Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! OKTUBRE 2012

Pagbantay sa Kalibutan

Pagbantay sa Kalibutan

“Halos katunga sang mga tawo nga ginakanser kada tuig sa [United Kingdom], nga sobra sa 130,000 tanan, ang nagabalatian sini bangod sa mga butang nga malikawan kuntani. Lakip sa mga ginatunaan sini amo ang pagpanigarilyo, pag-inom kag pagkaon nga indi maayo sa lawas.”—BBC NEWS, BRITAIN.

“Bangod sang daku kag moderno nga ilegal nga negosyo sang organisado nga mga kriminal sa mga bahin sang lawas sang mga sapat, nagadiutay ang makadalayaw nga mga sapat . . . sa kadasigon nga wala pa gid anay matabo.”—WILDLIFE CONSERVATION SOCIETY, U.S.A.

Mahimo mabuhinan sing 4.8 ka tuig ang kalawigon sang kabuhi sang mga tawo nga nagatan-aw sang TV sing mga anom ka oras kada adlaw sangsa mga tawo nga wala nagatan-aw sing TV. Buot silingon, sa isa ka oras nga pagtan-aw sang TV, mabuhinan sing mga 22 minutos ang kalawigon sang kabuhi sang mga adulto nga pirme lang nagapungko.—BRITISH JOURNAL OF SPORTS MEDICINE, BRITAIN.

Sa Germany, sobra sa 90 porsiento sang mga babayi nga ang ginabusong na-diagnose nga may Down syndrome ang nagadesisyon nga ipahulog ang iya ginabusong.—DER TAGESSPIEGEL, GERMANY.

Ang Stress sa Kabuhi sa Siudad

Ginapakita sang research nga “mas madali maapektuhan sang stress ang mga nagaistar sa siudad sangsa mga tawo sa mga baryo,” siling sang magasin nga Przekrój sa Poland. “Madamo sang makapa-stress nga butang sa mga siudad,” siling sang psychotherapist nga si Mieczysław Jaskulski sang Psychoeducation Laboratory sa Warsaw. Ang risgo sa anxiety attack para sa mga nagaistar sa siudad mas mataas sing 21 porsiento sangsa mga nagaistar sa uma, kag mas mataas sing 39 porsiento sa mood disorder.” Paano ini atubangon sang mga nagaistar sa siudad? “Indi maugot sa mga butang nga wala ka sing kontrol,” “indi na pagpensara ang obra kon makapauli ka na,” “maglakatlakat anay,” kag “indi mangalag-ag sa pagbakasyon,” siling ni Przekrój.

Daw Ano Kadamo nga Impormasyon ang Mahawiran sang Facebook?

Luyag mahibaluan sang estudyante sa abogasiya sa Austria kon daw ano kadamo nga impormasyon parte sa iya ang matago sang pinakadaku nga social network sa sulod sang tatlo ka tuig nga miembro sia sini, gani nagpangayo sia sing kopya sini. Ginpadal-an sia sang Facebook sing isa ka CD nga may 1,222 ka pahina nga impormasyon. Suno sa pamantalaan nga Der Tagesspiegel sa Germany, nagsiling ang estudyante: “Natago ang tanan nga impormasyon, ang tanan nga mensahe, ang tanan nga chat, pati na ang dapat sekreto nga impormasyon parte sa mga abyan.” Nalakip man ang mga impormasyon nga sigurado sia nga gin-delete niya!