Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Nobiembre 2012

Mangayo sing Bulig

Mangayo sing Bulig

Mangayo sing bulig sa mga paryente kag mga abyan nga ginasaligan mo

“May mga abyan kami sa amon kongregasyon. Mapinalanggaon gid sila kag mabinuligon. Daw pamilya lang namon sila.”—LIZAAN, ILOY SANG DUHA KA TIN-EDYER.

Kabudlayan.

“Ang pinakamabudlay para sa akon,” siling ni Alina, nga may duha ka bata nga lalaki, “amo ang kakapoy kag kasako.” Normal lang ang sitwasyon ni Alina para sa mga nagasolo nga iloy. Amo kon ngaa madamo sa ila ang may mga abyan nga indi sila matahap magpangayo sing bulig.

Panugda.

Mangayo sing bulig sa mga paryente kag mga abyan nga ginasaligan mo. Maghimo sing listahan sang mga tawo nga madalaganan mo kon kinahanglan mo ang bulig pareho abi sang manugbantay sang bata, manugkay-o sa balay, masugiran sang problema, ukon transportasyon. Pirme i-update ang imo listahan. Hibalua man kon ano nga bulig ang ginatanyag sang mga ahensia sang gobierno kag sang pribado nga sektor.

Si Renata, nga isa sa mga Saksi ni Jehova, ginabuligan gid sang pareho niya nga mga Cristiano. “Ginabuligan gid nila ako pirme,” siling niya. “Sang gintrangkaso ako kag ang akon kapid nga bata nga babayi nga siam ka tuig ang edad, indi ako makadigamo. Sang mabalitaan ini sang amon kongregasyon, may nagdul-ong sing pagkaon sa balay kada adlaw.” Ini nga kaayo nagapahanumdom sa akon sang ginasiling sang Biblia sa 1 Juan 3:18: “Mga anak, maghigugma kita, indi paagi sa pulong ukon paagi sa dila, kundi paagi sa buhat kag kamatuoran.”

Makabulig bala ang isa ka ginikanan bisan pa wala sa iya poder ang mga bata? Kon ang isa pa ka ginikanan, sa masami ang amay, gintugutan sang korte nga makaupod ang mga bata, responsable, kag gusto magbulig, ngaa indi ka magpabulig sa iya? Isa pa, kinahanglan man nga makaupod sang mga bata ang ila amay. *

Hanasa ang imo kabataan nga magbulig. Kon hatagan mo sing ulubrahon ang imo kabataan suno sa ila masarangan, makabulig ini sa imo kag sa ila. Makatudlo ini sa ila nga mangin responsable, kag makatuon sang maayo nga batasan sa pag-obra nga magamit nila sa ulihi.

^ par. 6 Sa sini nga kahimtangan, dapat sundon sang Cristianong mga ginikanan ang mga prinsipio sang Biblia sa ila bug-os nga masarangan kag binagbinagon ang pinakamaayo para sa kabataan. Dapat nila tahuron ang desisyon sang korte.