Ang Masakit nga Epekto sang Inhustisya!

SANG 2010 sa Texas, U.S.A., ginpagua si Michael matapos ang 27 ka tuig nga pagkabilanggo sa kaso nga pagpanglugos—ang krimen nga wala niya ginhimo. Ginhilway sia sang napamatud-an nga wala sia sing sala paagi sa DNA test, nga wala pa sadto sang ginpamatbatan sia. Sang ulihi nakilal-an ang matuod nga mga nanglugos pero wala na sila ginkasuhan kay suno sa korte malawig na katama ang tion nga nagligad.

Madamo nga kriminal ang nakapalagyo sa hustisya. Halimbawa sa Britanya, “nagdoble ang kadamuon sang wala masolbar nga kaso sang pagpatay sang nagligad nga dekada, gani madamo ang nahadlok nga basi indi na masolbar sang mga pulis kag korte ang masingki nga mga krimen,” siling sang The Telegraph.

Sang Agosto 2011, gintinguhaan sang mga pulis sa Britanya nga kontrolon ang isa pa ka klase sang krimen—ang pag-riot sa Birmingham, Liverpool, London, kag sa iban pa nga lugar. Isa ka akig nga grupo ang nagpangsunog, nagpangguba, kag nagpangawat, amo nga nahalitan nila ang mga negosyo, balay, salakyan, kag pati na ang palangabuhian sang iban. Ngaa ginhimo nila ini? Para sa madamo, bangod ini sa kakagod. Pero para sa iban, sabat ini sa ila ginabatyag nga inhustisya. Ang pila ka komentarista nagsiling nga mahimo nainit yadto nga mga pamatan-on kay “ginapabay-an” sila sang gobierno amo nga pigado sila kag daw wala na sing buas-damlag.

Sa Biblia, si Job nagsiling: “Nagasinggit ako sing tabang, apang wala sing katarungan.” (Job 19:7) Sa karon, madamo man ang nagasinggit para sa hustisya pero sa masami wala sila ginapamatian. May makadula gid man bala sang inhustisya? Ang paglaum nga sa ulihi wala na sing inhustisya isa lamang bala ka imahinasyon? Agod masabat ini, usisaon naton ang pila ka kabangdanan sang inhustisya.