Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

MAGMATA! NOBIEMBRE 2011

 Pamangkot sang mga Pamatan-on

Diin Ako Makakita sing Maayo nga Kalingawan?

Diin Ako Makakita sing Maayo nga Kalingawan?

Kon Cristiano ka, ginapili mo gid ang imo kalingawan. Wala ka lang nagasunodsunod sa nanamian sang iban nga tan-awon, basahon, ukon pamatian. Ngaa? Kay ang kalabanan subong nga mga kalingawan binastos, bayolente, kag parte sa espiritismo. Ini nga mga kalingawan dapat mo gid likawan. Pero may maayo man nga mga kalingawan. Tan-awon naton kon paano mo ini makita. *

PELIKULA

Butangi sing ✔ ang nanamian mo nga klase sang pelikula.

  • Comedy
  • Drama
  • Action/Adventure
  • Science fiction
  • Iban pa

Nahibaluan mo bala . . . ? Ang India masami nga nagapagua sing sobra isa ka libo ka pelikula kada tuig—mas madamo ini sangsa iban nga pungsod.

Dapat likawan. Madamo sing mga pelikula ang supak sa mga prinsipio sang Biblia. Ang iban sini tama ka bastos kag tama ka bayolente, ang iban naman parte sa espiritismo. Pero ang Biblia nagsiling: “Isikway gid ninyo ini tanan, kasingkal, kaakig, kalainan, nagapakalain nga hambal, kag ang malaw-ay nga hambal indi maggua sa inyo baba.” (Colosas 3:8) Isa pa, naakig ang Dios sa bisan ano nga butang parte sa espiritismo.—Deuteronomio 18:10-13.

Paano ka magpili? “Kon daw indi maayo ang trailer, wala ko na ginatan-aw ang pelikula.”—Jerrine. *

“Wala ko ginatan-aw ang ginarekomendar sang iban luwas lang kon pareho gid kami sing mga prinsipio.”—Caitlyn.

“Kon nagatan-aw ako sing sine kag daw nalainan ako, nagagua ako dayon.”—Marina.

“Para mahibaluan ko ang istorya, ginatan-aw ko sa Internet ang mga komento parte sini kon bala may mga eksena ini nga imoral, bayolente, kag may pamuyayaw.”—Natasha.

Tip: Mangita sing pelikula nga indi tanto kalain. “Nanamian gid ako sa klasikal nga mga pelikula,” siling sang tin-edyer nga si Masami.

Pamangkuta ang imo kaugalingon,

‘Ang mga pelikula bala nga ginatan-aw ko nagapahapos—ukon nagapabudlay—sa akon nga sundon ang sugo sang Dios parte sa pagkabayolente, sex, kag espiritismo?’

 LIBRO

Butangi sing ✔ ang nanamian mo nga klase sang balasahon.

  • Fiction
  • Nonfiction
  • Klasikal
  • Iban pa

Nahibaluan mo bala . . . ? Sa Estados Unidos lang, sobra isa ka libo ka libro ang ginahimo kada semana.

Wala gid sing pierdihon ang industriya parte sa kalingawan, kundi naganansia lang gid sila kon indi mo pagsundon ang imo nahanas sa Biblia nga konsiensia kag magtan-aw, magbasa, ukon mamati sa kon ano ang popular.

Dapat likawan. Pareho sa mga pelikula, mabasa sa madamo nga libro ang mga pamatasan nga wala nagahisanto sa mga prinsipio sang Biblia. Halimbawa, ang iban tama kabastos ukon parte sa espiritismo. Pero ang Biblia nagsiling: “Ang pagpakighilawas kag ang tanan nga sahi sang kahigkuan ukon kakagod indi gid paghinambitan sa tunga ninyo.” (Efeso 5:3) Nagsiling man ini nga ang espiritismo “malaut sa itololok sang GINOO.”—2 Hari 17:17.

Paano ka magpili? “Kon nagapili ako sing libro, ginabasa ko anay ang cover sa likod kag ginabukad sing makadali. Kon may makita ako nga daw indi maayo, wala ko ini ginabakal.”—Marie.

“Samtang nagadaku ako kag nagadesisyon para sa akon kaugalingon, narealisar ko nga importante gid nga sundon ko ang akon konsiensia. Kon nakita ko nga ang libro indi maayo, ginauntatan ko ini basa kay narealisar ko nga wala ini nahisuno sa mga prinsipio sang Dios.”—Corinne.

Tip: Tilawi man ang iban. “Natalupangdan ko nga mas nanamian ako sa klasikal nga mga libro sangsa moderno nga fiction,” siling ni Lara, 17 anyos. “Maayo gid ang mga tinaga sini kag ang dalagan sang istorya.”

Pamangkuta ang imo kaugalingon,

‘Nanamian bala ako magbasa sing mga libro nga nagaunod sing mga buhat nga wala nagapalipay sa Dios?’

 MUSIKA

Butangi sing ✔ ang nanamian mo nga klase sang musika.

  • Rock
  • Klasikal
  • Jazz
  • R&B
  • Hip-hop
  • Iban pa

Nahibaluan mo bala . . . ? Ang apat ka dalagku nga kompanya sang musika nagahimo sing mga 30,000 ka album kada tuig.

Dapat likawan. Pareho sa mga pelikula kag libro, kalabanan sang musika subong imoral man. Ang binastos nga mga liriko kag music video mas nagapabudlay pa gid nga kontrolon ang imo handum sa sex. (1 Corinto 6:18) “Ang kalabanan subong nga musika nagapalig-on sang mga pamatasan nga supak sa mga prinsipio sang Biblia,” siling sang 21 anyos nga si Leigh. Nagsiling pa sia nga kon mabatian mo ini daw masaot ka.

Paano ka magpili? “Ginapamangkot ko ang akon kaugalingon, ‘Kon ipatan-aw ko sa may edad na nga mga Cristiano ang listahan sang akon musika, mahuya bala ako?’ Makabulig ini sa akon sa pagpili sing musika nga dapat ko pamatian.”—Leanne.

Tip. Pamatii man ang lainlain nga klase sang musika. “Pirme nagapamati si Tatay sing klasikal nga musika kag nangin pamilyar ako sini sang bata pa ako,” siling sang tin-edyer nga si Roberto. “Ang pagtuon sing klasikal nga musika kag pagtuon sing piano nakabulig sa akon nga makita nga madamo pa gali ako sang puede matun-an.”

Pamangkuta ang imo kaugalingon,

‘Ang mga musika bala nga akon ginapamatian nagapahapos—ukon nagapabudlay—sa akon nga kontrolon ang akon handum sa sex?’

DUGANG PA NGA IMPORMASYON

Tan-awa ang libro nga Questions Young People Ask—Answers That Work, Volume 2, Chapter 31 kag 32, nga ginhimo sang mga Saksi ni Jehova.

^ par. 3 Ang Magmata! wala nagaendorso ukon nagapakalain sa espesipiko nga pelikula, libro, ukon musika. Ang katuyuan sini nga artikulo amo nga buligan ka nga mapauswag kag masunod ang imo nahanas sa Biblia nga konsiensia nga nagasunod sa mga prinsipio sang Dios.—Salmo 119:104; Roma 12:9.

^ par. 13 Gin-islan ang iban nga ngalan sa sini nga artikulo.

Magtuon sing Dugang Pa

Mahimo Mo Mabatuan ang Pagsulay!

Tatlo ka paagi ang makabulig sa imo nga mangin malig-on.