Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! MAYO 2013

Pagbantay sa Kalibutan

Pagbantay sa Kalibutan

Estados Unidos

Sang nagligad nga napulo ka tuig, mga 50 milyones ka ginadumilian nga butang ang nakumpiskar sang airport security, suno sa report sang Department of Homeland Security sang Estados Unidos. Sang 2011 lang, kapin sa 1,200 ka pusil ang nakumpiskar. Ang kalabanan nga tag-iya sini nagsiling nga nalipat sila nga may dala gali sila nga pusil.

Brazil

Ginbutangan na sang mga opisyal sang mga eskwelahan ang mga uniporme sang mga estudyante sing electronic chips agod mahibaluan nila kon sin-o ang nagaligoy. Makabaton ang ginikanan sing text halin sa sini nga sensor kon mag-abot ang iya bata sa eskwelahan kag sing lain naman nga text kon maulihi ang iya bata sing 20 minutos.

Norway

Indi na opisyal nga relihion sang Norway ang Lutheran Church. Subong pa lang natabo nga nagboto ang Norwegian Parliament nga bag-uhon ang ila konstitusyon kag iseparar ang Simbahan kag ang Estado.

Czech Republic

Suno sa isa ka surbe, mga 67 porsiento sang Czech nga empleyado ang nagsiling nga pamatyag nila obligado sila nga sabton ang mga tawag, e-mail, ukon text parte sa ila obra bisan pa indi oras sang ila trabaho. Kapin sa 33 porsiento ang nagapati nga bastos ang indi pagsabat sini dayon.

India

Bisan pa nagdamo sing halos 50 porsiento ang patubas nga pagkaon sang India sa sulod sang nagligad nga 20 ka tuig kag may reserba pa sila nga 71 milyones ka tonelada nga bugas kag trigo, nabudlayan gihapon ang India sa pagpakaon sa pumuluyo sini. Kuarenta porsiento lang sang ila patubas ang makalab-ot sa mga pumuluyo. Ang pila sa mga rason amo ang pag-uyang kag korapsion.