Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! ABRIL 2013

 ANG PAGTAMOD SANG BIBLIA

Ikaayong Lawas

Ikaayong Lawas

Importante bala sa Dios kon paano naton ginatatap ang aton lawas?

“Dili ka magsimpon sa mga palainum sing alak, sa mga mahakug magkaon sing unud.”—Hulubaton 23:20.

NGAA IMPORTANTE INI SA IMO?

Ang Biblia indi isa ka libro sang medisina; wala man sini ginakontrol ang tanan nga giho sang tawo. Pero makabenepisyo ka kon mahibaluan mo ang pagtamod sang Dios parte sa ikaayong lawas nga makita sa Biblia.

ANG GINASILING SANG BIBLIA

Madamo nga beses nga makita sa Biblia kon ano ang ginabatyag sang Dios sa pagtatap naton sang aton lawas. Halimbawa, ginapakamalaut sang Biblia ang pagpahubog kag sobra nga pagkaon. (Hulubaton 23:20) Nalakip sa Kasuguan sang Dios sa Israel sang una ang pila ka pagsulundan nga makakontrol kag makatapna pa gani sang mga balatian. Nalakip man sa Kasuguan ang espesipiko nga mga sugo para malikawan ang mga aksidente. (Deuteronomio 22:8) Maathag nga ginapalig-on sang Biblia nga atipanon naton ang aton lawas.

 Suno sa Biblia, ngaa nagamasakit kita?

“Paagi sa isa ka tawo nagsulod ang sala sa kalibutan kag ang kamatayon paagi sa sala.”—Roma 5:12.

ANG GINASILING SANG MGA TAWO

Madamo ang nagapati nga ang balatian resulta sang pagpalya sang ebolusyon sang tawo. Suno naman sa iban, tuga ini sang misteryoso nga mga puersa, subong sang malaut nga mga espiritu.

ANG GINASILING SANG BIBLIA

Suno sa Biblia, ang aton pagmasakit resulta sang pagrebelde sang una nga tawo batok sa Dios. (Roma 5:12) Sang wala pa nagrebelde ang aton una nga mga ginikanan nga sanday Adan kag Eva, perpekto ang ila panglawas. Nakahibalo sila nga mapatay sila kon sikwayon nila ang pagpalangga sang Dios. (Genesis 2:16, 17) Pero hungod nila nga ginguba ang ila pagpakig-abyan sa Dios, gani nadula nila ang ila pagkaperpekto. *

Ang indi maayo nga kahimtangan sang aton una nga mga ginikanan ginpasa nila sa aton. Gani, bisan ano pa ang aton himuon, nagamasakit kita gihapon.

ANO ANG HIMUON MO?

Ginatudlo sang Biblia nga kon magpanumbalik ka sa Dios paagi sa pagsunod sa iya mga prinsipio, matigayon mo sa ulihi ang perpekto nga panglawas sa paraiso sa duta. (Isaias 33:24) Nagpromisa ang Dios nga dulaon niya ang kasakit, balatian, kag kamatayon.—Bugna 21:3, 4.

Batok bala ang Biblia sa pagpabulong?

“Ang mga tawo nga mapagros wala nagakinahanglan sang manugbulong, kundi ang mga nagamasakit.”—Mateo 9:12.

ANG GINASILING SANG MGA TAWO

Mas gusto sang iban ang espirituwal nga pagbulong (nakilal-an man subong faith healing) sangsa pagkadto sa doktor.

ANG GINASILING SANG BIBLIA

Sang panahon sang Biblia, gintugutan sang Dios ang mga manugbulong. (Genesis 38:28; Colosas 4:14) Wala kita sang makita sa Biblia nga ginpamatukan sang Dios ang paggamit sang tanom, lana, dieta, kag iban pa nga paagi sang pagbulong. Ang matuod, ginkilala ni Jesus nga “ang mga tawo nga mapagros wala nagakinahanglan sang manugbulong, kundi ang mga nagamasakit.”—Mateo 9:12.

Pero wala nagaugyon ang Biblia sa tanan nga sahi sang pagbulong. Halimbawa, wala ini nagaugyon sa mga faith healing. Ang mga pagbulong nga may nadalahig nga espiritismo indi man gusto sang Dios. (Galacia 5:19-21) Ang pinakamaayo nga himuon sang isa kon may balatian sia amo ang pagkadto gilayon sa doktor, tubtob posible.

^ par. 10 Sa sini nga artikulo, ang mga tinaga nga “perpekto” kag “pagkaperpekto” nagapatuhoy sa maayo nga panglawas sang una nga mga tawo sang gintuga sila sang Dios. Wala sila sing sakit, balatian, kag kamatayon.