Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! DISIEMBRE 2012

Diin Na ang Pasensia sang mga Tawo?

Diin Na ang Pasensia sang mga Tawo?

KINAANDAN na nga indi mapinasensiahon ang mga tawo. Nagakadula ang ila pasensia kon madugayan sila tungod sa trapik ukon sa pila. May mga eksperto nga nagapati nga mas pasensioso ang mga tawo sang una sangsa subong—kag mahimo nga makibot ka sang mga rason sini.

Ang pila ka analyst nagsiling nga madali matak-an ang mga tawo subong bangod sang teknolohiya. Suno sa The Gazette sa Montreal, Canada, nagapati ang mga researcher nga “ginabag-o sang teknolohiya, halin sa cell phone, kamera, e-mail, asta sa iPod ang aton kabuhi . . . Bangod naanad kita nga may resulta dayon nga makuha sa sini nga mga teknolohiya, gusto naton nga amo man sini kadasig ang resulta sang iban pa naton nga ginahimo.”

Ang psychologist nga si Dr. Jennifer Hartstein nagpaathag nga “nangin batasan na naton nga kinahanglan makuha dayon ang tanan naton nga gusto, kag nagapaabot kita nga dapat ang tanan madasig, organisado, kag suno sa gusto naton. Kon indi ina  matabo, madali kita mainit kag mairitar [nga isa ka tanda] sang kakulang sang pasensia.” Nagsiling pa sia, “Nalipat na kita maghinayhinay kag magkalipay sa aton ginahimo.”

Ang iban nagapati nga amat-amat na nga nagakadula sa uso ang e-mail. Ngaa? Bangod madamo nga tawo nga nagapadala sing mensahe ang natak-an maghulat sang sabat sing inoras, ukon bisan minutos lang gani. Isa pa, kaangay sa sulat, ang e-mail may panamyaw kag konklusion. Gani para sa madamo, makatalaka ini kag usik sa oras. Mas ginapili nila nga mag-text bangod wala ini sing pormalidad. Ang mga tawo daw natak-an naman magsulat sang matinahuron nga panamyaw! Wala man nila ginabasa liwat ang ila sulat para tan-awon kon may sala ini. Bilang resulta, ang mga sulat kag e-mail nagatalang ukon madamo sing sala.

Madamo ang wala sing pasensia sa pagbasa sang malawig nga mga sulat

Magluwas sa moderno nga komunikasyon, ang pasensia nagakadula man sa iban nga bahin sang kabuhi. Halimbawa, natalupangdan mo bala kon kaisa nga kadasig sa imo maghambal, magkaon, magdrayb, ukon maggasto sang kuarta? Ukon ang makadali nga paghulat sa elebeytor, pagbag-o sang traffic light, pagpaandar sang kompyuter, makatalaka kag pamatyag mo daw ginalumutan ka na sang hulat?

Natalupangdan sang mga eksperto nga madamo nga tawo ang wala sing pasensia sa pagbasa sang malawig nga mga sulat. Ngaa? Bangod naanad sila sa madasig nga pagpangita sing impormasyon sa Internet, kag mas ginapili nila ang sumaryo na lang, kag nagapaabot sila nga makuha nila dayon ang impormasyon.

Diin na ang pasensia sang mga tawo? Indi mahatag sang mga eksperto ang tanan nga sabat kon ano ang kabangdanan sang pagkadula sang pasensia. Pero may mga ebidensia nga mahimo nga delikado ang pagkadula sang pasensia. Ang masunod nga mga artikulo magabinagbinag sang pila ka katalagman sini kag kon ano ang puede mo himuon para mangin mas pasensioso ka.

Madamo ang naanad sa madasig nga pagpangita sing impormasyon sa Internet, kag mas ginapili nila ang sumaryo na lang