Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! OKTUBRE 2012

Ang Biblia—Libro sang Sibu nga Tagna, Bahin 6

“Ang Katapusan nga mga Adlaw”

Ang Biblia—Libro sang Sibu nga Tagna, Bahin 6

Sa sining serye nga may walo ka bahin, binagbinagon sang “Magmata!” ang isa ka talalupangdon nga bahin sang Biblia—ang mga tagna ukon prediksion sini. Ini nga mga artikulo makabulig sa imo nga masabat ini nga mga pamangkot: Ang mga tagna bala sa Biblia ginhimo lang sang maalam nga mga tawo? Gingiyahan gid man bala sang Dios ang pagsulat sini? Ginaagda ka namon nga usisaon ang mga ebidensia.

NAGAKABUHI kita sa mabudlay nga mga tion. Makabati kita sing madamo nga balita halin sa bug-os nga kalibutan parte sa mga kalamidad kag mga protesta. May kahulugan bala ang mga nagakatabo karon sa kalibutan?

Mga 2,000 ka tuig ang nagligad, gintagna sang Biblia nga ang mga kagamo sa kalibutan magagrabe pa gid sa “katapusan sang sistema sang mga butang.” (Mateo 24:3) Indi ini ang “katapusan sang kalibutan” nga ginakahadlukan sang mga tawo. Sa baylo, ginalaragway sang Biblia ang mga hitabo kag mga batasan, ukon ang tanda, nga makita sa tion nga ginatawag “katapusan nga mga adlaw.” (2 Timoteo 3:1) Ginsilingan ni Jesus ang iya mga sumulunod nga kon makita nila nga “nagakahanabo ini nga mga butang,” malapit na lang nga mag-ayo ang kahimtangan. (Lucas 21:31) Binagbinaga ang pila ka tagna nga nagapakita nga lain gid ang aton tion.

Tagna 1:

“Ang pungsod magatindog batok sa pungsod.”—Mateo 24:7.

Katumanan: Sang maaga nga bahin sang ika-20 nga siglo, madamo ang nagpaabot nga magapadayon ang paghidait sa kalibutan. Gani nakibot gid ang mga tawo sang matabo ang Bug-os Kalibutan nga Inaway I kag nagsugod ang tion sang pag-inaway nga wala pa gid anay matabo. Subong sang gintagna sa libro sang Biblia nga Bugna, ‘ginkuha ang paghidait sa duta agod magpinatyanay sila.’—Bugna 6:4.

Ang mga ebidensia:

  • “Ang Una nga Bug-os Kalibutan nga Inaway sang 1914 nagpabag-o gid sang kahimtangan sa kalibutan.”—The Origins of the First World War, ginbalhag sang 1992.
  • Bisan pa indi masigurado kon pila gid ang napatay sa Bug-os Kalibutan nga Inaway I, ginabulubanta sang isa ka ensiklopedia nga 8,500,000 ka soldado ang napatay.
  • Mas madamo ang napatay sa Bug-os Kalibutan nga Inaway II kay mga 35 ka milyon asta 60 ka milyon ka soldado kag sibilyan ang napatay.
  •   Pagkatapos sang ikaduha nga bug-os kalibutan nga inaway asta sang tuig 2010, may 246 ka inaway nga natabo sa 151 ka lugar sa bug-os nga kalibutan.

Tagna 2:

“May kakulang sa kalan-on.”—Mateo 24:7.

Katumanan: Mga 70 ka milyon ka tawo ang napatay sang ika-20 nga siglo tungod sa gutom kag problema gihapon ini sa bug-os nga kalibutan.

Ang mga ebidensia:

  • Suno sa United Nations, sa bug-os nga kalibutan, ang gutom amo ang pinakadaku nga peligro sa lawas, kag 1 sa 7 ka tawo ang kulang sing pagkaon.
  • “Ang kabangdanan sang kakulang sing pagkaon indi ang pagkapierde sang mga pananom bangod sa malain nga panahon, kundi ining apat ka problema nga madugay na kag nagagrabe pa: pagdamo sang populasyon, naab-ab nga duta, kakulang sing tubig kag sobra nga init.”—Scientific American.

Tagna 3:

“May mabaskog nga mga linog.”—Lucas 21:11.

Katumanan: Bangod madamo nga tawo ang nagaistar sa ginalinugan nga mga lugar, nagdamo pa ang napatay kag nahalitan tungod sa linog.

Ang mga ebidensia:

  • Ang World Disasters Report 2010 nagsiling: “Sa tanan nga grabe nga mga kalamidad, mas madamo ang napatay sa linog sining nagliligad nga mga tinuig.”
  • Halin sang 1970 asta 2001, mga 19 ka linog * ang natabo kada tuig, kag 19,547 ang aberids nga napatay. Pero sa sulod lang sang napulo ka tuig antes sang 2012, mga 28 ka linog ang natabo kada tuig, kag 67,954 ang aberids nga napatay.

Tagna 4:

“Sa nagkalainlain nga duog may mga peste.”—Lucas 21:11.

Katumanan: Bisan pa nag-uswag ang medisina, minilyon gihapon ang nagakapatay kada tuig bangod sa makalalaton nga mga balatian. Posible nga magalapta sing madasig ang epidemya nga mga balatian bangod sang paglakbay sa lainlain nga mga pungsod kag pagdamo sang populasyon sa mga siudad.

