Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

MAGMATA! SEPTIEMBRE 2011

 Pamangkot sang mga Pamatan-on

Sin-o ang Akon Matuod nga mga Abyan?

Sin-o ang Akon Matuod nga mga Abyan?

“Madamo gid sing gintudlo si Cori sa akon. Kon upod kami, madamo ako sing makilala, mahimo nga mga butang, kag kasadya gid sa amon. Ginbag-o gid ni Cori ang akon kabuhi!”—Tara. *

Imposible bala nga makakita ka sing amo sini nga abyan? Indi ka lang maluyahan sing buot, makakita ka gid. Ini nga artikulo makabulig sa imo.

‘NAPALIBUTAN ako sang madamo nga tawo pero wala ako sing mga abyan.’ Amo sini ang ginabatyag sang 21 anyos nga si Shayna. Madamo sia sing kilala pero wala sia sing suod sa ila. Posible nga amo man sini ang ginabatyag sang mga nagakomunikar paagi sa Internet. “Mahimo nga kalaba sang imo listahan sang mga abyan sa Internet kag popular ka,” siling sang 22 anyos nga si Serena, “pero ang matuod indi mo man sila tanan abyan.” *

Diin ang mas gusto mo—ginatos ka kilala ukon diutay pero matuod nga mga abyan? Bisan pa pareho ini nga may bentaha, ang matuod nga abyan makabulig sa imo mga problema kag makapalig-on sa imo nga mangin mas maayo nga tawo. (1 Corinto 16:17, 18) Gamita ang masunod nga mga basihan para mahibaluan mo kon sin-o sa imo mga kilala ang may mga kinaiya sang matuod nga abyan.

ANG MATUOD NGA ABYAN MASALIGAN

“Ginasugid sang akon abyan ang iya mga sekreto, abi ko masaligan ko sia. Pero isa ka bes, ginsugid ko sa iya nga may crush ako sa isa ka lalaki. Ay abaw, nagsala gid ako! Ginpanugidsugid niya dayon ini!”—Beverly.

“Ginasugid ko ang tanan kay Alan kag nakahibalo ako nga indi niya ini pag-ipanugidsugid.”—Calvin.

Sin-o sa ila ang may matuod nga abyan? Sin-o sa imo mga abyan ang masaligan mo? * Ang Biblia nagsiling: “Ang isa ka abyan nagahigugma sa tanan nga tion.”—Hulubaton 17:17.

 Isulat sa ubos ang ngalan sang duha mo ka abyan nga masaligan mo.

  1. ․․․․․
  2. ․․․․․

ANG MATUOD NGA ABYAN HANDA MAGSAKRIPISYO

“Sa mga pag-abyanay may isa nga mas maluya. Ang matuod nga abyan nakahibalo kon ikaw ang mas maluya kag handa sia sa pagbulig kag pagsalo sa imo. Siempre, amo man sina ang ginapaabot niya sa imo kon kinahanglan niya ang bulig.”—Kellie.

“Sang napatay si Nanay, may bag-o ako nga abyan. Indi pa kami suod gid, pero nag-istoryahanay kami nga makadto sa kasal. Pero natabuan nga nagdungan ini sa lubong ni Nanay. Nakibot ako sang nagkadto sia sa lubong imbes nga sa kasal. Didto ko nabal-an nga matuod gid sia nga abyan!”—Lena.

Sin-o sa imo mga abyan ang handa nga magsakripisyo? Ang matuod nga abyan ‘padayon nga nagapangita indi sang iya kaugalingon nga kaayuhan, kundi ang iya sang iban nga tawo.’—1 Corinto 10:24.

Isulat sa ubos ang ngalan sang duha mo ka abyan nga handa magsakripisyo.

  1. ․․․․․
  2. ․․․․․

ANG MATUOD NGA ABYAN NAGABULIG SA IMO NGA MANGIN MAS MAAYO NGA TAWO

“May mga tawo nga gusto nila sundon mo sila kag mag-ugyon ka lang sa ila bisan pa indi eksakto ang ila ginahimo ukon indi ini masarangan sang imo konsiensia. Indi sila matuod nga mga abyan.”—Nadeine.

