MADAMO nga tawo ang nagabatyag nga wala ginapabaloran sang iban ang ila mga panikasog. Halimbawa, nagabatyag ang mga trabahador nga wala sila ginaapresyar sang ila mga amo. Madamo nga asawa ukon bana ang nagapati nga indi na sila palangga sang ila mga tiayon. Ang pila ka kabataan naman, nagahunahuna nga indi gid nila mapahamut-an ang ila mga ginikanan. Sigurado gid nga maumpawan sila kon handa kita pirme sa paghatag sing komendasyon sa ila.

Ang sinsero nga komendasyon indi na uso karon. Indi gid ini makapakibot kay ang Biblia nagtagna: “Sa katapusan nga mga adlaw magaabot ang makahalanguyos nga mga tion nga mabudlay atubangon. Kay ang mga tawo mangin mahigugmaon sa kaugalingon, . . . di-mapinasalamaton, di-mainunungon.”—2 Timoteo 3:1, 2.

Nakabaton ka na bala sing sinsero nga komendasyon? Indi bala nga nalipay ka kag napalig-on? “Ang polong sa nagakaigo nga dag-on, daw ano kaayo!” siling sang Biblia. (Hulubaton 15:23) Mabuligan kita sang Biblia kon paano mangin mainayuhon sa isa kag isa.

Tan-awa ang Maayo nga mga Batasan

Bangod interesado ang Dios sa aton, nakita kag naapresyar gid niya ang aton maayo nga mga batasan kag mga ginahimo. Ang Biblia nagapasalig sa aton: “Kay nagatan-aw gid ang GINOO sa bug-os nga kalibutan agod pabaskugon ang mga tawo nga matutom gid sa iya.” (2 Cronica 16:9, APD) Kon ginapakita naton ang aton gugma sa Dios paagi sa pagtuman sa iya kasuguan, makita gid niya ini.

Si Jehova nga Dios wala nagapangita sa aton sang mga sala. Kay kon himuon niya ini, wala sing may makatindog sa aton. (Salmo 130:3) Sa baylo, si Jehova pareho sa isa ka minero nga mauti nga nagapangita sang bilidhon nga hiyas sa nagatumpok nga mga bato. Kon makita na niya ang hiyas, malipay gid sia. Ang mga bato indi bilidhon, pero nakita sang minero ang natago nga hiyas sini. Pareho man sini ang ginahimo sang Dios kon nagausisa sang aton tagipusuon. Ginatan-aw niya ang maayo nga mga kinaiya, indi ang malain. Kon makita niya ini, malipay gid sia. Nahibaluan niya nga kon mapauswag naton ini nga mga kinaiya, mangin bilidhon gid kita—isa ka matutom kag debotado nga sumilimba ni Jehova.

Makatuon kita sa halimbawa sang Dios. Kon nagatan-aw kita sa iban, masami nga malain nga batasan ang makita naton. Pero kon ilugon naton si Jehova, makita naton ang ila maayo nga mga kinaiya. (Salmo 103:8-11, 17, 18) Kon makita na naton ini, hatagan naton sila sing komendasyon. Ano ang resulta? Sigurado nga malipay sila kag magatinguha pa gid nga himuon ang maayo! Mangin malipayon man kita sa paghatag sing komendasyon.—Binuhatan 20:35.

Dayawa ang Maayo nga Binuhatan

Pirme nakita kag ginadayaw ni Jesus ang maayo nga binuhatan sang iban. Isa ka bes, sang gintandog sang hinadlukan nga masakiton nga babayi ang iya bayo para mag-ayo, gindayaw sia ni Jesus nga nagasiling: “Anak, ang imo pagtuo nag-ayo sa imo.”—Marcos 5:34.

Sa isa pa ka higayon, sang nagatudlo si Jesus sa templo sa Jerusalem, nakita niya ang madamo nga manggaranon nga nagahulog sing kuarta sa bahandian. Dayon, nakita niya ang imol nga balo nga naghulog “sang duha ka gamay nga sensilyo nga may tuman ka diutay nga balor.” Mas daku ang ginhulog sang iban sangsa iya. Pero gindayaw ni Jesus sa atubangan sang mga tawo ang pagkasinsero sang balo nga nagasiling: “Sa pagkamatuod nagasiling ako sa inyo, Ini nga balo  nga babayi, bisan pa imol, naghulog sing kapin pa sa ila tanan. Kay sila tanan naghulog sang mga dulot gikan sa ila mga sobra, apang ini nga babayi gikan sa iya kinawad-on naghulog sang iya bug-os nga palangabuhian.”—Lucas 21:1-4.

Paano naton mailog si Jesus? Nagsiling ang Biblia: “Dili pagpunggi ang maayo gikan sa ila sa diin naigo ini, kon ini yara sa gahum sang imo mga kamut sa paghimo sini.”—Hulubaton 3:27.

Daku Gid ang Epekto sang Komendasyon

Sa karon, indi uso ang pagpasalamat, gani kinahanglan gid naton ang apresasyon kag gugma. Kon sinsero naton nga ginahatagan sing komendasyon ang iban, mapabakod naton sila. Ang aton sinsero nga pagdayaw magapalig-on sa ila nga ipadayon ang paghimo sang ila pinakamaayo.—Hulubaton 31:28, 29.

Ginpalig-on sang Biblia ang tanan nga Cristiano: “Hunahunaon naton ang isa kag isa agod pahulagon sa gugma kag sa maayong mga buhat.” (Hebreo 10:24) Lain gid ang kahimtangan sang kalibutan kon ang tanan nagapakita sing personal nga interes sa iban, nagatan-aw sang maayo nila nga mga batasan, kag ginadayaw ang ila maayo nga binuhatan. Daku gid ang epekto sang komendasyon!

NAMANGKOT KA BALA?

● Ngaa dapat naton hatagan sing komendasyon ang iban sa ila maayo nga binuhatan?—Hulubaton 15:23.

● Kon ginatan-aw kita ni Jehova, ano ang iya ginapangita?—2 Cronica 16:9.

● San-o naton dapat hatagan sing komendasyon ang iban?—Hulubaton 3:27.

[Retrato sa pahina 29]

Ginatan-aw kag ginadayaw mo bala ang maayo nga binuhatan sang iban?