Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Oktubre 2012

 Ang Pagtamod sang Biblia

May Epekto Bala ang mga Bituon sa Imo Kabuhi?

May Epekto Bala ang mga Bituon sa Imo Kabuhi?

Ginahigugma bala niya ako?

Mabiyahe bala ako subong?

Mabaton bala ako sa obra?

AGOD masabat ini nga mga pamangkot, madamo ang nagadepende sa astrolohiya. * Pero may epekto gid bala ang mga bituon sa imo kabuhi? Makabulig bala ini sa imo agod mahibaluan mo ang imo palaabuton, ukon ang parte sa imo kaugalingon? Ano ang ginasiling sang Biblia?

May Epekto Bala ang mga Bituon sa Aton Palaabuton?

Ginapatihan sang iban nga mga tawo nga indi naton malikawan ang aton kapalaran. Ginasiling nila nga napat-od na ang aton palaabuton kag mahibaluan naton ini paagi sa mga bituon. Pero indi amo sini ang ginasiling sang Biblia. Ginasugid sini sa aton nga ginapapili sang Dios ang mga tawo, kag ginapahangop sini nga mahimo makontrol sang mga tawo kon ano ang madangatan nila. Halimbawa, ginsilingan niya ang mga Israelinhon: “Nabutang ko sa atubangan mo ang kabuhi kag ang kamatayon, ang pagpakamaayo kag ang pagpakamalaut; busa pili-a ang kabuhi, agud nga magkabuhi ka, ikaw kag ang imo mga kaliwatan.”—Deuteronomio 30:19.

 Gani, ginpaathag ni Jehova nga Dios sa iya katawhan nga mahimo gid nila makontrol ang ila palaabuton. Kon tumanon nila ang iya mga sugo, pakamaayuhon sila. Kon indi sila magtuman, mabudlayan gid sila.

Binagbinaga ini: Kon ang palaabuton sang kada Israelinhon napat-od na paagi sa mga bituon, ngaa abi ginapalig-on pa sila sang Dios nga pilion ang kabuhi? Makatarunganon bala nga silutan sila sang Dios bangod sang ginahimo nila nga indi nila makontrol?

Maathag ang ginatudlo sang Biblia: Ang aton pagkabuhi nagadepende sa aton mga desisyon, indi sa mga bituon.—Galacia 6:7.

May Epekto Bala ang mga Bituon sa Aton Personalidad?

Ang kalabanan nga astrologo nagasiling nga wala sila nagapati sa kapalaran. “Makontrol naton ang aton kapalaran,” siling sang isa ka astrologo, pero nagsiling sia: “Sa pihak nga bahin, ang tion sang pagbun-ag sa aton may epekto sa aton personalidad.” Amo man sini ang pagpati sang madamo nga tawo. Nagapati sila nga bangod ang puersa sang mga bituon kag mga planeta may epekto sa aton duta, indi ayhan nga may labaw sa kinaugali nga epekto man ini sa aton? Ano ang ginasiling sang Biblia?

Ang Biblia indi isa ka libro sa siensia nga nagadetalye sang lawas sang tawo kag sang uniberso. Pero ginapaathag sini ang katuyuan ni Jehova sa pagtuga sang mga butang sa langit. Ang Genesis 1:14, 15 nagasiling: “Nagsiling ang Dios, ‘Matuga sa kalangitan ang mga butang nga may kasanag sa pagseparar sang adlaw kag gab-i, kag bilang palatandaan sang pag-umpisa sang mga panahon, mga adlaw kag mga tuig. Magsiga sila sa kalangitan sa paghatag kasanag sa kalibutan.’”—APD.

Binagbinaga ini: Kon gindesinyo sang Dios ang mga bituon agod may epekto ini sa aton personalidad, indi bala nga dapat ginsugiran niya kita?

Gani, ano ang masiling naton? Gintuga sang Dios ang mga bituon, pero wala ini sing epekto sa aton personalidad.

Ang Masaligan nga Giya

Maayo gid ina nga luyag naton mahibaluan ang aton palaabuton ukon luyag naton mahangpan ang aton kaugalingon. Pero may giya nga masaligan naton sa baylo sang mga bituon.

Ginapaathag sang Biblia nga si Jehova nga Dios “nagapahayag sang katapusan kutub sa ginsuguran.” (Isaias 46:10) May katuyuan sia, kag tumanon gid niya ini. (Isaias 55:10, 11) Mahibaluan naton ang katuyuan sang Dios kon basahon naton ang Biblia. Ginapaathag man sining dumaan kag sagrado nga libro kon ngaa nagaantos kita, kag kon paano dulaon sang Dios ang mga kahimtangan nga nagapaantos sa mga tawo. *2 Pedro 3:13; Bugna 21:1-4.

Ang Biblia amo ang pinakamaayo nga giya sa paghangop kag sa pagpauswag sang aton kaugalingon. Ngaa? Bangod paagi sa pagbasa sini, mabuligan kita nga mausisa ang aton kaugalingon. Halimbawa, ginasiling sang Biblia nga si Jehova nga Dios “maloloy-on,” “makuli sa pagpangakig,” kag “handa sa pagpatawad.” (Exodo 34:6; Salmo 86:5) Pero, amo man bala kita sini? Mapakita sang Biblia ang aton sayop nga panghunahuna kag mabuligan kita sini nga mahibaluan kon ano ang aton dapat pauswagon.

Gani, indi kinahanglan nga magdangop kita sa mga bituon agod mahibaluan ang aton palaabuton ukon mahangpan ang aton kaugalingon. Ang Biblia amo ang pinakamaayo nga giya, kay “ang pagsulat sa bug-os nga Kasulatan gintuytuyan sang Dios kag mapuslanon ini sa pagpanudlo, sa pagsabdong, sa pagtadlong sa mga butang.”—2 Timoteo 3:16, 17.

^ par. 6 Ang astrolohiya amo ang pagtuon parte sa adlaw, bulan, mga planeta, kag mga bituon, kay ginapatihan nga ini nga mga butang may epekto sa aton kag makabulig sa aton nga mahangpan ang aton kaugalingon.

^ par. 19 Para sa dugang nga impormasyon parte sa katuyuan sang Dios, tan-awa ang kapitulo 3 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.

Magtuon sing Dugang Pa

PROGRAMA SA PAGTUON SA BIBLIA

Ngaa Dapat Tun-an ang Biblia?

Minilyon karon sa bilog nga kalibutan ang nakakita sang sabat sa importante nga mga pamangkot sa kabuhi sa bulig sang Biblia. Gusto mo man bala?

MAAYONG BALITA HALIN SA DIOS!

Paano ang mga Prinsipio sa Biblia Makabulig sa Aton?

Ginpaathag ni Jesus kon ngaa kinahanglan naton ang panuytoy kag kon ano ang duha ka panguna kag pinakaimportante nga prinsipio sa Biblia.

SABAT SA MGA PAMANGKOT SA BIBLIA

Natalana Na Bala Kon San-o Kita Mapatay?

Ngaa ang Biblia nagsiling nga may “tion sa pagkapatay”?