Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NOBIEMBRE 2012

Itudlo ang Maayo nga Pagsulundan sa Moral

Itudlo ang Maayo nga Pagsulundan sa Moral

Ginatudluan sang maayo nga mga ginikanan ang ila kabataan sang mga prinsipio sa Biblia

“Sang wala ko pa ginasunod ang mga prinsipio sa Biblia, nabudlayan ako maghanas sa akon kabataan. Pero subong nga ginasunod ko na ang Biblia, mas mahapos na lang.”—ELIZABETH, SOUTH AFRICA.

Kabudlayan.

Ang mga kaupdanan sang kabataan sa eskwelahan kag ang pagnubo sang moral may daku gid nga impluwensia sa mga pamilya. Para mabatuan ini, kinahanglan sang kabataan ang maayo nga mga pagsulundan. Kay kon wala, mangin iresponsable sila, wala sing prinsipio, kag wala sing batasan pagdaku nila.

Panugda.

Madamo nga nagasolo nga ginikanan, lakip ang mga ginsambit sa sini nga mga artikulo, ang nagasunod sa giya sang Biblia kay nahibaluan nila nga ara sa sini ang indi malabawan nga kaalam sang Dios. Halimbawa, binagbinaga ang ginasiling sang Biblia parte sa pinakaimportante nga prinsipio—ang pagpakita sang matuod nga gugma.

“Ang gugma mapinasensiahon kag mainayuhon. Ang gugma indi maimon, wala ini nagapabugal, wala nagapahambog, wala nagagawi sing di-nagakaigo, wala nagapangita sang kaugalingon nga kaayuhan, indi ini maakigon. Wala ini nagaisip sang kahalitan. Wala ini nagakasadya sa pagkadimatarong, kundi nagakasadya sa kamatuoran. Ginaagwanta sini ang tanan nga butang, . . . ginalauman ang tanan nga butang, ginabatas ang tanan nga butang. Ang gugma wala gid nagauntat.”—1 Corinto 13:4-8.

Kon ipakita sang mga ginikanan ini nga sahi sang gugma, mangin maayo ang pagdaku sang ila kabataan. Si Colette nga ginsambit sa nagligad nga artikulo, nagsulat: “Pirme ko ginahambalan ang akon kabataan nga palangga ko gid sila. Ginasilingan ko man sila nga regalo sila halin sa Dios kag bangod sini kinahanglan nga atipanon ko sila sing maayo. Pero dapat man nila ako tahuron kag ang ila amay bisan pa wala sila sa poder sini. Ini nga mga prinsipio nakabulig nga mapakita namon ang respeto kag pagsalig sa kada isa sa amon pamilya.”—Salmo 127:3.

Si Anna nga ginsambit sa una nga artikulo, nagsiling: “Kon mag-away ang akon mga bata, ginapahanumdom ko sila sang ginsiling ni Jesus nga ang tanan nga butang nga gusto namon nga himuon sang iban sa amon, dapat man namon himuon sa ila.” (Mateo 7:12) Si Roberto nga ginsambit kaina, nakaeksperiensia man sang problema nga kinaandan sa madamo nga nagasolo nga ginikanan. Nagsiling sia: “Ang mga bata may duha ka pagsulundan—ang sa imo kag ang sa isa pa nila ka ginikanan. Kon ipatuman ko gani ang prinsipio sang Biblia, nahibaluan ko nga indi ako ang ila paborito sa sina nga adlaw ukon semana.” Nagdugang pa gid sia: “Mahimo nga regaluhan sang isa ka ginikanan ang mga bata para sia pirme ang ila pilion. Daw amo man sini ang akon gusto nga himuon, pero mas maayo kon istoryahon ko sila kag paathagan.”

Indi mahapos ang magsunod sa mga pagsulundan sang Biblia, pero maayo gid ang resulta sini! Si Sarah nga nagasolo nga iloy sa South Africa nagsiling: “Nalipay gid ako nga ang akon mga bata nagdaku suno sa panuytoy ni Jehova. May mga kabudlayan man kami, pero wala gid kami ginpabay-an sang Dios.”