Pagbantay sa Kalibutan

Ginapakita sang mga pagtuon nga ang mga keypad sang cash machine [mga ATM] sa mga siudad sa England may makahalalit nga bakterya nga makita man sa mga basin sang pangpubliko nga kasilyas.—THE TELEGRAPH, BRITANYA.

“Kon kaisa, nagakakibot ang mga sientipiko sa mga linog [pareho sa New Zealand sini nga tuig kag sa Haiti sang nagligad nga tuig] kay natabo ini sa wala pa madiskobrehan nga mga fault line. . . . Gani nagahunahuna ang mga tawo: Pila pa ayhan ka mabaskog nga linog ang mahimo matabo sa wala pa mahibaluan nga mga fault line?”—THE NEW YORK TIMES, U.S.A.

“Ang apat sa pinakamanggaranon nga tawo sa kalibutan . . . mas madamo pa sing manggad sangsa 57 ka pinakaimol nga pungsod.”—FOREIGN POLICY, Enero/Pebrero 2011, U.S.A.

Ang 90 porsiento sa mga negosyante sa Poland nagreport nga biktima sila sang pagpangawat kag pagpanunto sang ila mga empleyado sang nagligad nga duha ka tuig.—GAZETA PRACA, POLAND.

Ginapamulta na subong sang simbahan sang Katoliko sa Brazil sing $300 (U.S.) ang mga nobya nga leyt mag-abot sa kasal. Nagapirma na nga daan ang magnobya sing tseke antes sang kasal kag ginabalik lang ini sa ila kon indi sila maleyt.G1, BRAZIL.

Indi Na Puede Mangin Organ Donor ang Papa

Sang kardinal pa sa Iglesia Katolika Romana si Joseph Ratzinger, organ donor sia, siling sang pamantalaan sa Italya nga La Repubblica. Pero sang nangin papa na sia kag gintawag nga Benedict XVI indi na sia puede mangin organ donor. Ngaa man? “Kay ang lawas sang papa iya na sang Simbahan,” paathag sang arsobispo nga si Zygmunt Zimowski, miembro sang Vatican. “Gani, kon mapatay ang papa, dapat kompleto ang iya lawas kay basi mangin santos sia sa ulihi.”

Kabuhi Kabaylo sang Kuarta?

Handa bala ang tawo nga ibaligya ang isa ka tuig sang iya kabuhi para sa isa ka milyon ka euro? Sa Germany, sobra 1 sa 4 ka lalaki kag 1 sa 6 ka babayi ang nagpasugot, suno sa ginpahimo nga surbe sang Reader’s Digest Deutschland sa Emnid. Suno sa surbe, mas handa ang mga mas bata nga batunon ang tanyag—29 porsiento sang 14 asta 29 anyos kag 25 porsiento sang 30 asta 39 anyos. Pero, mas ginpili sang mga tigulang ang kabuhi. Mga 13 porsiento lang sang mga nagaedad 50 asta 59 kag 11 porsiento sang mga nagaedad sing sobra 60 ang nagpasugot nga ibaligya ang isa ka tuig sang ila kabuhi.