Pagbantay sa Kalibutan

Suno sa 76.3 porsiento sang mga adulto sa Germany, “wala sing malain” sa pagpa-flirt kag “wala ini nagapahangop nga gusto sang isa makigrelasyon.” Halos katunga sa mga ginsurbe ang nagsiling nga wala sing problema kon magpa-flirt ang mga may asawa ukon bana sa mga indi nila kilala.—APOTHEKEN UMSCHAU, GERMANY.

Ginapakita sang surbe sa bilog nga Rusya nga 48 porsiento sa mga Ruso ang nagsiling nga “ginapaabot gid” nila ang pag-atake sang mga terorista kag “bahin na ini sang ila kabuhi.”—KOMMERSANT, RUSYA.

“Sa pag-ilog sa pamaagi sang pagsalakay sang una sa napaderan nga mga banwa,” ang Mexicano nga mga ismagler karon naggamit sing daan nga pamaagi para malutsan ang mga guardia sa dulunan. Nagagamit sila sing “isa ka daku nga catapult” nga may mabakod nga goma kag naplastar sa treyler para mapalapaw sa pader sang dulunan sang U.S. ang mga droga pakadto sa aminhan.—REUTERS NEWS SERVICE, U.S.A.

“Duha sa kada lima nga nagabusong” sa New York City ang nagapahulog. “Halos wala ini nagbag-o halin sang nagligad nga mga napulo ka tuig.”—THE NEW YORK TIMES, U.S.A.

Natingala gid ang mga nagapamatay sang peste sang ginpatawag sila para dakpon ang talunon nga ido sa ika-72 nga panalgan sang ginapatindog nga bilding sa London. Ginbuy-an ini nga sapat, nga “nagakaon sang nabilin nga pagkaon sang mga trabahador.”—THE TELEGRAPH, LONDON.

Makaentra sa Pulitika ang Ortodokso nga mga Pari

“Ginpasugtan sang Council of Bishops sang Russian Orthodox Church ang ila klero nga mag-entra sa eleksion para indi mabahin ang simbahan, kag maproteksionan sa iban pa nga katalagman,” suno sa report sang RIA Novosti. Suno sa mga obispo, ginatugutan ini “para mabatuan ang mga tawo nga magapabahinbahin sa [simbahan], kag sa nagahambal nga mapadalagan sila sa eleksion para kontrahon ang Ortodokso nga Simbahan.”

Bag-o nga Problema sang Kasuguan

Posible na karon nga makabata ang mga mag-asawa nga baw-as bangod sa moderno nga paagi sang medisina, pero nagresulta ini sa bag-o nga problema sang kasuguan. “Kada tuig, nagadamo ang bata nga natawo paagi sa sperm ukon embryo nga binulan ukon tinuig na nga natago,” paathag sang The Wall Street Journal. “Sa pila ka kahimtangan, ang isa sa mga ginikanan patay na, kag kalabanan ang tatay.” Sa Estados Unidos, ang mga ilo ginasustentuhan kada bulan sang Social Security. Pero lainlain ang kasuguan sang mga estado parte sa pagsustento sa mga bata nga napatay ang isa niya ka ginikanan antes pa sia natawo. “Wala gid ginapaabot sang kasuguan ang amo sini kadasig nga pag-uswag sang teknolohiya,” siling sang abogado sa Minnesota nga si Sonny Miller.