Magdiretso sa kaundan

Magdiretso sa listahan sang kaundan

Pagbantay sa Kalibutan

Pagbantay sa Kalibutan

 Pagbantay sa Kalibutan

Sugod sang 1862, “subong ang pinakamanubo nga kadamuon sang mga nagapakasal sa England kag Wales.”—OFFICE FOR NATIONAL STATISTICS, BRITANYA.

Sobra sa katunga sang mga manedyer sa gamay kag pribado nga mga kompanya sa Estados Unidos ang “nagapaabot nga mangawat ang mga empleyado [sa ila kompanya] sa sulod sang isa ka tuig.”—REUTERS NEWS SERVICE, U.S.A.

Wala pa isa ka tuig nga ginsugdan ang kampanya batok sa pornograpiya sa Internet, ang mga awtoridad sa China “nakapasira na sing sobra sa 60,000 ka Web site,” siling sang National Office Against Pornographic and Illegal Publications.—CHINA DAILY, CHINA.

“Sobra sa 215 milyones ka tawo—ukon tres porsiento sang populasyon sang kalibutan—ang [nagaistar] subong sa iban nga pungsod.”—UNITED NATIONS INTERNATIONAL FUND FOR AGRICULTURAL DEVELOPMENT, ITALYA.

“Sa 19 ka estudyante nga nagahikog kada adlaw sa India, anom sa ila ang nahadlok nga indi makapasar sa mga eksam.”—INDIA TODAY INTERNATIONAL, INDIA.

Estratehiya sa mga Sugalan

Ang mapierde sang isa ka sugarol sa Germany ginabulubanta nga sobra sa napulo ka pilo sangsa mapierde sang talagsa lang nagasugal. Gani ang mga sugarol amo ang “nagabuhi sa sini nga mga negosyo,” siling sang pamantalaan nga Süddeutsche Zeitung. Para magdaku pa gid ang kita sang mga sugalan, nagdesinyo sila sing mga hampang kag mga halampangan nga makaaladik. Samtang nagadasig ang hampang, nagakabuhinan ang kontrol sang isa sa iya kaugalingon kag mas nagakaadik sia. Epektibo gid ini kay ang 56 porsiento nga kita sang mga slot machine naghalin sa mga sugarol. Sa mga kasino, 38 porsiento; kag sa Internet, 60 porsiento.

Maayo nga Oras sa Pag-atubang sa Hukom?

Ang mga butang bala nga wala sing labot sa kaso makaapektar sa desisyon sang hukom? Huo, suno sa isa ka pagtuon. Gintun-an sang isa ka grupo sang mga researcher ang sobra sa 1,000 ka parol nga ginpapanaug sang eksperiensiado nga mga hukom sa Israel. Natukiban sang pagtuon nga pagkatapos makapanyaga ukon makamerienda ang mga hukom, mga 65 porsiento ang ginahatagan sing parol. Amat-amat ini nga naganubo asta nga halos wala na sing ginahatagan sing parol, dayon gulpi ini nga nagabalik sa 65 porsiento pagkatapos sang ila break. Naghinakop ang mga researcher nga ang mga desisyon indi pirme nabase sa kamatuoran kag kasuguan, kundi “mahimo ini maapektuhan sang iban nga butang nga wala sing labot sa kaso.”