MADAMO nga tawo ang may ginakadtuan gid nga mga lugar para mangamuyo sa Dios. Ang iban nagabiyahe pa sing malayo. Sa banta mo, dapat ka bala magkadto sa templo, simbahan, ukon shrine para mangamuyo? Ukon puede ka makapangamuyo bisan diin kag bisan ano oras? Ano ang ginasiling sang Biblia?

Sang panahon nanday Adan kag Eva, wala pa sing lugar nga ginasimbahan. Nagaistar sila sa isa ka matahom nga hardin. (Genesis 2:8) Pero, makapakigkomunikar sila sa ila Manunuga nga si Jehova nga Dios. Sang nagdamo na ang tawo, ang mga matarong pareho ni Noe, “naglakat upud sa Dios”—bisan wala pa sing mga simbahan sadto. (Genesis 6:9) Pirme sila nagapangamuyo kag ginahigugma nila si Jehova amo nga nahamuot sia sa ila.

Ang Dios Wala Nagaistar sa mga Tinukod nga Ginhimo sang Tawo

Nahibaluan sang matutom nga mga tawo sang una nga ang Manunuga sang duta kag sang uniberso wala nagaistar sa mga tinukod nga ginhimo sang tawo. “Matuud gid bala nga ang Dios magapuyo upud sa mga tawo sa duta?” pamangkot sang maalam nga si Hari Solomon. “Yari karon, ang langit kag ang langit sang mga langit indi makaigo sa imo,” siling niya. (2 Cronica 6:18) Matuod nga ang mga Israelinhon sadto may tabernakulo kag sang ulihi may templo diin nagatipon sila kon may mga kapiestahan kada tuig, suno sa Kasuguan sang Dios. (Exodo 23:14-17) Pero, makapangamuyo sila sa Dios bisan ano oras, nagabantay man sila sang ila panong, nagaobra sa uma, nagatipon upod sa ila pamilya, ukon nagaisahanon.—Salmo 65:2; Mateo 6:6.

Gani, makapangamuyo man kita sa Dios bisan diin kag bisan ano oras. Ang aton halimbawa, si Jesucristo, masami nga nagakadto sa malinong nga mga lugar para mangamuyo. (Marcos 1:35) Halimbawa, sang isa ka bes, “nagkadto sia sa bukid agod mangamuyo, kag nagpadayon sia sa pagpangamuyo sa Dios sa bug-os nga gab-i.”—Lucas 6:12.

Subong isa ka Judiyo, si Jesus nagatambong gid sa mga kapiestahan nga ginahiwat sa templo sa Jerusalem. (Juan 2:13, 14) Pero, nagsiling sia nga maabot ang tion nga ang templo indi na amo ang sentro sang matuod nga pagsimba. Sang nag-istorya sia sa isa ka Samariahanon nga babayi malapit sa bukid sang Samaria, diin may templo sila, si Jesus nagsiling: “Magaabot ang tion nga magasimba kamo sa Amay indi sa sini nga bukid ukon sa Jerusalem.” Dayon nagsiling sia nga ang matuod nga mga sumilimba “magasimba sa Amay sa espiritu kag kamatuoran.”—Juan 4:21, 23.

Ginapakita sini nga para kay Jesus ang matuod nga pagsimba wala nagadepende sa mga tinukod kundi sa sinsero nga tagipusuon. Buot bala silingon nga ang mga sumulunod ni Jesus nga gintawag sang ulihi nga mga Cristiano wala sing lugar nga ginatipunan para magsimba? (Binuhatan 11:26) Indi. May ara sila mga tilipunan kag may katuyuan ini.

Ang Katawhan sang Dios Isa ka Espirituwal nga Pamilya

Ang matuod nga mga sumilimba sang Dios isa ka pamilya—espirituwal nga pamilya. (Lucas 8:21) Ang isa ka maayo nga pamilya nagaupdanay  pirme, subong abi sa pagkaon, kag nagapasuod ini sa ila. Amo man sini sa espirituwal. Ang pagtilipon sang mga Cristiano pareho sa isa ka espirituwal nga kapiestahan nga nagapabakod kag nagapasuod sa kada isa. Ang Cristiano nga si apostol Pablo nagsulat: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa.”—Hebreo 10:24, 25.

Gani, nahibaluan sang matuod nga mga sumilimba nga importante ang kongregasyon. Kay man, ginabuligan sini ang kada miembro nga matun-an ang mga kinaiya sang isa ka Cristiano, nga mabudlay himuon kon nagaisahanon ka lang. Nalakip sa sini ang gugma, pagpatawad, kaayo, kalulo, kag paghidait.—2 Corinto 2:7; Galacia 5:19-23.

Sa diin nagatipon kag nagasimba ang mga Cristiano sang una? Sa masami, nagatipon sila sa mga balay. (Roma 16:5; Colosas 4:15) Halimbawa, sang ginsulatan ni apostol Pablo ang isa man ka Cristiano, nagsiling sia nga para man ini “sa kongregasyon nga yara sa imo balay.” *Filemon 1, 2.

Subong, indi man kinahanglan sang katawhan sang Dios ang magarbo nga mga tinukod, kundi isa lang ka komportable nga lugar nga puede tipunan. Ang mga Saksi ni Jehova nagatipon sa amo sini nga mga lugar nga ginatawag nila Kingdom Hall. Mahimo gid nga may Kingdom Hall malapit sa inyo. Praktikal kag indi magarbo ini nga mga tilipunan. Ang mga miting nga ginahiwat diri simple lang—may ambahanon, pangamuyo, kag pagbinagbinag sa Biblia.

Importante para sa mga Saksi ni Jehova ang ila pribado nga tion sa pagpakigkomunikar sa Dios. Gani, kada adlaw may tion gid sila sa pagpangamuyo sing isahanon ukon upod sa ila pamilya. Ang Santiago 4:8 nagsiling: “Magpalapit kamo sa Dios, kag magapalapit sia sa inyo.”

[Nota]

^ par. 13 Ang orihinal nga Griegong tinaga para sa “kongregasyon” gin-translate nga “simbahan” sa pila ka Ingles nga Biblia.

NAMANGKOT KA BALA?

● Nagaistar bala ang Dios sa mga tinukod nga ginhimo sang tawo?—2 Cronica 6:18.

● Diin nangamuyo si Jesus sa bug-os nga gab-i?—Lucas 6:12.

● Ngaa nagatipon ang matuod nga mga sumilimba?—Hebreo 10:24, 25.

[Blurb sa pahina 15]

May mga lugar gid bala nga dapat mo kadtuan para mas pamatian ang imo pangamuyo?