw kristal nga mga bukolbukol, nga ang kada isa mas manipis pa sa buhok,” siling sang magasin nga Natural History. Ining daw kristal nga mga bukolbukol human sa calcium carbonate (apog), kag de-kalidad gali nga mga lente. Gina-absorb sini ang kapawa pakadto sa photosensitive nga mga nerve sa idalom sini nga mga tul-an. Isa pa, insakto gid ang korte sang mga lente para makabasa sang dagway.

Suno sa isa ka chemist nga si Joanna Aizenberg, ang ibabaw nga bahin sang lawas sang brittle star, nga amo ang iya tul-an kag amo man ang iya mata, “nagapakita sing isa ka importante nga prinsipio: sa biolohiya, ang isa ka butang masami nga ginagamit sa lainlain nga paagi.”

Paagi sa pagtuon sa brittle star, nakakita ang mga researcher sing simple kag barato nga paagi sa paghimo sing gagmay kaayo nga mga lente nga human sa calcium carbonate. Ang isa sa gingamitan nila sini nga mga lente amo ang telekomunikasyon, diin amo ini ang nagadala sang light signal paagi sa optical fiber.

Ano sa banta mo? Ang “makakita” bala nga tul-an sang brittle star resulta sang ebolusyon? Ukon gindesinyo ini?