Matun-an Mo nga Mangin Mahidaiton

BISAN pa natawo kita nga may malain nga mga huyog, ang bayolente nga mga batasan masami nga natun-an lang. Amo man sini ang pagkamahidaiton. Kon amo, sin-o ang makatudlo sa aton sang matuod nga paghidait? Sigurado gid nga ang may kinamatarong nga magtudlo sa aton amo ang aton Manunuga, kay ang iya kaalam indi matupungan. Binagbinaga ang masunod nga lima ka punto kag ang maalamon nga mga laygay sang Biblia.

1 “Indi ka magkahisa sa mapintas nga tawo.” (Hulubaton 3:31, Ang Pulong sang Dios, APD) Ang matuod nga mabakod nga tawo nagapakita sing mga kinaiya subong sang pagpugong sa kaugalingon kag kalulo. “Ang makuli sa pagpangakig maayo pa sa gamhanan,” siling sang Hulubaton 16:32. Pareho sang mabakod nga pader sang isa ka dam, masarangan niya ang makapaakig nga mga sitwasyon. Ginaatubang niya ini nga may kalulo, kag gani “nagapadula sang kaakig.” (Hulubaton 15:1, BKK) Pero ang maakigon nga tawo, nagalupok dayon bisan sa gamay lang nga diperensia.—Hulubaton 25:28.

2 Pilia sing maayo ang imo kaupdanan. “Ginahaylo sang mapintas nga tawo ang iya isigkatawo,” suno sa Hulubaton 16:29 (NW). Pero, ang ‘nagalakat upud sa maalam nga mga tawo manginmaalam.’ (Hulubaton 13:20) Huo, kon ang aton kaupdanan mahidaiton, malulo, kag may pagpugong sa kaugalingon, mahimo gid nga ilugon man naton sila.

3 Tun-i nga ipakita ang matuod nga gugma. Ang pinakamaayo nga paglaragway sa gugma makita sa 1 Corinto 13:4-7. Ang bahin sini mabasa: “Ang gugma mapinasensiahon kag mainayuhon. . . . Indi ini maakigon. Wala ini nagaisip sang kahalitan. . . . Ginaagwanta sini ang tanan nga butang, ginapatihan ang tanan nga butang, . . . ginabatas ang tanan nga butang.” Suno kay Jesus, kon gusto naton ilugon ang gugma sang Dios, higugmaon man naton ang aton mga kaaway.—Mateo 5:44, 45.

4 Magsalig nga hukman sang Dios ang mga malaut. “Indi magbalos sang malaut sa malaut kay bisan sin-o. . . . Tubtob sa masarangan ninyo, magpakighidait sa tanan nga tawo. Indi kamo magtimalos, mga hinigugma, . . . kay nasulat na: ‘Akon ang pagtimalos; ako ang magabalos, siling ni Jehova.’” (Roma 12:17-19) Kon may pagtuo kita sa Dios kag sa iya mga promisa, may kalinong kita kag indi ini maintiendihan sang mga tawo nga wala sing pagtuo.—Salmo 7:14-16; Filipos 4:6, 7.

5 Maglaum nga ang Ginharian sang Dios magadala sing matuod nga paghidait sa duta. Ang Ginharian sang Dios isa ka gobierno sa langit. Sa indi madugay dulaon sini ang tanan nga kalautan kag magagahom ini sa bug-os nga duta. (Salmo 37:8-11; Daniel 2:44) Sa sini nga Ginharian, “magalambo ang matarung,” kag may “bugana nga paghidait, tubtub nga wala na ang bulan!”—Salmo 72:7.

Ini nga mga panudlo sang Biblia nakabulig sa minilyon ka tawo nga mangin mahidaiton, lakip ang mga may masingki anay nga kinaiya. Binagbinaga ang halimbawa ni Salvador Garza.