Pagpakigkomunikar!

● Binagbinaga ini nga sitwasyon. Ginasuyaan si Sam sang mga tawo kay sa sulod sang pila ka tuig indi sia gihapon gusto maggamit sing bag-o nga teknolohiya para makakomunikar sa iya mga paryente kag mga abyan. Ang tanan, pati na ang iya tin-edyer nga mga bata, gusto maggamit sing bag-o nga teknolohiya. Si Sam naglahog sa iya 16 anyos nga bata nga babayi, “Maayo pa sang una kay personal nga nagaistoryahanay ang mga tawo.”

Dayon, namensar liwat si Sam. Nadumduman niya ang mga tawo nga tinuig na nga wala niya makita ukon maistorya. Nadumduman man niya ang ila mga paryente nga sa sobra nga kasakuon daw wala na sia sing balita sa ila. ‘Kon gusto ko makigkomunikar sa ila,’ sa pensar ni Sam, ‘dapat siguro magamit na ako sing moderno nga komunikasyon.’ Tungatunga na sadto sang ika-20 nga siglo sa kaumhan sang Estados Unidos, amo pa lang kag nagpasugot si Sam nga magpatakod sing telepono.

Masaylo kita sa tuig 2012. Ang apo ni Sam nga si Nathan bag-o lang nakatapos istorya sa telepono kanday Roberto kag Angela, ang iya mga abyan nga nagsaylo sa malayo nga pungsod. ‘Baw, pulo na sila ’to ka tuig!’ Sa pensar ni Nathan nga daw nakibot sa kadasig sang tion.

Sa sulod sang pila ka tuig, kontento na si Nathan nga tawgan sia sang iya mga paryente kag mga abyan nga nagsaylo sa iban nga lugar. Pero subong, halos tanan, pati ang tin-edyer niya nga mga bata, nagagamit na sing social network.

Ginasuyaan si Nathan kay indi sia maggamit sing bag-o nga mga teknolohiya. “Maayo pa sang una kay maistorya mo ang tawo sa telepono kag mabatian ang iya tingog,” siling niya. Pero subong, nagapamensar na si Nathan: ‘Kon gusto ko makigkomunikar sa akon mga kilala, dapat siguro magamit na ako sing moderno nga komunikasyon.’

Pareho man bala kay Nathan ang imo ginabatyag? Natural lang nga gusto sang tawo makigkomunikar sa iban. (Genesis 2:18; Hulubaton 17:17) Bangod madamo na ang nagagamit sing mga social network, ano ang dapat mo mahibaluan parte sa sini?