Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! SEPTIEMBRE 2012

 Pamangkot sang mga Pamatan-on

Ano ang Ginapaabot Ko sa Pag-asawahay?—Bahin 1

Ano ang Ginapaabot Ko sa Pag-asawahay?—Bahin 1

“Kon updanay kami, daw nagalutaw ako sa panganod! Gusto ko na gid nga makasal kami!”

“Wala gid kami nagasahuay. Daw indi kami mag-asawa. Daw mag-boardmate lang kami. Nasubuan gid ako!”

MAHIMO nga napaktan mo na nga ang sa ibabaw ginhambal sang dalaga, kag ang sa wala ginhambal sang may bana na. Pero mahimo makibot ka nga amo lang gihapon nga babayi ang naghambal sini.

Ano ang problema? Kon nagahandum ka nga mamana ukon mangasawa sa ulihi, paano mo malikawan nga mangin masubo ang imo ginadamgo nga malipayon nga pag-asawahay?

Ang matuod: Ang inyo kalipay sa pag-asawahay nagadepende sing daku sa imo mga ginapaabot.

Ini nga artikulo—kag ang “Pamangkot sang mga Pamatan-on” sa masunod nga Magmata!—makabulig sa imo nga mangin realistiko sa imo mga ginapaabot.

 Ano ang realistiko nga mapaabot mo sa pag-asawahay? Ari ang pila:

  1. Paabuta nga may mga kaayuhan
  2. Paabuta nga may mga kabudlayan
  3. Paabuta ang mga wala mo ginapaabot

Binagbinagon naton ang kada isa sini.

PAABUTA NGA MAY MGA KAAYUHAN

Positibo ang pagtamod sang Biblia parte sa pag-asawahay. (Hulubaton 18:22) Ang masunod amo ang pila sa mga kaayuhan nga mapaabot mo.

Kaupod. Suno sa Biblia, sa tapos gintuga ang una nga tawo nga si Adan, ang Dios nagsiling: “Indi maayo nga ang tawo mag-isa lamang.” Gani, gintuga sang Dios si Eva para mangin kaupod ni Adan. (Genesis 2:18) Ang kada isa sa ila gintuga nga may pinasahi nga kinaiya. Magkatuhay sila pero nagasahuay. Gani ang asawa kag bana maayo gid nga kaupod para sa isa kag isa.—Hulubaton 5:18.

Kabulig. Ang Biblia nagsiling: “Ang duha mas maayo sang sa isa, kay sila nga duha makapangabudlay sing labing maayo.” (Manugwali 4:9, HPV) Matuod ini sa pag-asawahay. “Kinahanglan gid ang pagbuligay kag pagkamapainubuson kag kon kaisa pagpaumod,” siling sang bag-o lang namana nga si Brenda. *

Seksuwal nga kaangtanan. Ang Biblia nagsiling: “Dapat ihatag sang bana ang seksuwal nga kinahanglanon sang iya asawa, kag amo man ang himuon sang asawa sa iya bana.” (1 Corinto 7:3, Common English Bible) Ang mga minyo maka-sex nga wala nagakabalaka ukon nagahinulsol, nga amo sa masami ang resulta kon himuon ini sang mga wala makasal.—Hulubaton 7:22, 23; 1 Corinto 7:8, 9.

Tandai: Ang pag-asawahay regalo sang Dios. (Santiago 1:17) Kon sundon mo ang iya mga prinsipio, mapaabot mo nga ang pag-asawahay mangin makalilipay gid.

Binagbinaga ini: Negatibo bala ang imo pagtan-aw sa pag-asawahay bangod sa indi maayo nga halimbawa nga nakita mo—mahimo sa imo pamilya? Kon amo, sin-o ang maayo nga mga halimbawa nga puede mo ilugon?

 PAABUTA NGA MAY MGA KABUDLAYAN

Realistiko ang pagtamod sang Biblia sa pag-asawahay. (1 Corinto 7:28) Ang masunod amo ang pila sa mga kabudlayan nga mapaabot mo.

Indi pag-intiendihanay. Wala sing duha ka tawo nga pareho gid, luwas lang nga pareho sila nga indi himpit. (Roma 3:23) Gani bisan pa nagasahuay ang mag-asawa, may mga tion nga indi man sila mag-intiendihanay. Kon kaisa, makahambal sila sang mga butang nga hinulsulan nila sa ulihi. “Ang wala nagasayop sa iya ginahambal isa ka himpit nga tawo,” siling sang Biblia. (Santiago 3:2, HPV) Sa baylo nga likawan nga indi gid magbaisay, ginatun-an sang madinalag-on nga mag-asawa nga istoryahan kag husayon ang mga indi pag-intiendihanay.

Kapaslawan. “Makita naton pirme sa mga pelikula kag palaguaon sa TV nga ang babayi makakita sang iya ‘perfect match’ kag mangin malipayon sila tubtob san-o,” siling ni Karen. Kon indi gani amo sini ang matabo, pamatyag sang mag-asawa napaslawan sila. Siempre, sa tapos sang kasal may makita pa gid sila nga diperensia sa isa kag isa. Ang sekreto amo ang pagdumdom nga ang matuod nga gugma, ‘nagabatas sang tanan nga butang,’ bisan sang mga kapaslawan.—1 Corinto 13:4, 7.

Kabalaka. Suno sa Biblia, ang mga minyo “nagakabalaka sa mga butang sang kalibutan.” (1 Corinto 7:33, 34) Natural lang kag sa masami nagakaigo ini nga kabalaka. Halimbawa, ginakabalak-an sang mag-asawa ang ila mga galastuhan. Ayhan kinahanglan nila mag-obra nga duha para sa ila pagkaon, panapton, kag puluy-an. Pero paagi sa pagbuligay para sa kinahanglanon sang pamilya, mahimo nga magamadinalag-on sila.—1 Timoteo 5:8.

Tandai: Kon ang pagnobyahanay kaangay sa pagpalupad sang borador, ang pag-asawahay kaangay sa pagpalupad sang eroplano. Mas daku nga ikasarang kag panikasog ang kinahanglan sa pag-atubang sa mga kabudlayan—pero mahimo ka magmadinalag-on.

Binagbinaga ini: Ano ang imo ginahimo subong kon indi kamo mag-intiendihanay sang imo ginikanan ukon mga utod? Realistiko bala ang imo pag-atubang sa mga kapaslawan? Paano mo ginaatubang ang mga kabalaka?

SA MASUNOD NGA “PAMANGKOT SANG MGA PAMATAN-ON” . . . Paano makabulig sa imo ang mga prinsipio sa Biblia sa pagpaabot sa mga wala mo ginapaabot?

^ par. 17 Gin-islan ang iban nga ngalan sa sini nga artikulo.