Ang Pagtamod sang Biblia

May Balaan Bala nga Adlaw Kada Semana?

SA BILOG nga kalibutan, ang mga Muslim, Judiyo, kag ang nagapangangkon nga mga Cristiano nagatigana sing isa ka adlaw kada semana para sa ila pagsimba. Ngaa? Halimbawa, si Ibrahim nga isa ka debotado nga Muslim, nagakadto sa moske kada Biernes para mangamuyo kag mamati sa sermon. Sia nagsiling: “Gusto ko mangin suod sa Dios kag magtawhay ang akon pensar.”

Ginatudlo bala sang Biblia nga may ginapatuman ang Dios nga balaan nga adlaw kada semana? Ang pagsimba bala sa isa ka partikular nga adlaw amo ang sekreto para makatigayon sing maayo nga kaangtanan sa Dios?

Temporaryo nga Kahimusan

Mga 3,500 ka tuig ang nagligad, may ginhatag ang Dios nga pinasahi nga kasuguan paagi kay propeta Moises. Nalakip sa sini nga Kasuguan ang Adlaw nga Inugpahuway para sa pagsimba. Ang pirme gid ginasunod amo ang Adlaw nga Inugpahuway kada semana. Nagasugod ini sa pagtunod sang adlaw sa Biernes asta sa pagtunod sang adlaw sa Sabado.—Exodo 20:8-10.

Ginapatuman bala sa tanan nga pungsod sadto ang inugpahuway kada semana? Wala. Ini nga Kasuguan para lamang sa mga Israelinhon kag mga proselita. Ginsilingan sang Dios si Moises: “Bantayan sang katawohan sang Israel ang inugpahuway . . . Tanda ini sa gihapon sa tunga nakon kag sang katawohan sang Israel.” *Exodo 31:16, 17.

Suno sa Biblia, ang Kasuguan nga ginhatag paagi kay Moises, “landong sang mga butang nga magaabot.” (Colosas 2:17) Gani ang Adlaw nga Inugpahuway isa lang sa temporaryo nga mga kahimusan sang pagsimba nga nagarepresentar sa mas daku nga kahimusan sa palaabuton. (Hebreo 10:1) Ginapakita sang Biblia nga sa pagtamod sang Dios, ang Kasuguan nga ginhatag sa Israel nga nagalakip sa pagtuman sa Adlaw nga Inugpahuway kada semana, natapos sang napatay si Jesus. (Roma 10:4) Ano ang nagbulos sa sini?

Bag-o nga Paagi sa Pagsimba

Pagkatapos nga natuman ang katuyuan sang Kasuguan nga ginhatag sang Dios kay Moises, ginpaathag sang Biblia ang pagsimba nga ginabaton sang Dios. Nalakip bala diri ang espesipiko nga adlaw sang pagsimba kada semana?

Ginapakita sang Biblia nga ang pila ka kasuguan nga ginhatag sa Israel para man sa Cristianong kongregasyon. Nalakip sa sini ang paglikaw sa idolatriya, pagpakighilawas, kag pagkaon sing dugo. (Binuhatan 15:28, 29) Pero wala ginapatuman sa mga Cristiano ang Adlaw nga Inugpahuway.—Roma 14:5.

Ano pa ang ginasugid sang Biblia parte sa pagsimba sang mga Cristiano sang unang siglo? Regular sila nga nagatipon para mangamuyo, magbasa sing Kasulatan, mamati sing pamulongpulong, kag mag-amba sing mga pagdayaw sa Dios. (Binuhatan 12:12; Colosas 3:16) Sa sini nga mga pagtinipon ginatudluan ang mga Cristiano, ginapabakod ang ila pagtuo, kag nagapalig-unanay sila.—Hebreo 10:24, 25.

 Wala gid ginsambit sa Biblia ang espesipiko nga adlaw nga magtipon ang mga Cristiano, pareho sang Domingo. Kon amo, ngaa ginapakabalaan sang madamong nagapangangkon nga mga Cristiano ang adlaw nga Domingo? Ang kinabatasan nga magsimba kon Domingo nagsugod sang natapos ang pagsulat sang Biblia, kag nagtuluhaw ang lainlain nga pagpati kag mga tradisyon nga wala nabase sa Biblia.

Nagsugo bala sang ulihi ang Dios sing isa ka adlaw kada semana para magsimba? Wala. Ang tanan nga pamaagi sa pagsimba ginpaathag sang Biblia. Wala na sing may gindugang sa Balaan nga Kasulatan. Si apostol Pablo gingiyahan sang Dios sa pagsulat: “Apang, kon kami ukon bisan pa ang anghel gikan sa langit magpahayag sa inyo sang maayong balita nga tuhay sa ginpahayag namon nga maayong balita sa inyo, pakamalauton sia.”—Galacia 1:8.

Makapaumpaw nga Pagsimba

Bisan pa ginatuman gid sang mga lider sang relihion sang panahon ni Jesus ang balaan nga adlaw, ang ila pagsimba wala ginabaton sang Dios bangod malaut ang ila tagipusuon. Nagahingamo sila sing kuarta kag ginapakanubo ang kubos kag mga pigado. Gusto nila mangin prominente. Nadalahig sila sa korapsion kag pulitika. (Mateo 23:6, 7, 29-33; Lucas 16:14; Juan 11:46-48) Nagapangangkon man sila nga mga representante sang Dios. Pero ang Adlaw nga Inugpahuway nga gintuyo sang Dios nga makapaumpaw, ginhimo nila nga makapabug-at sa mga tawo bangod sang ila mga pagsulundan.—Mateo 12:9-14.

Maathag nga ang pagsaulog sang balaan nga adlaw indi amo ang sekreto para mapahamut-an ang Dios. Kon amo, ano ang makapahamuot sa Dios? Gin-agda kita ni Jesus: “Kari sa akon, kamo tanan nga ginabudlayan kag ginabug-atan, kag paumpawan ko kamo.” (Mateo 11:28) Ang pagsimba nga nabase sa mga panudlo ni Jesus makapaumpaw gid! Wala ini nagapatalang kag indi ini makapabug-at.

Ang mga Saksi ni Jehova sa bilog nga kalibutan nagasunod gid sa paagi sang pagsimba sang mga sumulunod sadto ni Jesus. May mga programa man sila sa pagtuon sa Biblia kada semana. Ang adlaw sang ila pagtilipon ginbase sa kahimtangan sang ila lugar, indi sa mga tradisyon nga wala sa Biblia. Mahimo ka magtambong sa sini nga mga pagtilipon sa inyo lugar para maeksperiensiahan ining makapaumpaw nga pagsimba.

[Nota]

^ par. 7 Ang ekspresyon sa Biblia nga “sa gihapon” wala lang nagakahulugan nga magapadayon ini tubtob san-o. Posible nga nagakahulugan man ini sing wala napat-od nga kalawigon sang tion.

NAMANGKOT KA BALA?

● Dapat bala naton simbahon ang Dios sa isa ka espesipiko nga adlaw kada semana?—Roma 10:4; 14:5.

● Ngaa dapat kita magtipon para magsimba?—Hebreo 10:24, 25.

● Ano ang sekreto para mangin malipayon gid sa pagsimba?—Mateo 11:28.

[Tsart/Mga Retrato sa pahina 10, 11]

(Para sa aktual nga pormat, tan-awa ang publikasyon)

MARTES

MIERKOLES

1 HUEBES

2 BIERNES

3 SABADO

4 DOMINGO