Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Oktubre 2012

 Pamangkot sang mga Pamatan-on

Ano ang Ginapaabot Ko sa Pag-asawahay?—Bahin 2

Ano ang Ginapaabot Ko sa Pag-asawahay?—Bahin 2

SA AMON NAGLIGAD NGA GUA, ginbinagbinag naton ang pila ka kaayuhan kag mga kabudlayan nga mapaabot mo sa pag-asawahay.

SA SINI NGA GUA, binagbinagon naton kon ngaa dapat mo paabuton ang mga wala mo ginapaabot nga butang.

Butangi sing ✔ ang mga kahon nga pilion mo, dayon numeruhi sing pasunod kon ano ang mas importante sa imo.

Ginapaabot ko nga ang akon bana ukon asawa . . .

  • guapo ukon guapa
  • mapabugal ko kag makabatyag ako sing kalipay
  • pareho ko man sing mga tulumuron
  • pareho ko man sing kalingawan

 Wala sing malain sa pagpaabot sang nasambit sa pahina 16 kon nagapangita ka sing palamanhon ukon palangasaw-on. Mahimo nga may makilala ka pa gani nga ara sa iya ang tanan nga ginapangita mo. Pero ang matuod, sa pagligad sang tion nagabag-o ang mga tawo kag amo man ang mga kahimtangan.

Tandai: Agod mangin madinalag-on ka sa pag-asawahay, paabuta ang wala mo ginapaabot nga butang.

Ang maayo nga balita. Mahimo nga makalilipay kon kaisa ang wala ginapaabot nga butang sa inyo pag-asawahay.

“Sang mag-asawa na kami, nakita ko nga katarsa gali kay Maria. * Wala ko ini matalupangdan sang naganobyahanay pa lang kami. Bangod kilala na gid namon ang kada isa, daw indi na mabug-at ang mga problema nga maatubang namon.”—Mark.

Ang indi maayo nga balita. Mahimo nga indi makalilipay kon matabo ang pila ka wala ginapaabot nga butang sa inyo pag-asawahay. Binagbinaga ini nga halimbawa.

Pananglitan may tulumuron kamo sang imo palangasaw-on ukon palamanhon nga mangin misyonero sa iban nga pungsod. Pero, ano abi kon sang mag-asawa na kamo, nagmasakit sing grabe ang isa sa inyo kag indi na ninyo malab-ot ang inyo tulumuron? Posible gid nga matabo ini, kay ang Biblia nagasiling nga “ang wala ginapaabot nga hitabo nagakatabo sa ila tanan.” (Manugwali 9:11, NW) Mahimo gid nga masubuan kamo bangod nagmasakit ang isa sa inyo kag indi na ninyo malab-ot ang inyo tulumuron. Kon matabo ining wala ginapaabot nga kahimtangan, batuna ninyo ini kag bag-uha ang inyo plano. Kay man, nagpakasal ka sa isa ka tawo, indi sa tulumuron.

Tandai: Ang Biblia nagasiling nga ang mga nagapamana ukon nagapangasawa makaeksperiensia sing “kapipit-an.” (1 Corinto 7:28) Kon kaisa, ang wala ginapaabot nga mga kahimtangan amo ang kabangdanan sang kapipit-an.

Paano mo mahandaan ang wala ginapaabot nga butang? Kon magpamana ka ukon magpangasawa, kinahanglan mo ang duha ka butang.

 1. REALISTIKO NGA PAGTAMOD

Bisan pa nagasahuay gid kamo, dapat mo paabuton nga

  • indi sa tanan nga tion nga mag-ugyunay kamo sa tanan nga butang.
  • indi sa tanan nga tion nga pareho ang inyo mga prioridad.
  • indi sa tanan nga tion nga pareho ang inyo gusto nga himuon.
  • indi sa tanan nga tion nga pareho ang inyo gugma sa isa kag isa.

Kinaandan ini nga mga kahimtangan. Apang indi sini maguba ang inyo pag-asawahay luwas lang kon tugutan ninyo ini! Dumduma nga ang Biblia nagasiling nga ang gugma ‘nagabatas sang tanan nga butang’ kag “wala gid nagauntat.”—1 Corinto 13:4, 7, 8.

Ang matuod: Sa ulihi, indi ang inyo mga problema kundi kon paano ninyo ini atubangon ang makatipig ukon makaguba sang inyo pag-asawahay.—Colosas 3:13.

2. MATUTOM SA ISA KAG ISA

Kon determinado gid kamo nga mag-unungay bisan ano ang matabo, malampuwasan ninyo ang wala ginapaabot nga mga bagyo sa inyo kabuhi.—Mateo 19:6.

Ang iban nagasiling nga ang promisa nga mangin matutom sa bana ukon asawa problema lang, pero indi ini matuod. Sa baylo, ginapabakod sini ang inyo relasyon. Kon matabo ang wala ginapaabot nga butang, indi kamo magpadalidali sa pagbulagay kundi magabuligay kamo sa pagpangita sing solusyon.

Agod mapabakod pa ang inyo determinasyon nga mangin matutom sa isa kag isa, dapat mangin rasonable kamo kag realistiko sa inyo pag-asawahay. Sa pag-ilustrar kon ano ang buot silingon sini, ano ang himuon mo sa masunod nga mga kahimtangan?

1. Kon ginhatagan ka sing tiket sa eroplano agod magbiyahe bisan diin sa kalibutan, diin mo gusto magkadto, kag ngaa?

Ang imo kadtuan:

Rason:

  • talan-awon sa palibot
  • kultura
  • klima
  • kalingawan
  • iban pa

2. Ang imo tiket sa eroplano one-way lang kag didto ka na magaistar sa imo kadtuan.

Ano ang pilion mo?

  • Ang imo kadtuan:
  • ukon indi na lang ako maglakat.

Mahimo nga lain ang imo kadtuan sa duha ka kahimtangan nga nasambit. Pero, kon pareho man, mahimo gid nga lain ang imo hunahunaon sa ikaduha nga kahimtangan. Sa baylo nga pensaron ang imo kaugalingon bilang isa ka bakasyunista nga nagapahunayhunay sa isa ka pulungkuan sa beach ukon naga-hiking sa bukid, dapat mo pensaron ang imo kaugalingon bilang isa ka residente kag kon ano nga mga benepisyo kag mga problema sang adlaw-adlaw nga pagkabuhi ang atubangon mo.

Dapat nga amo sini ang pensaron mo parte sa pag-asawahay. Kay, sa pagligad sang tion, mahimo magbag-o ang mga kahimtangan. Kag mahimo nga ikaw kag ang imo bana ukon asawa magbag-o man. Ang daku nga bahin sang inyo kadalag-an nagadepende sa inyo ikasarang sa pagpaabot sang wala ginapaabot nga butang kag kon paano ninyo ini atubangon.

Binagbinaga ini: Subong soltero ukon dalaga, paano mo ginaatubang ang mga wala ginapaabot nga butang sa imo kabuhi?

^ par. 15 Gin-islan ang iban nga ngalan sa sini nga artikulo.

PAMANGKUTA ANG IMO GINIKANAN

Ano nga mga kaayuhan kag mga kabudlayan ang wala ninyo ginapaabot nga natabo sang bag-o pa lang kamo makasal? Paano ako makahanda sa wala ginapaabot nga butang kon magpamana na ako ukon magpangasawa?