Ang Pagtamod sang Biblia

Kon Paano Magmadinalag-on ang Pag-asawahay

“Sia nga nagtuga sa ila sa ginsuguran naghimo sa ila nga lalaki kag babayi kag nagsiling, ‘Bangod sini bayaan sang lalaki ang iya amay kag ang iya iloy kag magahiusa sa iya asawa, kag ang duha mangin isa ka unod’ . . . Gani, ang gintingob sang Dios indi pagbulagon sang tawo.”—Jesucristo, suno sa Mateo 19:4-6.

SA SINI nga kalibutan nga nagabulubag-o ang mga talaksan, madamo nga tawo ang wala na nagapabalor sa pag-asawahay. Madamo nga mag-asawa subong ang nagabulagay kon magtigulang na sila ukon kon may mga problema, bisan pa indi man gid mabug-at. Makapasubo kay apektado gid ang mga kabataan.

Sa mga nagatuon sa Biblia, indi ini makapakibot. Sa “katapusan nga mga adlaw,” ukon sa aton tion subong, gintagna sang Biblia nga ang kalabanan nga tawo wala sing mga kinaiya nga nagapasuod sa pamilya, pareho sang pagkamainunungon, matuod nga gugma, kag pagpalangga. (2 Timoteo 3:1-5) Nabalaka ka bala nga nagakadula na ining maayo nga mga kinaiya? Nabalaka ka bala sa epekto sini sa pamilya? Ginapabaloran mo bala ang pag-asawahay?

Kon amo, mabuligan ka sang Biblia kay ang napamatud-an nga mga laygay sini padayon nga nagabulig sa madamo nga mag-asawa. Halimbawa, binagbinaga ang lima ka prinsipio nga makabulig gid sa pag-asawahay. *

Lima ka Sekreto sa Madinalag-on nga Pag-asawahay

(1) Tamda nga sagrado ang pag-asawahay. Subong sang ginsiling ni Jesus kaina, ginatamod niya kag sang Manunuga nga si Jehova nga Dios nga sagrado ang pag-asawahay. Ginpadaku ini sang Dios sang ginlaygayan niya sing malig-on ang pila ka lalaki sadto nga nagbulag sa ila mga asawa para makapangasawa sing mas bata. “Wala mo gintuman ang imo saad sa asawa nga imo ginpangasawa sang ikaw pamatan-on pa,” siling sang Dios. “Sia amo ang imo kapihak sang dughan, kag wala mo gintuman  ang imo saad sa iya, bisan nga nagsaad ka sa Dios nga manginmatutom ka sa iya.” Dayon nagsiling si Jehova: “Naakig ako kon ang isa sa inyo maghimo sining mapintas nga butang sa iya asawa.” (Malaquias 2:14-16, HPV) Ginapakita sini nga ginapabaloran gid sang Dios ang pag-asawahay kag importante sa iya kon paano ginatratar sang mag-asawa ang isa kag isa.

(2) Mangin responsable nga bana. Kon may importante nga desisyunan ang pamilya, kinahanglan may manguna sa paghimo sini. Ginhatag sang Biblia ini nga papel sa bana. “Ang bana amo ang ulo sang iya asawa,” siling sang Efeso 5:23. Pero wala ini nagakahulugan nga mangin mapintas sia. Dapat dumdumon sang bana nga ‘isa sila ka unod’ sang iya asawa, kag dapat niya sia padunggan kag pamangkuton kon may desisyunan. (1 Pedro 3:7) Ang Biblia nagsiling nga “ang mga bana dapat maghigugma sang ila asawa subong sang ila kaugalingon nga lawas.”—Efeso 5:28.

(3) Mangin masinakdagon nga asawa. Ginlaragway sang Biblia ang asawa subong “kabulig” sang iya bana. (Genesis 2:18) Gani, ang iya maayo nga mga kinaiya makabulig gid sa pag-asawahay. Kag subong kabulig, wala sia nagakompetensia sa iya bana, kundi mahigugmaon niya ini nga ginasakdag, para mangin malinong ang pamilya. “Ang mga asawa magpasakop sa ila bana,” siling sang Efeso 5:22. Pero, ano abi kon wala sia nagaugyon sa iya bana sa isa ka butang? Puede niya mapabutyag ang iya mga opinyon sing matinahuron, subong nga gusto man niya nga pakig-angutan sia sing matinahuron.

(4) Mangin realistiko, kag paabuta nga may mga problema. Mahimo nga matilawan ang pag-asawahay bangod sang wala ginapamensar ukon masakit nga mga tinaga, kapigaduhon, malala nga balatian, ukon kabudlayan sa pagpadaku sa kabataan. Amo gani nga ang Biblia nagsiling nga ang mga nagminyo “may kapipit-an sa ila unod.” (1 Corinto 7:28) Pero ang mga kapipit-an, ukon mga pagtilaw, indi dapat magpaluya sa pag-asawahay. Kon nagahigugmaanay ang duha ka tawo kag may kaalam sila sa Biblia, mahimo nila masolbar ang mga problema. May kaalam ka bala para maatubang ang mga problema sang inyo pamilya? “Kon may isa sa inyo nga kulang sang kaalam,” siling sang Biblia, “padayon sia nga magpangayo sa Dios, kay maalwan Sia nga nagahatag sa tanan kag wala nagapangita sang sayop.”—Santiago 1:5.

(5) Mangin matutom. Ang pagpakighilawas makaguba gid sa pag-asawahay. Amo lamang ini ang basihan sa pagbulagay nga ginatugutan sang Dios. (Mateo 19:9) Ang Biblia nagsiling: “Ang pag-asawahay mangin dungganon sa tanan, kag ang hiligdaan sang pag-asawahay mangin wala sing dagta, kay hukman sang Dios ang mga makihilawason kag mga makihilahion.” (Hebreo 13:4) Ano ang makabulig sa mga mag-asawa para indi sila masulay? Ang Biblia nagsiling: “Ihatag sang bana sa iya asawa ang natungod sa iya; apang himuon man ini sang asawa sa iya bana.”—1 Corinto 7:3, 4.

Mahimo para sa iban indi realistiko ukon dinumaan na ining lima ka punto. Pero maayo gid ang epekto kon himuon ini. Ang matuod, pareho ang mga epekto sini sa tawo nga nagapatuytoy sa Dios sa tanan nga bahin sang iya kabuhi: “Kasubong sia sang kahoy sa higad sang sapa, nga nagapamunga sa nagakaigo nga panahon, ang iya mga dahon wala nagakalaya. Ang tanan niya nga ginahimo magmadinalag-on.” (Salmo 1:2, 3, Biblia sang Katilingban sang mga Kristiano) Nalakip sa “tanan” ang kadalag-an sa pag-asawahay.

[Nota]

^ par. 6 Para sa dugang nga impormasyon parte sa pag-asawahay, tan-awa ang Pebrero 1, 2011, nga Ang Lalantawan.

NAMANGKOT KA BALA?

● Ano ang pagtamod sang Dios sa pagbulagay?—Malaquias 2:14-16.

● Paano dapat tratahon sang bana ang iya asawa?—Efeso 5:23, 28.

● Kay sin-o kaalam ang makabulig sa pag-asawahay?—Salmo 1:2, 3.