Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! ENERO 2013

 ANG PAGTAMOD SANG BIBLIA

Paraiso

Paraiso

Ano ang Paraiso?

ANG GINASILING SANG MGA TAWO

May pila nga nagapati nga ang Paraiso indi matuod. Ang iban naman nagapati nga isa ini ka hardin nga ginaistaran sang maayo nga mga tawo nga nagakabuhi sing malipayon kag wala sing katapusan.

ANG GINASILING SANG BIBLIA

Ang tinaga nga “paraiso” nagapatuhoy sa una nga puluy-an sang tawo, ang hardin sang Eden. (Genesis 2:7-15) Ginapakita sang Biblia nga ini nga hardin isa ka matuod nga lugar diin ang una nga mag-asawa nagkabuhi nga wala sing balatian kag kamatayon. (Genesis 1:27, 28) Bangod ginlapas nila ang Dios, ginpahalin sila sa Paraiso. Pero, madamo sing tagna sa Biblia ang nagasiling nga sa palaabuton ang Paraiso ipasag-uli kag istaran liwat sang tawo.

NGAA IMPORTANTE INI SA IMO?

Kon mahigugmaon ang Dios, indi bala nagakaigo lang nga padyaan niya ang iya mga matutom nga sumilimba sang malipayon nga kabuhi sa lugar nga pareho sang Paraiso? Dapat man niya pahibaluon ang mga tawo kon ano ang ila himuon para mapahamut-an nila ang Dios. Siling sang Biblia mapahamut-an mo ang Dios paagi sa pagkuha sing ihibalo parte sa iya kag pagtuman sang iya mga sugo.Juan 17:3; 1 Juan 5:3.

“Ang GINOONG Dios naghimo sing katamnan . . . sa Eden; kag didto ginbutang niya ang tawo nga iya nahimo.”—Genesis 2:8.

 Diin ang Paraiso?

ANG GINASILING SANG MGA TAWO

Ang iban nagapati nga ang Paraiso ara sa langit, ang pila naman nagasiling nga ibutang ini diri sa duta sa palaabuton.

ANG GINASILING SANG BIBLIA

Ang orihinal nga Paraiso nga ginhimo para sa mga tawo diri anay sa duta. Katuyuan sang Dios nga ang duta mangin permanente nga ilistaran sang mga tawo. Ang Biblia nagsiling nga ginhimo sang Dios ang aton planeta para magluntad tubtob san-o. (Salmo 104:5) Nagasiling man ini: “Ang mga langit mga langit sang GINOO, apang ang duta nahatag niya sa mga anak sang mga tawo.”Salmo 115:16.

Gani, indi katingalahan nga nagapromisa ang Biblia sang isa ka Paraiso nga duta diin hatagan sang Dios ang mga tawo sing kabuhi nga wala sing katapusan. Diri, may paghiliugyon na kag paghidait. Wala na sing kasakit kag pag-antos. Kag ang mga tawo magakalipay sing bug-os sa ila matahom nga palibot.Isaias 65:21-23.

“Ang tolda sang Dios yara sa mga tawo, . . .  kag wala na sing kamatayon, ukon paglalaw ukon paghibi ukon kasakit pa.”Bugna 21:3, 4.

Sin-o ang maistar sa Paraiso?

ANG GINASILING SANG MGA TAWO

Ginatudlo sang madamo nga relihion nga maayo lang nga mga tawo ang magaistar sa Paraiso. Pero sarisari ang paghangop kon ano gid ang “maayo.” Para sa iban, bastante na ang pagsimba kag pagpangadi.

ANG GINASILING SANG BIBLIA

Suno sa Biblia, ang “mga matarong” magaistar sa Paraiso. Pero sin-o ang matarong sa panan-aw sang Dios? Indi ang mga tawo nga pirme nagahimo sang mga ritwal sang ila relihion pero wala nagatuman sa kabubut-on sang Dios. Ang Biblia nagsiling: “May daku bala nga kahamuut ang GINOO sa mga halad-nga-sinonog kag mga halad, subong sang sa pagtuman sang tingug sang GINOO? Yari karon, ang pagtuman maayo pa sang sa halad.” (1 Samuel 15:22) Maathag nga ang “mga matarong” nga magaistar sa Paraiso tubtob san-o amo ang mga nagatuman sa mga sugo sang Dios nga mabasa sa Biblia.

ANO ANG HIMUON MO?

Ang pagtuman sa sugo sang Dios indi lamang pagpakigbahin sa mga seremonya. Ang imo paggawi sa kada adlaw mahimo magpahamuot ukon magpaakig sa Dios. Paagi sa pag-usisa sing maayo sa Biblia, matun-an mo kon paano pahamut-an ang Dios. Kag indi sia mabudlay pahamut-an. Ang Biblia nagsiling nga “ang iya mga sugo indi mabug-at.” (1 Juan 5:3) Gusto gid sang Dios nga padyaan ka sa imo pagkamatinumanon paagi sa pagpasulod sa imo sa Paraiso.

“Ang mga matarong magakabuhi sa duta nga indi maano, kag mangin-ila ini sa walay katapusan.”Salmo 37:29.