“Ang akon magulang nga babayi amo ang akon best friend. Ginabuligan niya ako nga himuon gid ang akon masarangan kag mangin mainabyanon. Ginahambal niya sa akon kon ano ang matuod bisan pa kon kaisa masakit ini.”—Amy.

“Kon may problema ako, ginabuligan ako sang matuod ko nga mga abyan nga atubangon ini kag ginalaygayan nila ako. Pero ang iban ya, ginapabay-an lang nila ako ukon gusto nila kalimtan ko na lang ini. Daw sa wala lang sa ila nga may problema ako.”—Miki.

“Nakita sang akon abyan ang akon mga potensial nga wala nakita sang iban, kag ginapalig-on niya ako nga lab-uton ini. Prangka gid sia kon kinahanglanon, kag amo sini ang gusto ko!”—Elaine.

Ginabuligan ka bala sang imo mga abyan nga malab-ot ang imo mga potensial, ukon kinahanglan mo panubuon ang imo mga talaksan para batunon ka nila? Ang Hulubaton 13:20 nagsiling: “Maglakat upud sa maalam nga mga tawo kag manginmaalam ka, apang ang kaupdanan sang mga buangbuang magaantus.”

Isulat sa ubos ang ngalan sang duha mo ka abyan nga nagabulig sa imo nga mangin mas maayo nga tawo.

  1. ․․․․․
  2. ․․․․․

Tan-awa ang mga ngalan nga imo ginlista. Kon ara gid sa tatlo ang ngalan sang isa mo ka abyan, matuod sia nga abyan! Pero kon wala ka  gid sing isulat, indi ka lang maluyahan sing buot. Makakita ka gid sing matuod nga abyan. Mahimo nga maghulathulat ka lang. * Pero samtang wala pa, tinguhai nga mangin maayo ka nga abyan sa iban. “Ginapanikasugan ko gid nga buligan ang akon mga abyan,” siling sang 20 anyos nga si Elena. “Kon may ulubrahon sila nagapresentar ako nga magbulig. Kon kinahanglan nila sing maistorya, handa ako mamati. Kon gusto nila maghibi, ara ako sa tupad nila.”

Mahimo nga madamo ka sing kilala. Mas maayo ini sangsa isa lang ka grupo ang imo ginaupdan. (2 Corinto 6:13) Pero mas maayo pa gid kon may pila ikaw ka matuod nga abyan nga “ginabun-ag sa pag-ambit sang kahul-anan.” (Hulobaton 17:17, BKK) “Maayo nga madamo ka sing kilala,” siling sang 20 anyos nga si Jean, “pero daw pareho ini sang aparador nga puno sing manami nga mga bayo pero indi tanan makaigo sa imo. Gani ang ginasul-ob mo lang amo ang bayo nga makaigo sa imo. Amo man sini ang imo suod nga mga abyan.”

^ par. 3 Gin-islan ang iban nga ngalan sa sini nga artikulo.

^ par. 5 Para sa dugang nga impormasyon sa pagkomunikar paagi sa Internet, tan-awa ang “Pamangkot sang mga Pamatan-on” sa Hulyo kag Agosto 2011 nga Magmata!

^ par. 10 Kon kaisa, ang pagtago sing sekreto sang iban indi maayo, ilabi na kon ang imo abyan nakahimo sing serioso nga sala, nagahunahuna nga maghikog ukon maghalit sa iya kaugalingon. Para sa dugang nga impormasyon basaha ang Disiembre 2008, pahina 19-21, kag Mayo 2008, pahina 26-29 nga Magmata!

^ par. 30 Para sa dugang nga impormasyon, tan-awa ang artikulo nga “Pamangkot sang mga Pamatan-on . . . Kinahanglan Ko Bala ang Mas Maayo nga mga Abyan?” sa Marso 2009 nga Magmata!