Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

MAGMATA! OKTUBRE 2012

Mangin Mapagros

Mangin Mapagros

Kon mapagros ka, mangin maayo man ang imo pag-eskwela kag ang imo pagkabuhi.

DAPAT lang nga atipanon mo ang imo lawas nga ginhatag sang Dios sa imo. (Salmo 139:14) Halimbawa may awto ka, pero wala mo ini ginamentinar. Indi magdugay maguba ini. Amo man sini ang matabo sa imo lawas. Ano nga “pagmentinar” ang himuon mo sa imo lawas?

Pagpahuway.

Kon kulang ka sing tulog, daw kapoy ang imo hitsura. Nagapalangluya ka, indi makakonsentrar, kag masubo. Pero kon bastante ang imo tulog, mas mapagsik ka. Madasig ka magdaku, magauswag ang ikasarang sang imo utok, kag magabakod pa ang imo resistensia kag emosyon. Nakapahuway ka na, nakabenepisyo ka pa!

Tip: Mas maayo nga magtulog sa pareho nga oras kada gab-i.

Nutrisyon.

Madasig magdaku ang mga tin-edyer. Halimbawa, nagadoble ang kabug-aton sang kalabanan nga lalaki nga nagaedad 10 asta 17-anyos. Madasig man magdaku ang mga babayi. Nagakinahanglan ang nagadaku nga lawas sing sustansia kag enerhiya. Gani, siguraduha nga ang imo lawas bastante sa nutrisyon nga ginakinahanglan sini.

Tip: Magpamahaw gid kada aga. Kon makakaon ka antes sang inyo klase, makakonsentrar ka sing maayo kag indi ka mangin malipaton.

Pag-ehersisyo.

Ang Biblia nagasiling nga “may pulos ang pag-ihersisyo sang aton lawas.” (1 Timoteo 4:8, Ang Pulong sang Dios, APD) Magabakod ang imo mga maskulo kag mga tul-an, magapagsik ka, makontrol ang imo kabug-aton, magauswag ang ikasarang sang imo panghunahuna, magabakod ang imo resistensia, mabuhinan ang imo stress, kag mangin masinadyahon ka. Kag mahimo nga masadyahan ka pa sa imo pag-ehersisyo!

Tandai: Ang bastante nga tulog, husto nga nutrisyon, kag eksakto lang nga ehersisyo makabulig sa imo nga mangin mapagros. Kag bangod sini, mangin maayo man ang imo pag-eskwela. *

Tilawi nga himuon ini dayon. Mag-iskedyul sing masarangan mo nga ehersisyo. Obserbahi ang oras sang imo pagtulog kag ang imo ginakaon sa sulod sang isa ka bulan, kag tan-awa kon ano pa ang imo pauswagon.

“Kon maglakatlakat ako, daw nagapagsik ako bisan pa kapoy ako sa umpisa.”—Jason, New Zealand.

“Nagapati ako nga bangod ginhatag sang Dios ang pagkaon agod magpagsik ang aton lawas, gusto ko nga pinakamaayo nga pagkaon ang kaunon ko!”—Jill, Estados Unidos.

“Nagadalagan ako sing tatlo ka beses kada semana, kag nagabisikleta ako ukon nagalakat sing duha ka beses kada semana. Ang pag-ehersisyo nagapapagsik sa akon kag nagakadula ang akon stress.”—Grace, Australia.

^ par. 9 Para sa dugang nga impormasyon parte sa ikaayong-lawas, tan-awa ang kapitulo 10 sang libro nga Questions Young People Ask—Answers That Work, Volume 1, nga ginhimo sang mga Saksi ni Jehova.

Magtuon sing Dugang Pa

PAMANGKOT SANG MGA PAMATAN-ON

Ngaa Kinahanglan Ko Mag-ehersisyo?

Binagbinaga ang 3 ka benepisyo kon regular ka nga mag-ehersisyo.