Ang mga ebidensia:

  • Mga 300 ka milyon asta 500 ka milyon ka tawo ang napatay tungod sa smallpox ukon buti sang ika-20 nga siglo.
  • Ang Worldwatch Institute nagreport nga sang nagligad nga tatlo ka dekada, “sobra sa 30 ka balatian nga wala pa mahibaluan anay pareho sang Ebola, HIV, Hantavirus, kag SARS ang peligruso karon.”
  • Ang World Health Organization nagpaandam parte sa pagdamo sang mga kagaw nga indi madutlan sang bulong, kag nagsiling ini: “Nagapadulong ang kalibutan sa tion nga madamo sang kinaandan kag makalalaton nga balatian ang indi na mabulong kag madamo nga tawo ang mapatay, bangod indi na madutlan sang mga antibiotic ang mga kagaw.”

Tagna 5:

Ang mga tawo ‘magaluibay kag magadinumtanay. . . . Ang gugma sang kalabanan magaugdaw.’—Mateo 24:10, 12.

Katumanan: Minilyon ang napatay sa ubusay sang rasa bangod sa dumot. Sa madamo nga pungsod, ang mga inaway kag mga krimen nagresulta sa wala untat nga pagpamintas kag kahadlok.

Ang mga ebidensia:

  • Anom ka milyon ka Judiyo kag minilyon ka iban pa ang ginpatay sang panguluhan sang mga Nazi. Ang isa ka awtor nga si Zygmunt Bauman nagsiling parte sa reaksion sang ordinaryo nga mga pumuluyo: “Naghipos lang ang mga tawo bisan pa madamo ang ginpamatay.”
  • Suno sa BBC News, ginabulubanta nga mga 800,000 ka Tutsi kag madamodamo man  nga Hutu ang napatay sa sulod sang pila lang ka bulan. Ginbulubanta sang isa ka researcher nga mga 200,000 ka tawo ang nagpakigbahin sa sini nga pagpamatay.
  • Kada tuig, sobra sa 740,000 ka tawo ang nagakapatay bangod sa mga krimen kag inaway.

Tagna 6:

“Ang mga tawo mangin mahigugmaon sa kaugalingon, mahigugmaon sa kuarta, . . . wala sing kinaugali nga pagpalangga.”—2 Timoteo 3:2, 3.

Katumanan: Ang mga tawo sa aton tion makagod kag nagapinagusto lang. Nagresulta ini sa madamo nga problema.

Ang mga ebidensia:

  • Ang report sang UNICEF sa United Kingdom parte sa pag-atipan sa bata nagsiling nga ang mga ginikanan kag mga kabataan sa ila pungsod “daw wala untat nga nagapamalaklon.” Ang mga pamilya nagapamalaklon “agod matakpan ang mga problema sa pamilya kag kakulang sing pagsalig sa mga tawo.”
  • Mga 275 ka milyon ka kabataan sa bug-os nga kalibutan ang apektado sang pagpamintas sa sulod sang pamilya.
  • “Sa Estados Unidos lamang, sobra sa 500,000 ka tigulang ang ginapatihan nga ginaabuso ukon ginapatumbayaan kada tuig.”—Centers for Disease Control and Prevention.

Tagna 7:

“Ining maayong balita sang ginharian ibantala sa bug-os napuy-an nga duta.”—Mateo 24:14.

Katumanan: Ginatudlo sang Biblia nga ang Ginharian sang Dios isa ka matuod nga gobierno, nagagahom sa langit, kag si Jesus ang Hari sini. Ining langitnon nga Ginharian ‘magadugmok kag magapapas sang tanan nga [gobierno sang tawo] kag magapadayon ini sa gihapon.’—Daniel 2:44.

Ang Ginharian sang Dios kag kon ano ang himuon sini amo ang panguna nga mensahe nga ginatudlo sang mga Saksi ni Jehova sa bug-os nga kalibutan.

Ang mga ebidensia:

  • Ang sobra sa pito ka milyon nga mga Saksi ni Jehova sa sobra sa 230 ka pungsod sa bug-os nga kalibutan nagatudlo sa mga tawo parte sa Ginharian sang Dios.
  • Paagi sa naimprinta nga mga balasahon kag sa Internet, ang mga Saksi ni Jehova nagahatag sing impormasyon halin sa Biblia sa sobra sa 500 ka lenguahe.

Ang Tanda kag ang Imo Palaabuton

Pagkatapos mausisa ang mga ebidensia, minilyon ang nagapati nga ang tanda nga ginsiling sang Biblia parte sa katapusan nga mga adlaw nagakatuman na. Subong ginapakita sang una nga anom ka artikulo sini nga serye, ginapamatud-an sang kasaysayan nga ang Biblia isa gid ka libro sang matuod nga mga tagna.

Makasiguro ka nga masaligan gid ang mga tagna sang Biblia parte sa palaabuton. Nadalahig ka sa sini nga mga tagna, kay nagpromisa ang Dios nga dulaon niya ang mabudlay nga mga kahimtangan sa sining katapusan nga mga adlaw. Ipaathag sang nabilin nga duha ka artikulo sini nga serye kon paano matapos ang “katapusan nga mga adlaw” kag kon ano ang matahom nga palaabuton sang duta kag sang katawhan.

^ par. 22 Suno sa Centre for Research on the Epidemiology of Disasters, ang linog matawag nga kalamidad kon ang resulta sini isa sa masunod: 10 ka tawo ukon sobra pa ang napatay, 100 ka tawo ukon sobra pa ang naapektuhan, nagdeklarar sing state of emergency, ukon nagpangayo sing bulig sa iban nga pungsod.

Magtuon sing Dugang Pa

Ngaa Dapat Tun-an ang Biblia?

Minilyon karon sa bilog nga kalibutan ang nakakita sang sabat sa importante nga mga pamangkot sa kabuhi sa bulig sang Biblia. Gusto mo man bala?

Paano Ginahimo ang Pagtuon sa Biblia?

Sa bilog nga kalibutan, ang mga Saksi ni Jehova kilala sa ila ginatanyag nga libre nga pagtuon sa Biblia. Tan-awa kon paano ini ginahimo.